សិស្សវិទ្យាល័យឈ្នះរង្វាន់ពាន់ដុល្លារពីការប្រកួតផលិតវីដេអូ ក្នុងកម្មវិធីអក្ខរកម្មឌីជីថល-សុវត្ថិភាពអ៊ីនធឺណិត
- 2020-03-12 02:07:21
- ចំនួនមតិ 0 | ចំនួនចែករំលែក 0
សិស្សវិទ្យាល័យឈ្នះរង្វាន់ពាន់ដុល្លារពីការប្រកួតផលិតវីដេអូ ក្នុងកម្មវិធីអក្ខរកម្មឌីជីថល-សុវត្ថិភាពអ៊ីនធឺណិត
ចន្លោះមិនឃើញ
កាលពីថ្ងៃទី ១១ ខែមីនា ឆ្នាំ ២០២០ ក្រុមហ៊ុន Smart Axiata បានប្រកាសជ័យលាភីឈ្នះរង្វាន់កម្មវិធីប្រកួតប្រជែង ពីការផលិតវីដេអូលើបណ្ដាញអ៉ីនធឺណិត ដែលបង្កើតឡើងដើម្បីបង្កឱកាសឱ្យកូនខ្មែរវ័យក្មេង មានភាពក្លាហាន និងទទួលបានចំណេះដឹងផ្សេងៗពីផ្នែកឌីជីថល។
ក្នុងឱកាសបិទកម្មវិធីខាងលើនេះ មានការចូលរួមក្រោមអធិបតីភាព ឯកឧត្ដម ត្រាំ អ៉ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងឯកឧត្ដមបណ្ឌិត្យសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។
មានក្រុមសិស្សចំនួន ៣ក្រុម រួមមាន ក្រុម "កុំជឿ", ក្រុម "ដាក់លេខសំងាត់ទូរស័ព្ទឲ្យស្មុគស្មាញ " ,ក្រុម "១០០០០ ដុល្លារប្រហារម្ដាយខ្ញុំ" , ដែលមកពីវិទ្យាល័យតេជោហ៊ុនសែនបឹងកុក ,និងវិទ្យាល័យហ៊ុនសែនប៊ុនរ៉ានី, រលាប្អៀរ ,ទទួលបានប្រាក់ឧបត្ថម្ភក្នុងមួយក្រុមៗ ចំនួន ១០០០ ដុល្លារ ,ហើយវិទ្យាល័យទាំងពីរនេះបានទទួលប្រាក់ឧបត្ថម្ភជាសម្ភារៈសិក្សាចំនួន ៣៧៥០ ដុល្លារផងដែរ។
ការប្រកួតនេះបានចាប់ផ្តើមតាំងពីខែវិច្ឆកា ២០១៩ នៅរាជធានីភ្នំពេញ ខេត្តកំពុងចាម និងខេត្តកំពង់ឆ្នាំង ផ្ដល់សមិទ្ធផលជាចំណេះដឹងដល់សិស្សថ្នាក់ទី ១០ និង ១១ មានចំនួនប្រមាណ ១៥០០នាក់ និងគ្រូបង្រៀនជាច្រើនតាមរយៈសិក្ខាសាលានីមួយៗ ហើយយុទ្ធនាការនេះដែរមានអ្នកចូលមើលរហូតដល់ទៅ ១៩៣ ៣០០ដង។
សាលារៀនចំនូន ៣ កន្លែងក្នុងខេត្តនីមួយៗ បានចូលរួមវគ្គបណ្ដុះបណ្ដាលនេះ ដែលដឹកនាំដោយអតីតនិស្សិតមកពីកម្មវិធី SmartEdu។ ការសិក្សានោះបានយកគំរូ និងសម្រង់ពីក្រុមហ៊ុន Google និងសៀវភៅបណ្ដុះបណ្ដាលជំនាញអ៉ីនធឺណិតចល័តរបស់ក្រុមហ៊ុន GSMA។
សិស្សានុសិស្សទាំងនោះបាន រៀនពីរបៀបផលិតវីដេអូកម្សាន្ត ឲ្យមានភាពទាក់ទាញ ដោយប្រើ ទូរស័ព្ទស្មាតហ្វូន។ បន្ទាប់ពីផលិតវីដេអូរួច មានវីដេអូចំនួន ១១ត្រូវបានសម្រាំងយកមក ចែករំលែកលើគេហទំព័រហ្វេសបុករបស់ Smart for Cambodia ដើម្បីឲ្យសាធារណជនបោះឆ្នោត។
កម្មវិធីនេះទទួលបានប្រាក់គាំទ្រពីវិភាគទានរបស់ក្រុមហ៊ុន Smart Axiata ក្នុងមូលនិធិសាងសមត្ថភាព អភិវឌ្ឍន៍ និងស្រាវជ្រាវរបស់រាជរដ្ឋាភិបាលកម្ពុជា ដោយមានការគាំទ្រពី ក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍ ក្រុមហ៊ុន Google និងក្រុមហ៊ុន GSMA។
សម្រាប់ព័ត៌មានបន្ថែម និងព័ត៌មានថ្មីៗអំពី កម្មវិធី និរន្តរភាព និងកម្មវិធីទំនួលខុសត្រូវសង្គមរបស់ក្រុមហ៊ុន Smart សូមចូលទៅកាន់គេហទំព័រហ្វេសបុក Smart for Cambodia ឬចូលទៅកាន់គេហទំព័រ https://www.smartedu.com.kh៕