ប្រៀបធៀបស្ថិតិ Ronaldo និង Messi វគ្គ១៦ក្រុម UCL ចាំមើលនរណាឈ្នះ

2020-02-20 03:38:41
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo និង Lionel Messi គឺជាកីឡាករល្អបំផុតពីររូបក្នុងប្រវត្តិសាស្ត្រនៃពានរង្វាន់ទ្វីបអឺរ៉ុប UEFA Champions League។

ពួកគេគឺជាកីឡាករតែពីរនាក់គត់ដែលស៊ុត Hat-Trick ៨ដង និងច្រើនជាង១០០គ្រាប់ក្នុងកម្មវិធីដ៏ធំនេះ។ ស្របពេល UCL កំពុងឈានដល់វគ្គ១៦ក្រុមចុងក្រោយយើងទៅមើលស្ថិតិរបស់ Ronaldo និង Messi ថាតើនរណាធ្វើបានល្អជាង៖

#១. គ្រាប់សរុប

Messi គឺជាកីឡាករស៊ុតវគ្គ១៦ក្រុមចុងក្រោយច្រើនបំផុតចំនួន២៦គ្រាប់ក្នុងអាជីព តាមពីក្រោយដោយ Ronaldo ដែលមាន២៣គ្រាប់នៅក្នុងដៃ។

#២. គ្រាប់គិតជាមធ្យម

Messi បង្ហាញខ្លួនបាន២៨ រកបាន២៦គ្រាប់គិតជាមធ្យម ០,៩៣គ្រាប់/១ប្រកួត ខណៈ Ronaldo មាន២៣គ្រាប់ក្នុង៣០ប្រកួត គិតជាមធ្យម ០,៧៧គ្រាប់/១ប្រកួត។

#៣. ស៊ុតចូលជាប់ៗគ្នា

Ronaldo ស៊ុតចូល១០ដងជាប់គ្នានៅវគ្គ១៦ក្រុមគិតចាប់ពីរដូវកាល២០១១-១២ ដល់រដូវកាល ២០១៥-១៦ ខណៈ Messi ធ្លាប់ស៊ុតចូលច្រើនបំផុតគឺ៣ដងជាប់ គ្នាប៉ុណ្ណោះគឺចាប់ពីរដូវកាល២០១៦-១៧ ដល់ ២០១៧-១៨។

#៤. ចំនួនគូប្រកួតដែលស៊ុតបញ្ចូលទី

Ronaldo ស៊ុតចូល១២ក្រុមផ្សេងគ្នានៅវគ្គនេះ ប៉ុន្តែរូបគេខកខានទម្លាយទី៤ក្រុមមាន Porto, AC Milan, Lille, និង Napoli ស្របពេល Messi ស៊ុតចូល១០ក្រុមផ្សេងគ្នា តែខកខានទម្លាយទីតែ១ក្រុមប៉ុណ្ណោះគឺ Liverpool កាលពីរដូវកាល២០០៦-០៧។ នេះនិយាយតែវគ្គ១៦ក្រុមចុងក្រោយ មិនរាប់បញ្ចូលវគ្គផ្សេង។

#៥. គ្រាប់ច្រើនបំផុតគិតទាំងពីរជើង

Messi ស៊ុតចូល៦គ្រាប់គិតទាំងពីរជើងឲ្យ Barcelona ទល់ Bayer Leverkusen កាលវគ្គ១៦ក្រុមចុងក្រោយរដូវកាល ២០១១-១២។ កាលណោះ៥គ្រាប់កើតឡើងនៅជើងទីពីរ ធ្វើឲ្យរូបគេជាប់កំណត់ត្រាជាកីឡាករស៊ុតបានច្រើនបំផុតក្នុង១ប្រកួតនៅ UCL។ Ronaldo ស៊ុតចូលច្រើនបំផុតទាំងពីរជើងគឺ៤គ្រាប់ឲ្យ Real Madrid ទល់នឹង Schalke 04 កាលពីរដូវកាល២០១៣-១៤៕