វៀតណាមផ្សាយមេរៀនតាមទូរទស្សន៍ សម្រាប់សិស្សទី៩-១២ ក្រោយសាលាបិទទ្វារខ្លាចឆ្លងវីរុស
- 2020-03-10 03:34:17
- ចំនួនមតិ 0 | ចំនួនចែករំលែក 0
វៀតណាមផ្សាយមេរៀនតាមទូរទស្សន៍ សម្រាប់សិស្សទី៩-១២ ក្រោយសាលាបិទទ្វារខ្លាចឆ្លងវីរុស
ចន្លោះមិនឃើញ
សិស្សានុសិស្សវៀតណាមទាំងអស់ដែលកំពុងរៀននៅថ្នាក់ទី ៩ និងទី ១២ នឹងអាចបន្ដការសិក្សារបស់ខ្លួនបានតាមរយៈមេរៀនដែលចេញផ្សាយតាមប៉ុស្តិ៍ទូរទស្សន៍ ក្រោយសាលារៀនបិទទ្វារបណ្ដោះអាសន្នដោយសារខ្លាចការឆ្លងវីរុសកូរ៉ូណា។
យោងតាមប្រធានមន្ទីរអប់រំនិងបណ្តុះបណ្តាលក្រុងលោក Chử Xuân Dũng បានមានប្រសាសន៍ថាមេរៀនដំបូងគឺមាននៅលើកញ្ចក់ទូរទស្សន៍ថ្ងៃនេះព្រោះថាសាលារៀនទាំងអស់នៅក្នុងទីក្រុងនឹងត្រូវបិទទ្វាររហូតដល់ថ្ងៃទី ១៥ ខែមីនា នេះតាមសេចក្តីសំរេចរបស់គណៈកម្មាធិការប្រជាជនក្រុង។ មេរៀនសម្រាប់មុខវិជ្ជាសំខាន់ៗនឹងត្រូវបានចាក់ផ្សាយនៅហាណូយ ដូច្នេះសិស្សដែលនឹងប្រលងបញ្ចប់ថ្នាក់អនុវិទ្យាល័យ និងវិទ្យាល័យនៅប៉ុន្មានខែខាងមុខនេះ នឹងមិនខកខានការសិក្សារបស់ខ្លួនដើម្បីត្រៀមប្រឡងនោះទេ។ យោងតាមគ្រោងការណ៍បង្រៀនតាមទូរទស្សន៍ដែលប្រកាសដោយមន្ទីរអប់រំក្រុង និងទូរទស្សន៍ហាណូយ ឲ្យដឹងថាមេរៀននឹងមានចាក់បញ្ចាំងនៅលើប៉ុស្តិ៍លេខ ១ ជារៀងរាល់ថ្ងៃ។
គណិតវិទ្យា, អក្សរសាស្ត្រ និងមេរៀនភាសាអង់គ្លេសសម្រាប់សិស្សថ្នាក់ទី ៩ នឹងចាក់ផ្សាយនៅម៉ោង ៩:១៥ នាទីរៀងរាល់ព្រឹកពីថ្ងៃច័ន្ទដល់ថ្ងៃសៅរ៍។ សម្រាប់សិស្សថ្នាក់ទី ១២ អាចមើលមេរៀនគណិតវិទ្យា, អក្សរសាស្ត្រអង់គ្លេស, រូបវិទ្យា, គីមីវិទ្យា, ជីវវិទ្យា, ប្រវត្តិវិទ្យា, ភូមិវិទ្យា, និងពលរដ្ឋវិជ្ជា នៅម៉ោង ១:១៥រសៀល, ម៉ោង ២:៣០រសៀល និង៤រសៀលចាប់ពីថ្ងៃច័ន្ទដល់ថ្ងៃសៅរ៍។ មេរៀននីមួយៗមានថិរវេលា ៣០ នាទីហើយបង្រៀនដោយគ្រូមានបទពិសោធន៍ខ្ពស់។
គួរឲ្យដឹងថា បើគិតមកត្រឹមដើមសប្ដាហ៍នេះ ចំនួនអ្នកឆ្លងជំងឺថ្មី Covid-19 ក្នុងប្រទេសវៀតណាម បានឡើងដល់ ៣០ករណីហើយ ខណៈដែល ១៦នាក់ត្រូវបានព្យាបាលជាសះស្បើយ និងអនុញ្ញាតឲ្យត្រឡប់ទៅផ្ទះវិញ៕