Samsung ចេញអាវុធខ្លាំងមួយ សម្រាប់ទប់ទល់ Xiaomi និង realme នៅឥណ្ឌា

2020-02-25 09:10:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាតហ្វូន Samsung ត្រកូល Galaxy M ដែលមានលក់ផ្ដាច់មុខតែនៅលើអនឡាញនៅឥណ្ឌានោះ បានបន្ថែមសមាជិកថ្មី គឺ Galaxy M31 ដែលជាអ្នកស្នងតំណែង Galaxy M30 ឆ្នាំមុន។

Galaxy M31 នេះគឺនឹងត្រូវប្រកួតប្រជែងនឹងស្មាតហ្វូនតម្លៃធូរដទៃទៀតដូចជា Poco X2, realme X2 និង Redmi Note 8 Pro សម្រាប់ល្បាក់តម្លៃប្រហែលគ្នា។

Samsung លើកយកចំណុចសំខាន់បី ជាធ្នាក់ទាក់ទាញអតិថិជនឲ្យមកប្រើ Galaxy M31។ ក្នុងនោះរួមមានប្រព័ន្ធកាមេរ៉ាខាងក្រោយ ៤ គ្រាប់ ដែលមានកាមេរ៉ាមេទំហំ ៦៤MP, ការប្រើប្រាស់អេក្រង់ AMOLED និងថ្មទំហំ ៦០០០ mAh។

ទូរសព្ទនេះមានអេក្រង់ទំហំ ៦,៤ អ៊ីញ អាចបង្ហាញរូបភាពក្នុងកម្រិត FHD+ ជាប្រភេទ Super AMOLED និងមានប្រើប្រាស់ការឌីហ្សាញ Infinity-U។ វាដំណើរការដោយបន្ទះឈីប Exynos 9611 គួបផ្សំនឹង RAM ទំហំ ៦GB ដែលមានជម្រើសអង្គផ្ទុក ៦៤ និង ១២៨GB ហើយអាចបន្ថែមដល់ ៥១២ GB ឯណោះ។

ចំពោះផ្នែកកាមេរ៉ាវិញ Galaxy M31 មានកាមេរ៉ាមេកម្រិត ៦៤MP, មានកាមេរ៉ាម៉ាក្រូកម្រិត ៥MP, កាមេរ៉ាវាស់ជម្រៅ ៥MP និងកាមេរ៉ា Ultra-Wide កម្រិត ៨MP។ កាមេរ៉ាខាងមុខគឺមានកម្រិត ៣២MP។ Samsung បានបន្ថែមមុខងារថតពេលយប់ Night Mode ដល់កាមេរ៉ា។ កាមេរ៉ាទាំងមុខទាំងក្រោយនេះក៏មានសមត្ថភាពថតវីដេអូកម្រិត 4K រួមទាំងវីដេអូ Super Slo-Mo និង Hyperlapse ផងដែរ។

Samsung អះអាងថាថ្មទំហំ ៦០០០ mAh អាចទ្រាំទ្រសម្រាប់ការប្រើប្រាស់បានដល់ ២ ថ្ងៃយ៉ាងងាយ។ ក្នុងនោះដែរអាចទ្រាំទ្រការប្រើអ៊ីនធឺណិតជាមួយ Wi-Fi បានដល់ ២១ ម៉ោង, អាចតេបាន ៤៨ ម៉ោង, ចាក់វីដេអូបាន ២៦ ម៉ោង និងចាក់ចម្រៀងបាន ១១៩ ម៉ោង។ វាក៏មានភ្ជាប់នូវឆ្នាំងសាក ១៥ វ៉ាត់ សម្រាប់សាកថ្មឲ្យឆាប់ពេញផងដែរ។

Galaxy M31 នៅឥណ្ឌាមានតម្លៃប្រមាណ ២០៨ ដុល្លារ សម្រាប់ប្រភេទ ៦៤GB និងតម្លៃប្រមាណ ២២២ ដុល្លារ សម្រាប់ប្រភេទ ១២៨GB ដែលមានលក់នៅលើ Amazon India ចាប់ពីថ្ងៃទី ៥ ខែមីនាតទៅ៕

ប្រភព៖ Androidauthority ប្រែសម្រួល៖ សុខហេង