ក្ដៅៗ! ចិនដកតំណែងមន្ត្រីជាន់ខ្ពស់ខេត្ត Hubei ច្រើននាក់ ក្រោយអ្នកស្លាប់កើនជាង ១ពាន់

2020-02-11 06:46:55
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលក្រុងប៉េកាំង បានសម្រេចដកតំណែងមន្ត្រីជាន់ខ្ពស់ជាច្រើននាក់ក្នុងខេត្ត Hubei ពាក់ព័ន្ធនឹងការដោះស្រាយបញ្ហាផ្ទុះវីរុសក្នុងខេត្តដែលបណ្ដាលឲ្យអ្នកស្លាប់កើនឡើងរហូតដល់ជាង ១ពាន់នាក់ហើយបើគិតមកទល់ពេលនេះ។

យោងតាមសារព័ត៌មានរដ្ឋចិនឲ្យដឹងថា ប្រធានគណៈកម្មការសុខាភិបាលខេត្ត, រដ្ឋលេខាធិការ និង នាយករងកាកបាទក្រហមក្នុងតំបន់ សុទ្ធតែត្រូវបានដកតំណែងចេញ។ ប្រភពដដែលបន្ដថា ឥឡូវនេះមានការបណ្តេញចេញ, ការស៊ើបអង្កេត និងការព្រមានជាច្រើននៅទូទាំង Hubei និងខេត្តដទៃទៀតក្នុងពេលផ្ទុះជំងឺនេះ។ ប៉ុន្តែការដកតំណែងនេះ មិនមែនមានន័យថាពួកគេត្រូវបណ្ដេញចេញទាំងស្រុងនោះទេ ដោយគ្រាន់តែប្ដូរឲ្យទៅកាន់មុខតំណែងផ្សេង។ យ៉ាងណាក៏ដោយ ក្រោយពេលដែលត្រូវដកតំណែង មន្ត្រីទាំងនោះអាចប្រឈមនឹងការពិន័យពីបក្សកុម្មុយនិស្តចិន។

គួរឲ្យដឹងថា កាលពីដើមខែនេះ អនុប្រធានការិយាល័យស្ថិតិទីក្រុង Wuhan ត្រូវបានបណ្ដេញចេញហើយទទួលការព្រមានធ្ងន់ធ្ងរពីបក្សទៀតផង។ ក្រោយមកទៀត ប្រធានគណៈកម្មការសុខាភិបាលទីក្រុង Huanggang ដែលជាទីក្រុងរងគ្រោះខ្លាំងជាងគេទី ២បន្ទាប់ពី Wuhan ក៏ត្រូវបានដកតំណែងផងដែរ៕