សិល្បករខ្មែរ បង្ហាញចេតនាចូលអន្តរាគមន៍លើកង្វល់ពលរដ្ឋខ្មែរប្រឈមនឹង "ម៉ាស" ឡើងថ្លៃ

2020-01-28 03:36:51
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បការិនីខ្មែរ២រូបបាន បង្ហាញចេតនា ក្នុងការជួយប្រជាពលរដ្ឋខ្មែរ ដោះស្រាយប្រឈមនឹងរឿង "ម៉ាស" ឡើងថ្លៃខ្ពស់កប់ពពក ដែលខ្លះមានតម្លៃដល់ទៅ ១៨ដុល្លារក្នុង១ឯកតា ដោយពួកគេបញ្ជាក់ថា នឹងទិញម៉ាសឲ្យបានច្រើន ដើម្បីចែកជូនដល់ប្រជាពលរដ្ឋក្នុងវេលាប្រឈមនេះ។

អ្នកនាង សារីណា ភរិយាលោក ស៊ុក សុភា បានបញ្ចេញឲ្យដឹងថា អ្នកនាង គ្រោងនឹងទិញម៉ាសមួយចំនួនធំ ដើម្បីចែកជូនដល់បងប្អូនប្រជាពលរដ្ឋខ្មែរដោយឥតគិតថ្លៃ ទប់ទល់នឹងការក្រឡុកទីផ្សារ "ម៉ាស" របស់ឈ្មួញឆ្លៀតឱកាសនេះ។ ដោយមិនបានបញ្ជាក់ពីចំនួនពិតប្រាកដនៃម៉ាសដែលគ្រោងចែកជូនបងប្អូនប្រជាពលរដ្ឋនេះ នៅលើហ្វេសប៊ុកផ្ទាល់ខ្លួន អតីតតារាសម្ដែងបញ្ជាក់ថា នៅពេលនេះ អ្វីជាបញ្ហា គឺនាងនៅមិនទាន់ប្រមូលបានម៉ាសសម្រាប់ការបរិច្ឆាគនៅឡើយ។

អ្នកនាងសរសេរនៅលើហ្វេសប៊ុកថា នាងចង់កុម្មង់ទិញម៉ាកក្រោយឃើញមានព័ត៌មានថា បុរសម្នាក់ដាក់លក់ម៉ាកបញ្ចុះតម្លៃ ប៉ុន្តែនាងភ្ជាប់ទំនាក់ទំនងមិនបានសោះ។ "ខ្ញុំចង់កុម្មង់ម៉ាសជូនបងប្អូនយើងប្រើនៅខ្មែរ ជាពិសេសតាមសាលា តែតាំងពីម្សិលមុិញ លេខទាក់ទងមិនបានទាល់តែសោះ ហើយមានប្អូនៗខ្លះថាទាក់ទងទិញក៏មិនបានដូចគ្នា"។

ងាកមកកញ្ញា រ៉ូស តារាស្រី ដែលទើបរួចខ្លួនពីការរិះគន់រឿងសម្ដែងសិចស៊ីជ្រុលពីខែមុន ក៏បានបង្ហាញចេតនាខាងលើដូចគ្នា។ នៅហ្វេសប៊ុកផ្ទាល់ខ្លួនម្សិលមិញនេះ នាងបានប្រាប់ថា នាងនឹងទិញម៉ាស ឲ្យបានចំនួន ១០០០ ដើម្បីយកទៅចែកជូនប្រជាពលរដ្ឋ ពិសេសបងប្អូនកម្មករ កម្មការិនីរោងចក្រតែម្ដង ដែលនាងយល់ថា ពួកគេអាចនឹងប្រឈមខ្លាំងនឹងតម្រូវការម៉ាសសម្រាប់ប្រើប្រាស់។

ចាត់ជាភ័ព្វសំណាងដែរ ក្រោយការប្រកាសរបស់នាងតែប៉ុន្មានម៉ោង រ៉ូស បានប្រាប់ថា នាងទទួលបានម៉ាសគ្រប់ចំនួន១០០០ហើយ ដោយបានពីការបរិច្ចាគរបស់លោកស្រីម្នាក់ឈ្មោះ Srey Noch Mong ។ តារាស្រី បញ្ជាក់ថា ក្រោយទទួលបានម៉ាសគ្រប់ចំនួន នាងនឹងចុះចែកដល់បងប្អូនកម្មករ កម្មការិនីរោងចក្រដោយឥតគិតថ្លៃនៅព្រឹកនេះ តែម្ដង។

