កូរ៉ូណាវីរុស ៖ កម្ពុជាស្ថិតក្នុងចំណោម ៧ប្រទេស ប្រឈមផលប៉ះពាល់សេដ្ឋកិច្ចពីចិន
- 2020-02-11 08:04:04
- ចំនួនមតិ 0 | ចំនួនចែករំលែក 0
កូរ៉ូណាវីរុស ៖ កម្ពុជាស្ថិតក្នុងចំណោម ៧ប្រទេស ប្រឈមផលប៉ះពាល់សេដ្ឋកិច្ចពីចិន
ចន្លោះមិនឃើញ
ការផ្ទុះឡើងនៃជំងឺឆ្លងថ្មីកូរ៉ូណាវីរុស នឹងជះឥទ្ធិពលយ៉ាងខ្លាំងក្លាទៅលើប្រទេសជាច្រើនជាពិសេសដែលក្រីក្រ បើទោះបីជាពួកគេមិនមានរបាយការណ៍ពីករណីឆ្លងជំងឺក៏ដោយ។
យោងតាមការសិក្សាថ្មីបង្ហាញថា ផលផលប៉ះពាល់បណ្ដាលមកពីការធ្លាក់ចុះនៃតម្លៃទីផ្សារភាគហ៊ុន, ការផ្អាកផលិតកម្ម, ការបិទព្រំដែន និងការលុបចោលជើងហោះហើរជាដើម។ លើសពីនេះទៀត តម្រូវការក្នុងប្រទេសចិនបានធ្លាក់ចុះ ១% ដែលបណ្ដាលឲ្យប្រទេសមានចំណូលទាប និងមធ្យម ប្រឈមខាតបង់ទំនិញស្មើនឹងទឹកប្រាក់ប្រមាណ ៤ប៊ីលានដុល្លារ ដោយសារការបិទការនាំចេញទៅកាន់ប្រទេសចិន ហើយ ០,៦%ទៀតដោយសារវិស័យទេសចរចិន មកកាន់ប្រទេសរបស់ពួកគេ។
ផលប៉ះពាល់ខាងសេដ្ឋកិច្ចនៃការផ្ទុះឡើងនៃមេរោគនេះ ត្រូវបានទទួលការចាប់អារម្មណ៍ពីបណ្តាប្រទេសដែលមានទំនាក់ទំនងជិតស្និទ្ធជាមួយប្រទេសចិនតាមរយៈពាណិជ្ជកម្ម, ការវិនិយោគ និងការបំលាស់ទីរបស់ប្រជាជន។ ម៉ុងហ្គោល, កម្ពុជា និងឡាវ គឺជាប្រទេសអាស៊ីដែលមានការប៉ះពាល់ខ្លាំងជាងគេ បន្ទាប់មកគឺមីយ៉ាន់ម៉ា, ហ្វីលីពីន, ថៃ និងវៀតណាម។ ភាគច្រើននៃប្រទេសទាំងនេះ នាំចេញច្រើនជាងមួយភាគប្រាំមួយនៃការនាំចេញសរុបក្នុងប្រទេស ទៅកាន់ប្រទេសចិនហើយប្រទេសខ្លះមានដល់ ៩០%។ ក្រៅពីនេះ ច្រើនជាងមួយភាគប្រាំនៃចំនួនអ្នកទេសចរសរុបក្នុងប្រទេសមីយ៉ាន់ម៉ា, ថៃ, ម៉ុងហ្គោល, កម្ពុជា និងវៀតណាម គឺសុទ្ធតែជាភ្ញៀវទេសចរចិន។
ជាក់ស្ដែងបើគិតត្រឹមរយៈពេលជាង ២ខែនៃការផ្ទុះវីរុសនេះឡើង វិស័យនាំចេញផលិតផលកសិកម្មវៀតណាមទៅចិន បានធ្លាក់ចុះក្នុងទំហំទឹកប្រាក់ប្រមាណ ៨០០លានដុល្លារ។ ក្រសួងឧស្សហកម្ម-ពាណិជ្ជកម្មចិន ព្រមានថាប្រសិនបើមិនមានការទប់ស្កាត់ទាន់ពេលក្នុងរយៈពេល ៣ខែទេ ទំហំការខាតបង់អាចនឹងឡើងពីចន្លោះ ៤០០ ទៅ ៦០០លានដុល្លារ។ ប្រសិនបើជំងឺនេះនៅតែអូសបន្លាយពេលយូរជាងនេះទៀត តួលេខអាចនឹងឡើងដល់ពី ៦០០ ទៅ ៨០០លានដុល្លារ។ ការខាតបង់ផ្នែកសេដ្ឋកិច្ចរបស់វៀតណាមនេះ គឺបណ្ដាលមកពីការបិទចក្រព្រំដែនភាគខាងជើងប្រទេសជាមួយចិន ដើម្បីទប់ស្កាត់នៃការឆ្លងរាលដាលកូរ៉ូណាវីរុស។
