ជួយអបអរ! គ្រូបង្វឹកក្រុមកាំភ្លើងធំ Arteta ជាសះស្បើយពីជំងឺកូរ៉ូណាហើយ

2020-03-24 02:57:14
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹករបស់ក្លឹបកាំភ្លើងធំ Aesenal លោក Mikel Arteta បានជាសះស្បើយទាំងស្រុងពីជំងឺកូរ៉ូណាហើយ ក្រោយពីសម្រាកព្យាបាលដាច់ដោយឡែកមួយរយៈមក។

និយាយទៅកាន់ទូរទស្សន៍អេស្ប៉ាញ La Sexta គ្រូបង្វឹកវ័យ៣៧ឆ្នាំ បញ្ជាក់ថា ៖«ខ្ញុំមានសុខភាពល្អហើយឥឡូវនេះ។ ខ្ញុំមានអារម្មណ៍ថា ខ្ញុំបានជាសះស្បើយហើយ»។

លោក Arteta ធ្វើតេស្តរកឃើញមានផ្ទុកកូរ៉ូណាកាលពីថ្ងៃទី ១២ មីនា ឆ្នាំ២០២០ ហើយបានក្លាយជាគ្រូបង្វឹកនៅ Premier League ដំបូងបង្អស់ដែលបានឆ្លងវីរុសនេះ។

កីឡាកររបស់ក្រុមកាំភ្លើងធំគ្រោងនឹងធ្វើការហ្វឹកហាត់វិញ នៅថ្ងៃអង្គារនេះ បន្ទាប់ពីបញ្ចប់ការដាក់ដាច់ដោយឡែករយៈពេល ១៤ ថ្ងៃ ក្រោយការធ្វើរោគវិនិច្ឆ័យរបស់គ្រូបង្វឹក Arteta វិជ្ជមានវីរុសកូរ៉ូណា ប៉ុន្តែការហ្វឹកហាត់ត្រូវបានពន្យារពេលជាថ្មី។

កីឡាកររបស់ Arsenal មួយចំនួនត្រូវបានដាក់ដាច់ដោយឡែកម្នាក់ឯង ក្រោយប្រធានក្លឹប Olympiacos F.C. លោក Marinakis ត្រូវបានធ្វើតេស្តរកឃើញវីរុសនេះ។

បើតាមការឱ្យដឹងរបស់លោកគ្រូបង្វឹក Arteta ក្រោយការប្រកួតរវាងក្លឹបកាំភ្លើងធំនិង Manchester City នៅកីឡដ្ឋាន Etihad Stadium កាលពីថ្ងៃទី ១១ ខែមីនាកន្លងទៅ គឺមានកីឡាករ Arsenal មួយចំនួនធំ បានប្រាស្រ័យទាក់ទងគ្នាជាមួយលោក Marinakis៕

ប្រភព៖ BBC ប្រែសម្រួល៖ អ៊ុំ សុភក្តិ