អ្នកដំណើរជនជាតិថៃ ២នាក់ ចុះពីនាវា Westerdam រកមិនឃើញមានឆ្លងកូរ៉ូណាវីរុស
- 2020-02-17 02:56:49
- ចំនួនមតិ 0 | ចំនួនចែករំលែក 0
អ្នកដំណើរជនជាតិថៃ ២នាក់ ចុះពីនាវា Westerdam រកមិនឃើញមានឆ្លងកូរ៉ូណាវីរុស
ចន្លោះមិនឃើញ
អ្នកដំណើរជនជាតិថៃពីរនាក់ដែលជិះនៅលើនាវាទេសចរណ៍ប្រណីត Westerdam មិនមានសញ្ញានៃវីរុសកូរ៉ូណាទេ បើទោះបីជាអ្នកដំណើរជនជាតិអាមេរិកាំងអាយុ ៨៣ ឆ្នាំម្នាក់នៃនាវាទេសចរណ៍ប្រណីតនេះ បានធ្វើតេស្ត៍វិជ្ជមាន Covid-19 ចំនួនពីរដងដោយមន្ត្រីសុខាភិបាលម៉ាឡេស៊ីក៏ដោយ។
អ្នកដំណើរជនជាតិថៃពីរនាក់ ស្ថិតក្នុងចំណោមអ្នកដំណើរ ៣៥ នាក់ដែលបានមកដល់អាកាសយានដ្ឋានសុវណ្ណភូមិកាលពីម្សិលមិញ។ អ្នកនាំពាក្យក្រសួងសុខាភិបាលសាធារណៈលោក Rungrueng Kitphati បាននិយាយថាអ្នកដំណើរទាំង ៣៥ នាក់ត្រូវបានពិនិត្យរកមេរោគឆ្លង ហើយលទ្ធផលបង្ហាញថាអវិជ្ជមាន។ អ្នកដំណើរ បានមកដល់កាលពីម្សិលមិញបន្ទាប់ពីត្រូវបានត្រួតពិនិត្យ ដោយអាជ្ញាធរសុខាភិបាលកម្ពុជានៅពេលពួកគេធ្វើដំណើរត្រឡប់ទៅកាន់ប្រទេសរៀងៗខ្លួន។
ទោះយ៉ាងណាអាជ្ញាធរម៉ាឡេស៊ីបានរាយការណ៍ថាស្ត្រីជនជាតិអាមេរិកអាយុ ៨៣ ឆ្នាំម្នាក់ដែលជាអ្នកដំណើររបស់ Westerdam ផងដែរនោះ បានធ្វើតេស្តវិជ្ជមានចំនួនពីរដងសម្រាប់ Covid-19។ ស្ត្រីរូបនេះ ត្រូវបានមន្ត្រីសុខាភិបាលរបស់ប្រទេសកម្ពុជាធ្វើតេស្ដរកឃើញលទ្ធផលអវិជ្ជមាន Covid-19 មុនពេលអនុញ្ញាតឲ្យធ្វើដំណើរទៅម៉ាឡេស៊ីជាមួយស្វាមីរបស់ខ្លួន។ ជាមួយគ្នាដែរ ប្ដីរបស់ស្ត្រីរូបនេះ មិនត្រូវបានគេរកឃើញមានផ្ទុក Covid-19 នោះទេ ប៉ុន្តែត្រូវដាក់ឲ្យនៅដោយឡែកសិន។
កប៉ាល់ទេសចរណ៍ Westerdam ដឹកមនុស្សប្រមាណជា ២ ២០០នាក់ ក្នុងនោះអ្នកដំណើរ ១ ៤៥៥នាក់ និងបុគ្គលិកកប៉ាល់ចំនួន ៨០២នាក់ ដែលចាកចេញពីទីក្រុងហុងកុង ប្រទេសចិន កាលពីថ្ងៃទី០១ ខែកុម្ភៈ ឆ្នាំ២០២០ ត្រូវបានកម្ពុជាអនុញ្ញាតឲ្យចូលចតក្រោយពេលដែល កោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ (អាមេរិក) និងប្រទេសថៃ បដិសេធមិនឲ្យចូលចតឡើយ ដោយសារតែការព្រួយបារម្ភថា ក្នុងចំណោមមនុស្សរាប់ពាន់នាក់នៅលើនោះ អាចមានផ្ទុកវីរុសកូរ៉ូណាថ្មី (Covid-19)៕