គ្រូស្វាយរៀង និយាយពីបាល់ប៉ះដៃរបស់ក្រុម Ceres យប់មិញ ធ្វើឱ្យការប្រកួតប្រែប្រួល

2020-02-12 02:11:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការប្រកួតពានរង្វាន់ AFC Cup កាលពីយប់មិញនេះ ក្រុមព្រះខ័នរាជស្វាយរៀងរបស់កម្ពុជា បានបរាជ័យក្រោមថ្វីជើងក្រុម Ceres របស់ហ្វីលីពីនក្នុងលទ្ធផល ៤-០។

រូបភាព៖ AFC Cup

ក្នុងការប្រកួតនោះដែរ គេសង្កេតឃើញគ្រាប់បាល់ទី២របស់ក្រុម Ceres ជាបាល់ប៉ះដៃបញ្ចូលទី ប៉ុន្តែអាជ្ញាកណ្ដាលបានផ្ដល់បាល់នោះ ដោយមិនមានពិន័យអ្វីនោះទេ។ ចំពោះគ្រាប់នេះដែរ លោក Conor Nestor ដែលជាគ្រូបង្វឹកក្រុមព្រះខ័នរាជស្វាយរៀង បានបញ្ជាក់ថាជាចំណុចរបត់ក្នុងការប្រកួត។

លោក បាននិយាយដូច្នេះថាក្រុមស្វាយរៀងបានបង្កើតកំហុសមែនសម្រាប់ប្រកួតនេះ ទើបបង្កឱ្យមានគ្រាប់បាល់ទី១។ តែសម្រាប់គ្រាប់បាល់ទី២វិញ ជាគ្រាប់បាល់ Handball (បាល់ប៉ះដៃ) ដែលបង្កឡើងដោយកីឡាករម្នាក់ដែលបង្កកំហុសក្នុងប្រអប់គ្រោះថ្នាក់ធ្វើឱ្យស្វាយរៀងបានបាល់ប៉េណាល់ទី។ ដូច្នេះហើយ ប្រសិនបើអាជ្ញាកណ្ដាលចាប់បាល់ប៉ះដៃរបស់កីឡាកររូបនេះ ដោយឱ្យកាតលឿងដល់រូបគេ បូកជាមួយកាតលឿងដែលគេបង្កកំហុសក្នុងតំបន់គ្រោះថ្នាក់ទៀត។ នោះ រូបគេនឹងបានកាតក្រហម ហើយស្វាយរៀង នឹងបានបាល់ប៉េណាល់ទី នៅត្រឹមក្រុម Ceres នាំមុខ ១-០ ប៉ុណ្ណោះ។ ដូច្នេះត្រឹមលទ្ធផល ១-០ ហើយបានបាល់ប៉េណាលទី និងក្រុម Ceres សល់គ្នាត្រឹម១០នាក់ទៀត នោះលទ្ធផលប្រកួតនេះ អាចប្រែប្រួលមិនខាន។

យ៉ាងណាមិញ លោកបានបញ្ជាក់ថាក្រុមនឹងប្រឹងប្រែងឡើងវិញសម្រាប់ការបន្តបន្ទាប់ទៀត ក្នុងពានរង្វាន់ AFC Cup នេះ ត្បិតអីការប្រកួតនៅសល់ច្រើនប្រកួតទៀត៕

អត្ថបទ៖ ប្រុស យុទ្ធ