Samsung សម្រេចឈប់ផលិតអេក្រង់ LCD ដែល Apple និយមប្រើត្រឹមចុងឆ្នាំ ២០២០

2020-03-31 06:41:10
ចំនួនមតិ 0 | ចំនួនចែករំលែក 0

ចន្លោះមិនឃើញ

Samsung Display ក្រុមហ៊ុនផលិតបន្ទះអេក្រង់របស់កូរ៉េខាងត្បូងដែលជាផ្នែកមួយរបស់ Samsung Electronics បានសម្រេចចិត្តបញ្ចប់ការផលិតបន្ទះអេក្រង់ LCD នៅកូរ៉េ និងនៅចិន នៅត្រឹមដំណាច់ឆ្នាំ ២០២០ នេះ។

កាលពីខែតុលាឆ្នាំកន្លងទៅ Samsung Display បានឲ្យដឹងថាខ្លួនបានផ្អាកសង្វាក់ផលិតកម្មនៃអេក្រង់ LCD នៅក្នុងទឹកដីកំណើតរបស់ខ្លួន ដោយសារតម្រូវការសម្រាប់អេក្រង់ LCD មានការថយចុះ។ ក្នុងសេចក្ដីថ្លែងការណ៍ Samsung Display បាននិយាយថា ៖ "យើងនឹងផ្គត់ផ្គង់ការកុម្ម៉ង់នៃអេក្រង់ LCD ជូនដល់អតិថិជននៅត្រឹមដំណាច់ឆ្នាំនេះ ដោយមិនមានបញ្ហា។”

កន្លងមក Samsung Display បានផលិតអេក្រង់ LCD សម្រាប់ផលិតផលដូចជា iPhone, iPad និង Mac ផងដែរ ប៉ុន្តែតម្រូវការមានការធ្លាក់ចុះដោយសារ Apple និងក្រុមហ៊ុនផលិតស្មាតហ្វូនដទៃងាកទៅប្រើអេក្រង់ OLED វិញ។

យ៉ាងណាក្ដីអេក្រង់ OLED នេះក៏ Samsung Display ជាអ្នកផ្គត់ផ្គង់ដែរ ដោយអាចទទួលបានចំនួនកុម្ម៉ង់ទិញយ៉ាងធំពី Apple សម្រាប់ iPhone តម្លៃថ្លៃ និង Apple Watch ហើយ LG ទទួលបានមួយចំណែកដែរពី Apple។ តាមការចុះផ្សាយកន្លងមកនៅឆ្នាំ ២០២០ ឬ ២០២១ ក្រុមហ៊ុន BOE អាចនឹងក្លាយជាអ្នកផ្គត់ផ្គង់អេក្រង់ OLED ម្នាក់ដែរឲ្យ Apple៕

ប្រភព៖ Reuters | AppleInsider ប្រែសម្រួល៖ សុខហេង