ក្រឡេកមកមើលខាងប្រទេសថៃឯណេះវិញ វិស័យទេសចររបស់ខ្លួនពីភ្ញៀវចិន បានធ្លាក់ចុះប្រមាណ ៥៨%កាលពីថ្ងៃចូលឆ្នាំចិន ស្មើនឹង ២០ម៉ឺននាក់ បើធៀបនឹងរដូវកាលចូលឆ្នាំល់មុន ដែលបណ្ដាលឲ្យសេដ្ឋកិច្ចខាតបង់ចំណូលប្រមាណ ២៩២លានដុល្លារ។ យោងតាមស្ថិតិបង្ហាញថា ប្រហែល ៦០% នៃចំនួនអ្នកទេសចរចិន ធ្វើដំណើរកម្សាន្ដមកកាន់ប្រទេសថៃតាមរយៈកញ្ចប់ធូរ។ ការធ្លាក់ចុះនេះ បានកើតឡើងបន្ទាប់ពីប្រទេសចិនបានដាក់កម្រិតលើការធ្វើដំណើរជាក្រុម (កញ្ចប់ធួរ) ដែលជាសកម្មភាពមួយដើម្បីគ្រប់គ្រងការរីករាលដាលនៃមេរោគឆ្លងវីរុសនេះ។ គួរបញ្ជាក់ថា ផ្អែកលើទិន្នន័យផ្លូវការភ្ញៀវទេសចរប្រមាណ ១០,៩ លាននាក់មកពីប្រទេសចិនដីគោក បានមកលេងប្រទេសថៃក្នុងឆ្នាំ ២០១៩ ដែលជាប់ចំណាត់ថ្នាក់ទីមួយក្នុងចំណោមភ្ញៀវទេសចរមកពីប្រទេសផ្សេងទៀត។ ភ្ញៀវទេសចរចិន មានចំនួនយ៉ាងហោចណាស់ ៤២៦ ពាន់លានបាត (១៣,៦ ពាន់លានដុល្លារ) ក្នុងចំណូលទេសចរណ៍របស់ថៃផងដែរ។
មិនខុសពីថៃ និងវៀតណាមប៉ុន្មានទេ សេដ្ឋកិច្ចរបស់ប្រទេសកម្ពុជា ពឹងផ្អែកកាន់តែខ្លាំងឡើងលើការវិនិយោគ និងជំនួយបរទេសរបស់ចិនជាពិសេសនៅក្នុងវិស័យសំណង់និងអចលនទ្រព្យ។ យោងតាមក្រុមប្រឹក្សាដើម្បីការអភិវឌ្ឍន៍កម្ពុជាឲ្យដឹងថា គិតចាប់ពីឆ្នាំ ២០១៦ ដល់ខែសីហាឆ្នាំ ២០១៩ ប្រទេសចិនមានទឹកប្រាក់ជិត ៨ ពាន់លានដុល្លារនៃការវិនិយោគផ្ទាល់ ក្នុងចំណោមការវិនិយោគទាំងអស់ពីបរទេសចំនួន ២២,៥ ពាន់លានដុល្លារនៅកម្ពុជា។ អ្នកសេដ្ឋកិច្ចកម្ពុជាលោក ង៉ែត ជូ ឲ្យដឹងថាវិស័យសេដ្ឋកិច្ចសំខាន់ៗ ចំនួន ៤របស់ប្រទេសកម្ពុជា គឺវិស័យកសិកម្ម, ទេសចរណ៍, វិស័យកាត់ដែរ និងសំណង់ មានវិនិយោគិន ៥០ ភាគរយមកពីប្រទេសចិនហើយផលប៉ះពាល់នៃការផ្ទុះឡើងនៃវីរុសមកលើកម្ពុជា នឹងអាស្រ័យលើភាពធ្ងន់ធ្ងរនិងរយៈពេលរបស់វា។
គួររំលឹកថា មកទល់ពេលនេះ ចំនួនអ្នកស្លាប់ជាផ្លូវការពីការផ្ទុះឡើងនៃវីរុសកូរ៉ូណា បានកើនឡើងនៅថ្ងៃអង្គារនេះដល់ ១ ០១៦ នាក់ហើយដោយរដ្ឋាភិបាលនិយាយថាការឆ្លងសរុបបានកើនឡើងដល់ ៤២ ៦៣៨នាក់៕