ហ៊ុល គឹមហ៊ុយ សប្បាយចិត្តពេលជាប់ Man of the Match
- 2020-03-02 08:55:29
- ចំនួនមតិ 0 | ចំនួនចែករំលែក 0
ហ៊ុល គឹមហ៊ុយ សប្បាយចិត្តពេលជាប់ Man of the Match
ចន្លោះមិនឃើញ
អ្នកចាំទីដៃទី១របស់ក្លឹបបាល់ទាត់បឹងកេត ហ៊ុល គឹមហ៊ុយ បានសម្ដែងក្ដីរីករាយ ក្រោយរូបគេត្រូវបានជ្រើសជាកីឡាករល្អ Man of the Match ក្នុងជំនួបតទល់ជាមួយណាហ្គាវើលដ៍ កាលពីថ្ងៃសៅរ៍សប្ដាហ៍មុន។
នៅកីឡាដ្ឋានខេមបូឌាអ៊ែវេ ក្រោមក្រសែភ្នែកទស្សនិកជន១,៧៤៨នាក់ គឹមហ៊ុយ ពិតជាធ្វើបានល្អ ដោយរូបគេបានសង្គ្រោះបាល់គ្រោះថ្នាក់ជាច្រើន ចេញពីជើងរបស់ក្រុមកីឡាករណាហ្គាវើលដ៍ ជាពិសេសនៅតង់ទី២។
អ្នកចាំទីជម្រើសជាតិកម្ពុជាបានបន្តថា ៖«ខ្ញុំសប្បាយចិត្ត ទោះលទ្ធផលយើង១ស្មើក៏ដោយ តែខ្ញុំបានសង្គ្រោះបាល់បានច្រើន ខ្ញុំសប្បាយចិត្តមែនទែន»។
មិនតែប៉ុណ្ណោះកូនក្រុមរបស់លោក លោក Apisit Im-Amphai ក៏បង្ហាញចិត្តត្រេកអរ ក្រោយជាប់ជម្រើស១១នាក់ដំបូង ៣សប្ដាហ៍ជាប់គ្នា ដែលនេះស្ដែងចេញពីការខំប្រឹងប្រែងរបស់រូបគេ និងការជឿជាក់របស់គ្រូបង្វឹក។
«ចំពោះសមត្ថភាពវិញ ខ្ញុំយល់ថាមានការកើនកើនឡើងខ្ពស់ ដោយសារបានលេងជាមួយក្រុមធំៗ។ នៅពេលយើងជាប់ជម្រើស១១នាក់អ៊ីចឹង យើងមានទឹកចិត្តហ្វឹកហាត់ខ្លាំង ដើម្បីកុំឱ្យលេងទៅអត់កើត។ ដឹងស្រាប់ហើយរដូវកាលមុន ខ្ញុំអត់សូវបានលេង អ៊ីចឹងមករដូវកាលថ្មី ខ្ញុំត្រូវយកចិត្តទុកដាក់ខ្លាំង ដើម្បីឱ្យគ្រូពេញចិត្ត និងលេងបានល្អ»។ នេះជាការលើកឡើងរបស់ ហ៊ុល គឹមហ៊ុយ ក្រោយចប់ការប្រកួត។
ហ៊ុល គឹមហ៊ុយ បានឱ្យដឹងទៀតថា ការប្រកួតធ្វើឱ្យរូបគេពេញចិត្តខ្លាំងបំផុតនោះគឺ ជំនួបរវាងបឹងកេត និងក្រុមខ្លាំងវិសាខា។ គ្រានោះគឹមហ៊ុយ មិនបានធ្វើឱ្យរបូតគ្រាប់បាល់ឡើយ (Clean sheet)៕