ក្នុងទិវាវប្បធម៌ជាតិលើកទី២២ សម្ដេចតេជោ ហ៊ុន សែន ស្នើសិល្បករកុំឲ្យជេរគ្នាតាមហ្វេសប៊ុក

2020-03-04 04:11:15
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់សិល្បករ-សិល្បការិនី កុំឲ្យប្រើហ្វេសប៊ុកធ្វើជាវេទិកាជេរគ្នា និយាយបញ្ឆិតបញ្ឆៀងដាក់គ្នា ឬបញ្ចេញកេរ្តិ៍ខ្មាសដែលនាំឲ្យបាត់តម្លៃខ្លួនឯង និងវប្បធម៌ដ៏ល្អផូរផង់របស់ជាតិខ្មែរទាំងមូល។

សារអំពាវនាវនេះ ធ្វើឡើងក្នុងឱកាសដែលសម្ដេចអញ្ជើញចូលរួមជាគណៈអធិបតី នៃទិវាវប្បធម៌ជាតិលើកទី២២ កាលពីយប់ថ្ងៃទី៣ ខែមីនា។

សម្ដេចបញ្ជាក់ថា សម្ដេចពុំមានសិទ្ធិទៅហាមឃាត់រឿងតារាៗឡាយហ្វេសប៊ុកឡើយ ប៉ុន្តែគ្រាន់តែសូមអង្វរករដល់សិល្បករ-សិល្បការិនីគ្រប់ទម្រង់ និងកូនក្មួយ កុំអាងអី ឡើងទៅឡាយហ្វេសប៊ុក។ សម្ដេចថា គ្រប់គ្នាគួរងាកមកនិយាយគ្នាតាមទូរស័ព្ទ ឬនិយាយគ្នាដោយផ្ទាល់វិញ នៅពេលមានបញ្ហាអ្វីមួយ ដើម្បីរក្សានូវតម្លៃខ្លួនដែលមហាជនខំជឿទុកចិត្ត និងឲ្យតម្លៃខ្ពស់។

រូបភាព៖ ទំព័រហ្វេសប៊ុក សម្ដេចតេជោ

សម្ដេចតេជោ ហ៊ុន សែន មានប្រសាសន៍បន្ថែមថា សិល្បករ-សិល្បការិនី គឺជាធនធានមនុស្សដ៏មានឥទ្ធិពលក្នុងការសាបព្រោះអំពើល្អ និងអប់រំផ្សព្វផ្សាយតាមរយៈសកម្មភាពរបស់ខ្លួនទាំងនៅលើឆាក និងតាមបណ្ដាញផ្សព្វផ្សាយព៌ត៌មាន ដល់ក្រុមគ្រួសារ និងសង្គមជាតិ៕

អត្ថបទ៖ ជិន សុភ័ក្រ្ត