យុវជន ៥ រូបនៅលីគអេស្ប៉ាញ ដែលក្លឹបធំៗនៅ Premier League ចាប់អារម្មណ៍

2020-04-07 04:18:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញ Sabay បានបង្ហាញប្រិយមិត្តនូវកីឡាករបាល់ទាត់វ័យក្មេង កំពុងលេងនៅលីគបារាំង ដែលក្លឹបធំៗនៅអង់គ្លេស អាចប្រជែងគ្នាទិញ ប៉ុន្តែថ្ងៃនេះសូមលោកអ្នក មកមើលកីឡាករទាំង៥នៅលីគអេស្ប៉ាញវិញម្ដង ដែលក្លឹបនៅ Premier league ចាប់អារម្មណ៍ចង់បានដូចគ្នា។ តើពួកគេជានរណា? មកពីក្លឹបណាខ្លះ?

១- ខ្សែប្រយុទ្ធស្លាប MIKEL OYARZABAL របស់ Real Sociedad

Sociedad ជាក្រុមមួយសំបូរដោយកីឡាករវ័យក្មេងក្នុងលីគកំពូលអេស្ប៉ាញ La Liga នាពេលបច្ចុប្បន្ន ហើយ MIKEL Oyarzabal វ័យ២២ឆ្នាំ ជាកីឡាករដ៏គួរឱ្យចាប់អារម្មណ៍ម្នាក់។

លោក David Moye បានឱ្យគេសម្រាកអស់ពេលយ៉ាងយូរ និងដល់ពេលដែលលោកត្រូវយកគេមកប្រើហើយ។ ក្នុងរដូវកាល២០១៩-២០២០ OYARZABAL បង្ហាញខ្លួនបាន ២៦ប្រកួត រកបាន ៨ គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ៦លើក។

តាមសារព័ត៌មាន The Sun កីឡាករសញ្ជាតិអេស្ប៉ាញរូបនេះ ត្រូវបានក្លឹបមេឃខៀវ Manchester City ចាប់អារម្មណ៍។

២- ខ្សែបម្រើកណ្ដាល OSCAR RODRIGUEZ របស់ក្លឹប Leganes

កីឡាករ Rodriguez វ័យ២១ឆ្នាំ ត្រូវបាន Leganes ខ្ចីជើងពី Real Madrid ចាប់តាំងពីឆ្នាំ ២០០៨ មក ប៉ុន្តែអនាគតរបស់គេនាពេលនេះល្អប្រើសើរណាស់។ រូបគេបង្ហាញខ្លួនបាន ២៦ប្រកួត រកបាន ៧គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ២លើក។

៣- ខ្សែប្រយុទ្ធស្លាប FERRAN TORRES របស់ Valencia

ក្រៅពីចចាមអារ៉ាមមានតម្លៃខ្លួនផ្ដាច់កុងត្រា ៩១លានផោន ខ្សែប្រយុទ្ធស្លាប FERRAN TORRES របស់ Valencia វ័យ២០ឆ្នាំ ក៏មិនខ្វះអ្នកចែចូវ ហើយក្នុងនោះក៏មាន Liverpool ដែរ។ រូបគេនឹងផុតកុងត្រា ១ឆ្នាំទៀត ដូច្នេះ Valencia អាចនឹងលក់រូបគេចេញ។

កីឡាករអេស្ប៉ាញ TORRES ក្នុងរដូវកាល ២០១៩-២០២០ បង្ហាញខ្លួនបាន ២៥ប្រកួត រកបាន ៤គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ៤លើក។

៤- ខ្សែបម្រើកណ្ដាល MARTIN ODEGAARD របស់ Real Sociedad

កីឡាករសញ្ជាតិន័រវេស MARTIN ODEGAARD ជាទ្រព្យដ៏សំខាន់បំផុតរបស់ទ្វីបអឺរ៉ុប។ រូបគេបានចូលលេងឱ្យ Real Madrid ក្នុងតម្លៃខ្លួន ២,៥លានផោន នៅអាយុ១៦ឆ្នាំ ប៉ុន្តែបង្ហាញខ្លួនបានមួយប្រកួតប៉ុណ្ណោះឱ្យពួកគេ។ បច្ចុប្បន្នកីឡាករវ័យ ២១ឆ្នាំ លេងឱ្យ Sociedad ក្នុងលក្ខខណ្ឌខ្ចីជើង ជាកូនសោរសំខាន់មួយរបស់លោក Imanol Alguacil។

ODEGAARD ក្នុងរដូវកាល ២០១៩-២០២០ បង្ហាញខ្លួនបាន ២៣ប្រកួត រកបាន ៤គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ៥លើក។

៥- ខ្សែការពារឆ្វេង MARC CUCURELLA របស់ Getafe

បន្ទាប់ពីចុះកុងត្រាអចិន្ត្រៃយ៍ពីក្លឹប Barcelona ហើយបានចំណាយពេលនៅ Getafe ពាក់កណ្ដាលរដូវកាល ពេលនេះ MARC CUCURELLA អាចផ្ទេរទៅកាន់ក្លឹបថ្មីជាថ្មីម្ដងទៀតក្នុងតម្លៃផ្ដាច់កុងត្រា ២៣លានផោន។

កីឡាករវ័យ ២១ឆ្នាំ ដែលអាចលេងស្លាបបាននេះ កំពុងមានក្លឹបជាច្រើនចាប់អារម្មណ៍ ពោលគឺ Tottenham, Arsenal, Leverkusen និង Borussia Monchengladbach។

ក្នុងរដូវកាល ២០១៩-២០២០ MARC CUCURELLA បង្ហាញខ្លួនបាន ២៦ប្រកួត រកបាន ១គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ៤លើក៕

ប្រភព៖ The Sun ប្រែសម្រួល៖ អ៊ុំ សុភក្តិ