ញាក់សាច់ ពេលដឹងចំនួនលុយ ដែល Ronaldo ឱ្យគូដណ្ដឹងចាយ១ខែៗ?

2020-02-19 04:45:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពគួរឱ្យទុកចិត្តមួយ បានបញ្ជាក់ថា Cristiano Ronaldo បានផ្ដល់ប្រាក់ ១៥៥ ០០០ដុល្លារក្នុង១ខែ ឱ្យទៅគូដណ្ដឹង Georgina Rodriguez សម្រាប់ចាយវាយ ទិញរបស់ប្រើប្រាស់។

Ronaldo និងគូដណ្ដឹងរបស់គេ កំពុងស្នាក់នៅក្រុង Turin ប្រទេសអ៊ីតាលី ជាមួយតម្លៃពលកម្ម ៥៤លានដុល្លារក្នុង១ឆ្នាំ សម្រាប់ការលេងឱ្យក្រុម Juventus ។ ក្រៅពីចំណូលរាប់លានពីការលេងបាល់នេះហើយ កីឡាករលំដាប់ពិភពលោកនេះ ទទួលបានប្រាក់ជាច្រើនលានដុល្លារទៀត ពីការផ្សព្វផ្សាយពាណិជ្ជកម្ម និងជំនួញរបស់ខ្លួន។

និយាយពីជីវិតគ្រួសារវិញ គូដណ្ដឹងរបស់ Ronaldo ឈ្មោះថា Georgina Rodriguez នៅផ្ទះ មើលកូនស្រីរបស់ពួកគេអាយុ២ឆ្នាំ និងកូនៗ៣នាក់ផ្សេងទៀត។ កីឡាករជម្រើសជាតិព័រទុយហ្គាល់ ត្រូវបានគេដឹងថាបានឱ្យប្រាក់ទៅ Rodriguez សម្រាប់ចាយវាយប្រចាំខែដល់ទៅ ១៥៥ ០០០ដុល្លារឯណោះ។ ក្រៅពីបានប្រាក់ពី Ronaldo យ៉ាងច្រើននេះហើយ នារីវ័យ២៦ឆ្នាំរូបនេះ ក៏ទទួលបានប្រាក់ពីការបង្ហោះនៅលើបណ្ដាញ Instagram ១២ ៨៣០ដុល្លារ ក្នុងការបង្ហោះ១លើកផងដែរ។ ចំណូលបែបនេះហើយ ទើបបានជាថ្ងៃខួបកំណើតរបស់ Ronaldo នាងបានទិញឡានថ្មី Mercedes G-Wagon តម្លៃ១៨ម៉ឺនដុល្លារជូនទៅសំណព្វចិត្តបាន។

Rodriguez មានប្រវត្តិជាកូនអ្នកមានជីវភាពលំបាកមួយ ដែលមានឪពុកជាអតីតកីឡាករបាល់អាហ្សង់ទីន និងម្ដាយជាជនជាតិអេស្ប៉ាញ។ នាងរស់នៅភូមិ Jaca ភាគខាងជើងនៃប្រទេសអេស្ប៉ាញ។ កាលពីក្មេង ស្រីស្រស់ម្នាក់នេះ ចូលចិត្តរាំ ច្រៀង ប៉ុន្តែដោយសារតែគ្រួសារមិនអាចបញ្ជូននាងទៅសាលាបាន ទើបធ្វើឱ្យនាងចាប់អាជីពជាអ្នកលក់ខោអាវវិញ។ ការងារផ្នែកលក់ចុងក្រោយ គឺនៅក្រុមហ៊ុន Gucci កន្លែងដែលនាងបានជួបជាមួយ Ronaldo ។ នៅគ្រានោះនាងទទួលបានប្រាក់ ១៨,៥ដុល្លារប៉ុណ្ណោះ ក្នុង១ម៉ោង៕

ប្រភព៖ foxsports អត្ថបទ៖ ប្រុស យុទ្ធ