មុនជួបគ្នាកម្មវិធីខ្សែក្រវាត់ ឪពុក សេរីវណ្ណថង សរសើរ ទួនប៉េ ជាកីឡាករខ្ញីចាស់

2020-03-12 02:41:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ឪពុករបស់ ឈិត សេរីវណ្ណថង សរសើរមិនដាច់ពីមាត់អំពីសមត្ថភាពដ៏ល្អរបស់កីឡាករខ្លាចាស់ ទួនប៉េ មុនការប្រកួតមកដល់រវាងកូនប្រុសរបស់លោក និងអ្នកលេងគុនថៃរូបនេះដើម្បីដណ្ដើមកៅអីជាបន្តកម្មវិធីខ្សែក្រវាត់របស់សង្វៀន CNC ។

ទួនប៉េ ពេលឈ្នះកីឡាករកន្លងទៅ

កីឡាករ ឈិត សេរីវណ្ណថង នឹងត្រូវប៉ះខ្លាចាស់ ទួនប៉េ នៅព្រឹកថ្ងៃសៅរ៍សប្ដាហ៍នេះហើយលើសង្វៀន CNC ក្នុងកម្មវិធីជម្រុះវគ្គទី២ ដើម្បីមានឱកាសទៅវគ្គផ្ដាច់ព្រ័ត្រ ។ ចំណែកការប្រកួតជម្រុះ១គូទៀតនោះគឺ ឡុង ជិន ប៉ះកីឡាករថៃ ដើម្បីរកអ្នកឈ្នះឡើងទៅផ្ដាច់ព្រ័ត្រវគ្គទី២ នេះ ដូចគ្នា។

លោក ឈុត សេរី ឪពុករបស់ សេរីវណ្ណថង បានឲ្យដឹងថា បើនិយាយពីសមត្ថភាពរបស់ ទួនប៉េ វិញគឺល្អគ្រប់ទាំងអស់ ជាកីឡាករចាស់វស្សាមែនប៉ុន្តែក្បាច់ស្នៀតវិញនៅតែល្អ។ មួយវិញទៀតនោះអ្នកលេងគុនថៃរូបនេះគឺល្អដើរបុក ដូច្នេះបើកីឡាករដែលមានកម្លាំងខ្សោយជាងគឺយ៉ាប់របស់ខ្ញីចាស់ម្នាក់នេះហើយ។

លោក ឈុត សេរី

ចំពោះការហ្វឹកហាត់របស់កូនប្រុសលោកវិញ គ្រូប្រចាំក្លឹបរាហ៊ូកីឡាខេត្តបាត់ដំបងខាងលើនេះបញ្ជាក់ថា បានហាត់យូរដែរហើយ ប៉ុន្តែមិនបានពេញលេញដូចមុននោះទេ ដោយសារតែជាប់រៀននៅសកលវិទ្យាល័យ។ សម្រាប់ការប្រកួតលើកនេះ ឪពុករបស់ វណ្ណថង សង្ឃឹមត្រឹមឈ្នះ ៥០% ។

រំលឹកដែរថា សម្រាប់ការជម្រុះវគ្គទី២ នៃកម្មវិធីកម្ពុជាជើងឯកសង្វៀនគុនខ្មែរនេះគឺមានខ្មែរ២រូប ថៃ២រូប ត្រូវប្រកួតនាព្រឹកថ្ងៃសៅរ៍ ទី១៤ ខែមីនា ២០២០។ ឈិត សេរីវណ្ណថង ប៉ះ ទួនប៉េ និង ឡុង ជិន ប៉ះ បាប់ផៃរី អ្នកដែលឈ្នះបានឡើងទៅវគ្គផ្ដាច់ព្រ័ត្របន្តទៀតដើម្បីក្លាយជាជើងឯកវគ្គ២ រួចបានឡើងទៅវគ្គដណ្ដើមខ្សែក្រវាត់ជាមួយ ធន់ មករា ដែលជាជើងឯកប្រចាំវគ្គមុន៕