គួរឲ្យបារម្ភ! កូរ៉ូណាវីរុសឆ្លងរាលដាលក្រៅដីចិនលឿនពេក មន្ត្រីសុខាភិបាលពិភពលោកចេញមុខព្រមាន

2020-02-24 02:28:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិនបានរាយការណ៍ការធ្លាក់ចុះចំនួនអ្នកឆ្លងកូរ៉ូណាវីរុសCOVID-19ជាថ្មីទៀតកាលពីថ្ងៃអាទិត្យទី២៣កុម្ភៈ តែពួកមន្ត្រីសុខាភិបាលពិភពលោកបានព្រមានថា វាលឿនពេកក្នុងការព្យាករណ៍អំពីការផ្ទុះជំងឺឆ្លងនេះ នៅពេលការឆ្លងថ្មីនិងការភ័យខ្លាចបែរជាកើនឡើងនៅក្រៅប្រទេសចិន។

គណៈកម្មាធិការសុខាភិបាលចិនកាលពីថ្ងៃអាទិត្យ បានអះអាងការឆ្លងថ្មី៦៤៨នាក់ ខ្ពស់ជាងមួយថ្ងៃមុន តែនៅក្រៅខេត្តហ៊ូប៉ីដែលជាប្រភពផ្ទុះវីរុសនេះ មានការឆ្លងតែ១៨ករណី ដែលជាចំនួនឆ្លងទាបបំផុតចាប់តាំងពីអាជ្ញាធរធ្វើការចេញផ្សាយតួលេខឆ្លងនិងស្លាប់ប្រចាំថ្ងៃកាលពីមួយខែមុន។ ខេត្តហ៊ូប៉ី មានអ្នកឆ្លងថ្មី៦៣០នាក់សម្រាប់ថ្ងៃសៅរ៍ ដោយកើនពីចំនួន៣៦៦នាក់កាលពីមួយថ្ងៃមុន។ចំណែកអ្នកស្លាប់ចុះបន្តិចមកនៅត្រឹម៩៦នាក់និងសរុបមនុស្ស ២.៣៤៦នាក់បានស្លាប់ដោយវីរុសនេះនៅក្នុងខេត្ត។ ការចម្លងCOVID-19នៅក្រៅចិនដីគោក បន្តរាលដាលគួរឲ្យព្រួយបារម្ភ ដោយនៅកូរ៉េខាងត្បូងកាលពីថ្ងៃអាទិត្យរាយការណ៍អ្នកស្លាប់ទី៥ដោយសារវីរុសនេះនិង១២៣នាក់ទៀតឆ្លង។សរុប មនុស្ស៥៥៦នាក់បានឆ្លងCOVID-19នៅកូរ៉េខាងត្បូង ដោយកើនទ្វេចាប់ពីថ្ងៃសុក្រមកទល់ថ្ងៃសៅរ៍។

ករណីនៅអ៊ីតាលីក៏គួរឲ្យព្រួយបារម្ភ ដោយមនុស្ស៧៩នាក់បានឆ្លងវីរុសនេះគិតត្រឹមថ្ងៃសៅរ៍ក្នុងនោះ២នាក់ស្លាប់។ក្នុងពេលជាមួយគ្នា មានការឆ្លងថ្មី១០ករណីទៀតនៅអ៊ីរ៉ង់ ធ្វើឲ្យអ្នកឆ្លងសរុបនៅទីនោះកើនដល់២៩នាក់ និង៦នាក់បានស្លាប់។ អង្គការសុខភាពពិភពលោកកាលពីថ្ងៃសៅរ៍ បានសម្តែងការព្រួយបារម្ភអំពីការឆ្លងថ្មីដែលមិនមានការជាប់ពាក់ព័ន្ធច្បាស់លាស់ជាមួយចិន ដូចជាប្រវត្តិធ្វើដំណើរឬការទាក់ទងជាមួយអ្នកឆ្លង។ សូមបញ្ជាក់ថា ជាងពាក់កណ្តាលនៃករណីឆ្លងនៅកូរ៉េខាងត្បូង មានពាក់ព័ន្ធព្រះវិហារស៊ីនសេអ៊ុនជី នៅក្រុងដេហ្គូបន្ទាប់ពីស្ត្រីវ័យចំណាស់ម្នាក់ជាអ្នកជំងឺCOVID-19ទី៣១បានទៅធ្វើការបន់ស្រន់នៅព្រះវិហារនិងត្រូវធ្វើតេស្តឃើញCOVID-19កាលពីសប្តាហ៍មុន។ស្ត្រីនេះមិនមានប្រវត្តិធ្វើដំណើរចេញក្រៅប្រទេសទេក្នុងពេលថ្មីៗនេះ។

គួរឲ្យដឹងថា ជំងឺឬវីរុសCOVID-19នេះឥឡូវចម្លងមនុស្សជិត ៧៨ ០០០នាក់ទៅប្រទេសនិងទឹកដីប្រមាណ២៦។ អង្គការសុខភាពពិភពលោកដាក់ឈ្មោះវាថាជំងឺឬវីរុសCOVID-19 ដោយចង់សំដៅពេលវាកើតឡើងកាលពីចុងឆ្នាំ២០១៩ និងបង្កឡើងដោយកូរ៉ូណាវីរុស (coronavirus)។

ប្រភព ៖ rasmeinews