Jack Sport A ប៉ះ វឌ្ឍនវិជ្ជា លេង៥តង់ជក់ចិត្តខ្លាំង អ្នកចាញ់ធ្លាក់ អ្នកឈ្នះឡើងជម្រុះបន្ត

2020-02-15 13:04:12
ចំនួនមតិ 0 | ចំនួនចែករំលែក 0

ចន្លោះមិនឃើញ

៦០ក្រុមប្រកួតជម្រុះពានរង្វាន់ Tiger Street Football 2020 ប្រចាំមណ្ឌលកំពត បានហាលអាវទៅផ្ទះជាបណ្ដើរៗ ខណៈក្រុមឈ្នះនៅបន្តជម្រុះរកជើងឯក។ ក្នុងនោះក្រុម Jack Sport A និងវឌ្ឍនវិជ្ជា ជាគូប្រជែងដ៏ខ្លាំងក្លា និងជក់ចិត្តមែនៗពោលគឺលេងរហូតដល់ទៅ ៥ តង់ឯណោះ។

Jack Sport A(អាវក្រហម)

Jack Sport A និងវឌ្ឍនវិជ្ជា បានបើការប្រយុទ្ធយ៉ាងស្វិតស្វាញ ដោយតង់ទី១ បានបញ្ចប់ក្នុងលទ្ធផល ០-០។ តង់ទី២ ក្រុមទាំងពីរទទួលបានបាល់ពិន័យប៉េណាល់ទី ១លើកដូចគ្នា និងធ្វើបានសម្រេច ១-១។

Jack Sport A(អាវក្រហម)

ដោយស្មើ២ដង (៦នាទី២ដង) ការប្រកួតតង់ទី៣ តម្រូវឱ្យថែម១នាទី និងដកសមាជិកម្នាក់ ដូច្នេះលេង៤ម្ខាង ហើយបញ្ចប់ក្នុងពិន្ទុ ១-១ ដដែល។ បន្តការស្មើ ក្នុងតង់ទី៤ ត្រូវថែម១នាទី ដកសមាជិកម្នាក់ទៀត សល់៣នាក់ និងបញ្ចប់ក្នុងលទ្ធផល ១ស្មើជាថ្មី។ ចូលដល់តង់ទី៥ ថែម១នាទី លេងគ្នា២នាក់ ក្រុម Jack Sport A បានយកឈ្នះក្រុម វឌ្ឍនវិជ្ជា ២-១ យ៉ាងប្រផិតប្រផើយ។

Jack Sport A(អាវក្រហម)

ដោយឡែកក្រុមការពារតំណែងជើងឯកឆ្នាំ ២០១៩ មណ្ឌលសីហនុ ស្នងការដ្ឋាននគរបាលខេត្តព្រះសីហនុ A បានយកឈ្នះក្រុមវ័យចាស់ស្នងការខេត្តព្រះសីហនុ ក្នុងលទ្ធផល ៣-១ ឡើងទៅវគ្គបន្ទាប់។ ដូច្នេះសូមរង់ចាំទស្សនាបន្តទៀតថា តើក្រុមទាំងពីរខាងលើ អាចបន្តទៅភ្នំពេញបានឬយ៉ាងណា?

លទ្ធផលការប្រកួត

ការប្រកួតពានរង្វាន់ Tiger Street Football 2020 ប្រចាំមណ្ឌលកំពត នឹងបិទបញ្ចប់នាថ្ងៃ ១៦ ខែកុម្ភៈ ដោយចម្រាញ់យកតែ៦ក្រុមប៉ុណ្ណោះ ដើម្បីទៅប្រកួតវគ្គផ្ដាច់ព្រ័ត្រនៅរាជធានីភ្នំពេញ ថ្ងៃទី២៩ ខែកុម្ភៈ ដល់ថ្ងៃទី១ ខែមីនា ឆ្នាំ២០២០៕

អត្ថបទ៖ អ៊ុំ សុភក្តិ