មេរោគផ្លូវដង្ហើមថ្មី Coronavirus បាន និងកំពុងគំរាមកំហែងពិភពលោក បូករួមទាំងកម្ពុជា ដោយក្នុងនោះក្រៅពីប្រឈមដោយផ្ទាល់នឹងជំងឺកាចសាហាវខាងលើ ពលរដ្ឋខ្មែរក្នុងស្រុក បាន និងកំពុងប្រឈមជាដំបូងជាមួយនឹងការឡើងថ្លៃ "ម៉ាស" ខ្ពស់កប់ពពក។ តាមតម្លៃ "ម៉ាស" ដែលត្រូវបានគេផ្សព្វផ្សាយលើហ្វេសប៊ុកតាំងពីថ្ងៃម្សិលមិញ ក្នុងនោះតម្លៃរបស់វា មានតម្លៃដល់ទៅ ១៨ ដុល្លារក្នុង១ឯកតា ដែលតួលេខនេះ វាហាក់ខ្ពស់ហួសពីសមត្ថភាពរបស់ប្រជាពលរដ្ឋខ្មែរភាគច្រើន។

រដ្ឋាភិបាល តាមរយៈក្រសួងសុខាភិបាល បាន និងកំពុងដុតដៃដុតជើងប្រយុទ្ធប្រឆាំង និងការពារដោយផ្ទាល់ជាមួយនឹងវីរុសកាចសាហាវ ដោយការដាក់កម្លាំងត្រួតពិនិត្យអ្នកដំណើរនៅតាមច្រកទ្វារចេញចូលអន្តរជាតិនានា បូករួមនឹងសារអប់រំពីការថែទាំង បញ្ចៀសខ្លួនពីឆ្លងវីរុសនេះផង។ យ៉ាងណា គេមិនទាន់ឃើញមានការអំពាវនាវណាមួយពីរដ្ឋាភិបាល សម្រួលដល់ទិញលក់ម៉ាសនេះនៅឡើយទេ។

យ៉ាងណា ម៉ាស មិនមែនជាវិធានការណ៍តែមួយគត់ ដើម្បីបញ្ចៀសខ្លួនពីការឆ្លងរាលដាលរបស់ Coronavirus ១០០%នោះទេ។ តាមសេចក្ដីជូនដំណឹងរបស់ក្រសួងសុខាភិបាលកម្ពុជា ក្រៅពីប្រើប្រាស់ ម៉ាស់ ដែលពលរដ្ឋទាំងអស់បាន និងកំពុងមានកង្វល់នេះ ពួកគេគប្បីអនុវត្តតាមវិធានការណ៍ផ្សេងៗទៀតដូចខាងក្រោម៖

ជំងឺ Coronavirus គឺជាជំងឺផ្លូវដង្ហើមថ្មី ដែលត្រូវបានគេវាយតម្លៃថា សាហាវជាងជំងឺ សារ កាលពីប៉ុន្មានឆ្នាំមុនដល់ទៅ ១០ដង។ ជំងឺនេះ បានកើតឡើង និងរីករាលដាលពីទីក្រុង Wuhan ប្រទេសចិន និងបានរីករាលដាលដល់ប្រទេសជាង ១០ ផ្សេងទៀតលើពិភពលោក។

តារាងបង្ហាញពីករណី Coronavirus គិតត្រឹមថ្ងៃម្សិលមិញ

មកទល់ថ្ងៃទី ២៨ មករា ២០២០ នេះតុល្យការនៃអ្នកបាត់បង់ជីវិតដោយសារជំងឺនេះ គឺមាននៅត្រឹមតែប្រទេសចិនក្នុងតំបន់សាយភាយជំងឺប៉ុណ្ណោះ។ តួលេខនៃការស្លាប់ គិតត្រឹមព្រឹកថ្ងៃនេះដដែល គឺមាន ១០៦នាក់ និងមានអ្នកឆ្លងថ្មីជំងឺនេះ ១៣០០បន្ថែមទៀតលើតួលេខចាស់ពីម្សិលមិញ 2761នាក់៕

អត្ថបទ៖ ទារិកា