គ្រូគុនល្បុក្កតោ ឆន ច័ន្ទវីរៈ ត្រៀមបញ្ចេញស្នាដៃសិល្បៈលើកដំបូង
- 2020-02-27 07:06:10
- ចំនួនមតិ 0 | ចំនួនចែករំលែក 0
គ្រូគុនល្បុក្កតោ ឆន ច័ន្ទវីរៈ ត្រៀមបញ្ចេញស្នាដៃសិល្បៈលើកដំបូង
ចន្លោះមិនឃើញ
ផលិតកម្មអាថាន់ភាពយន្ដ គ្រោងបញ្ចេញខ្សែភាពយន្ដខ្នាតធំលើកដំបូងរបស់ខ្លួននៅដើមឧសភា ឆ្នាំ២០២០ ដែលជាស្នាដៃនិពន្ធ និងដឹកនាំរឿងដោយផ្ទាល់ពីគ្រូគុនល្បុក្កតោក្មេងវត្ដថាន់ល្បីឈ្មោះម្នាក់ គឺលោកគ្រូ ឆន ច័ន្ទវីរៈ។
លោក ឆន ច័ន្ទវីរៈ បានផ្ដល់បទសម្ភាសន៍ខ្លីមួយដល់ Sabay ក្នុងពេលដែលលោកកំពុងដឹកនាំថតឈុតវាយតប់មួយនៅអតីតផ្សារទំនើបសុវណ្ណា កាលពីថ្មីៗនេះថា ក្បាច់គុនខ្មែរ របាំអប្សរា ស្នេហាជូរចត់ និងទំនៀមទម្លាប់ប្រពៃណីខ្មែរ នឹងបង្ហាញជូននៅក្នុងសាច់រឿង"មិត្ដក្របី" នេះ។ តួភាគច្រើនជាគ្រូក្បាច់គុន អ្នកប្រដាល់ល្បីៗ និងមានអ្នកចូលរួមសម្ដែងសរុប២៥០នាក់ផ្សេងទៀត។
លោក ច័ន្ទវីរៈ៖"ខ្ញុំមិនមែនជាកវីអីទេ…! តែដោយខ្ញុំស្រឡាញ់ក្បាច់គុនល្បុក្កតោខ្មែរ និងភាពយន្ដខ្មែរ ទើបខ្ញុំសម្រេចផលិតរឿងនេះឡើង ក្នុងគោលបំណងសំខាន់ចង់ច្របាច់ឲ្យក្បាច់គុនទៅជាទម្រង់សិល្បៈ និងអប់រំមនុស្សក្នុងសង្គមយើងផង"។
លោក ឆន ច័ន្ទវីរៈ បញ្ជាក់ថា រូបលោកជាអ្នកគ្រប់គ្រងនៅក្នុងផលិតកម្មអាថាន់ភាពយន្ដ ហើយលោកបានចំណាយថវិកាផ្ទាល់ខ្លួន និងមានលើកទឹកចិត្ដជាមួយបច្ច័យខ្លះពីព្រះចៅអធិការវត្ដថាន់ រាជធានីភ្នំពេញ។ រយៈពេលជិត៥ខែ ដែលលោកបានថតរឿងនេះ បានចំណាយថវិកាច្រើន តែសង្ឃឹមថាមិនយូរទៀតទេរឿងនេះនឹងត្រូវថតបញ្ចប់ ហើយបានបញ្ចាំងនៅខែឧសភា។
រឿង"មិត្ដក្របី" ថតបានប្រមាណ៧០%ហើយ ដោយរឿងនេះ ត្រូវបានអ្នកនិពន្ធកំណត់យករយៈពេល១ម៉ោង និង៤៥នាទី៕