ម៉េចបាន...ចាន់ នីកា ដល់អាយុច្រើនទើបគិតគូររឿងប្ដីសី?

2020-03-10 08:33:05
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាពិធីការិនី អ្នកនាង ចាន់ នីកា ប្រកាសថានឹងគិតគូររឿងប្ដីសីនៅអាយុ៣០ឆ្នាំ ស្របពេលដែលអ្នកនាងមិនទាន់មើលឃើញបុរសណាម្នាក់ក្នុងចំណោមបុរសជាច្រើននាក់ដែលកំពុងចាប់ចិត្ដលើនាង ដោយលក្ខណៈសម្បត្តិបុរសទាំងនោះមិនទាន់ត្រូវចិត្ដរបស់នាង។

បច្ចុប្បន្ន នីកា មានវ័យ២៥ឆ្នាំហើយ ហើយនាងធ្លាប់ជួបស្នេហាបែកបាក់ជាមួយអតីតសិស្សវិទ្យាល័យដូចគ្នាកាលពី៧ឆ្នាំមុន។ ទំនាក់ទំនងស្នេហារបស់នាងកាលណោះមានលក្ខណៈស៊ីជម្រៅរហូតដល់ចង់ទិញឡាន និងផ្ទះបង់រំលស់រស់នៅជាមួយគ្នាមុនពេលចូលរោងការ ក្រាបផ្ទឹមទៀតផង ទើបធ្វើឲ្យនាងរាងចាលនឹងពាក្យស្នេហា ហើយខ្លាចរអាចំពោះបុរសដែលសុំស្រឡាញ់នាងហើយ បែរជាដោះដៃចោលវិញ។

ទោះជាយ៉ាងណា នីកា បានបញ្ចេញសារទាក់ទងនឹងរឿងស្នេហាជាថ្មីកាលពីថ្ងៃទី៩ ខែកុម្ភៈ ហាក់បង្ហាញពីការជ្រះស្រឡះពីអតីតសិស្សរួមសាលា និងរួមស្នេហាម្នាក់នោះទៀតហើយ ហើយចង់បានគូរស្រករ ឬអ្នកយល់ចិត្ដថ្មីដែលមានលក្ខណៈសម្បត្តិល្អ។

ប៉ុន្តែនៅក្នុងសារនោះបានបញ្ជាក់ថា ៥ឆ្នាំទៀតបាននាងយកប្ដី។ ចំពោះសំណួរថា ហេតុអ្វីបានជាដល់អាយុច្រើនហើយទើបគិតគូររឿងរៀបការ? អ្នកនាងបានឆ្លើយតបសំណួររបស់ Sabay យ៉ាងខ្លីថា រង់ចាំឲ្យអាជីពសិល្បៈរឹងមាំសិន ហើយមានពេលច្រើនដើម្បីមើលចិត្ដបុរសៗ។

ចាន់ នីកា៖" អនាគតស្វាមីខ្ញុំ មិនសុំច្រើនទេ។ មិនត្រូវការភាពហ៊ឺហា អាយុច្រើនជាងខ្ញុំ មានសន្ដានចិត្តល្អជាមួយអ្នកនៅជុំវិញខ្លួន ម៉ត់ចត់ ម៉ឺងម៉ាត់ តែទន់ភ្លន់ជាមួយមនុស្សស្រី ចេះទូន្មានខ្ញុំ ចង់ឲ្យខ្ញុំល្អ ចេះប្រចណ្ឌតិចៗ ស្រឡាញ់ខ្ញុំ និងគ្រួសារខ្ញុំ"។

រូបភាព៖ ហ្វេសប៊ុក ចាន់ នីកា

អ្នកនាង ចាន់ នីកា មានប្រវត្តិតស៊ូក្នុងអាជីពជាពិធីការិនីនៅទូរទស្សន៍ Fresh News និងធ្វើជាពិធីការិនីនៅតាមកម្មវិធីផ្សេងៗ ព្រមទាំងសម្ដែងភាពយន្ត និងបទចម្រៀងឲ្យផលិតកម្មក្នុងស្រុកមួយចំនួនអស់ពេលជិត២ឆ្នាំ។ នីកា ត្រូវបានទស្សនិកជនស្គាល់ច្រើនតាមរយៈសម្ដែងជាតួឯកស្រីក្នុងចម្រៀងមួយបទមានចំណងជើងថា"ហេតុអីកុហកបងថាគ្មានសង្សាររបស់ផលិតកម្មសាន់ដេរ ដែលច្រៀងដោយនាយចឺម"៕

អត្ថបទ៖ ជិន សុភ័ក្រ្ត