Huawei បរិច្ចាគប្រព័ន្ធសន្និសីទវីដេអូ Cloudlink ជូនដល់ក្រសួងសុខាភិបាលកម្ពុជាក្នុងការបង្ការនិងទប់ស្កាត់ជំងឺកូវីដ១៩
- 2020-04-08 02:20:20
- ចំនួនមតិ 0 | ចំនួនចែករំលែក 0
Huawei បរិច្ចាគប្រព័ន្ធសន្និសីទវីដេអូ Cloudlink ជូនដល់ក្រសួងសុខាភិបាលកម្ពុជាក្នុងការបង្ការនិងទប់ស្កាត់ជំងឺកូវីដ១៩
ចន្លោះមិនឃើញ
នាថ្ងៃទី៧ ខែមេសា ឆ្នាំ២០២០ ពិធីបរិច្ចាគប្រព័ន្ធសន្និសីទវីដេអូ Cloudlink របស់ក្រុមហ៊ុន Huawei កម្ពុជា ត្រូវបានប្រារព្ធឡើងជាផ្លូវការនៅក្រសួងសុខាភិបាលនៃព្រះរាជាណាចក្រកម្ពុជា ក្រោមអធិបតីភាពរបស់ ឯកឧត្តមសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា និងលោក Yao Yuya អគ្គនាយកក្រុមហ៊ុន Huawei ប្រចាំកម្ពុជា។
ក្នុងរយៈពេលថ្មីៗនេះ ស្ថានភាពជំងឺរលាកសួតថ្មីកូវីដ១៩ កំពុងមានការវិវឌ្ឍន៍ឥតឈប់ឈរនៅក្នុងប្រទេសកម្ពុជា ដូចនេះ ក្នុងនាមជាក្រុមហ៊ុនផ្គត់ផ្គង់ដំណោះស្រាយ និងឧបករណ៍បច្ចេកវិទ្យាព័ត៌មានវិទ្យា ICTឈានមុខគេនៅលើពិភពលោក ក្រុមហ៊ុន Huawei តិចណូឡូជី (ខេមបូឌា) ខូអិលធីឌី បានធ្វើសហប្រតិបត្តិការជាមួយរាជរដ្ឋាភិបាលកម្ពុជា ក្នុងការបង្កើតប្រព័ន្ធសន្និសីទវីដេអូ Cloudlink ដើម្បីជាជំនួយដល់រាជរដ្ឋាភិបាលកម្ពុជាក្នុងកិច្ចប្រយុទ្ធប្រឆាំងនឹងការរីករាលដាលនៃជំងឺនេះតាមរយៈការប្រើប្រាស់បច្ចេកវិទ្យាទំនើបចុងក្រោយបង្អស់ដូចជា Cloud និងបញ្ញាសិប្បនិម្មិត AI ជាដើម ហើយប្រព័ន្ធសន្និសីទវីដេអូនេះនឹងអាចភ្ជាប់ទំនាក់ទំនងគ្នាបានរវាងក្រសួងសុខាភិបាលកម្ពុជា មន្ទីរពេទ្យមិត្តភាពកម្ពុជា-សូវៀត និងមណ្ឌលសុខភាពចាក់អង្រែ។ លើសពីនេះទៅទៀត ការធ្វើអន្តរទំនាក់ទំនងដោយរយៈពេលដំណើរការជាក់ស្តែង (Real-time) រវាងក្រសួងសុខាភិបាលកម្ពុជា មណ្ឌលសុខភាពខេត្ត និងមន្ទីរពេទ្យទូទាំង ២៥ រាជធានី ខេត្ត នឹងអាចដាក់ដំណើរការទៅបាន ដើម្បីពិនិត្យ និងតាមដាននូវករណីនៃជំងឺ ពិគ្រោះយោបល់ពីចម្ងាយដោយរយៈពេលដំណើរការជាក់ស្តែង (Real-time) ដែលវាមិនត្រឹមតែអាចជួយបង្កើនប្រសិទ្ធភាពទូទៅក្នុងការបង្ការ និងទប់ស្កាត់ការរាតត្បាតនៃជំងឺរបស់រាជរដ្ឋាភិបាលកម្ពុជាប៉ុណ្ណោះទេ វាក៏អាចជួយសន្សំសំចៃពេលវេលានៃប្រតិបតិ្តការការងារផងដែរ ។
ប្រព័ន្ធសន្និសីទវីដេអូនេះអាចបង្កើតឡើងបានក្រោមការព្រមព្រៀងរបស់ក្រសួងប្រៃសណីយ៍ និងទូរគមនាគមន៍នៃកម្ពុជា ដែលអនុញ្ញាតឲ្យមានការបើកបណ្តាញសាកល្បង 5G ជាបណ្តោះអាសន្ន និងការដាក់ពង្រាយនូវបណ្តាញសាកល្បង 5G ដែលប្រតិបត្តិករអាចដាក់ដំឡើងបានយ៉ាងឆាប់រហ័ស ដែលជាហេតុធ្វើឲ្យអន្តរទំនាក់ទំនងដោយប្រព័ន្ធអ៊ីនធឺណិតឥតខ្សែ(wireless broadband interconnection) រវាងក្រសួងសុខាភិបាល មន្ទីរពេទ្យមិត្តភាពខ្មែរ សូវៀត និងមន្ទីរពេទ្យតាមបណ្តាខេត្តអាចដាក់ដំណើរការទៅបាន។ ក្រៅពីនេះ បច្ចេកវិទ្យា 5G ដែលមានល្បឿនលឿន និងប្រើប្រាស់រយៈកាលខ្លីបានផ្តល់នូវអត្ថប្រយោជន៍យ៉ាងទូលំទូលាយសម្រាប់ការប្រើប្រាស់ប្រព័ន្ធពិគ្រោះជំងឺពីចម្ងាយ (telemedicine) នេះ។ ជាមួយនឹងការរីកចម្រើននៃយុទ្ធសាស្ត្រប្រយុទ្ធប្រឆាំងនឹងការរីករាលដាលនៃជំងឺកូវីដ១៩ បច្ចេកវិទ្យា5G (Cloud) និងបញ្ញាសិប្បនិម្មិតAI ត្រូវបានគេប្រើប្រាស់យ៉ាងទូលំទូលាយនៅគ្រប់ស្ថានការណ៍ទាំងអស់ ជាពិសេសគឺការពិគ្រោះជំងឺពីចម្ងាយ telemedicine និងការពិនិត្យតាមដានមេរោគ។
រដ្ឋមន្រ្តីក្រសួងសុខាភិបាលកម្ពុជាបានមានប្រសាសន៍ថា៖ “ប្រព័ន្ធសន្និសីទវីដេអូ និងសម្ភារៈដែលបរិច្ចាគដោយក្រុមហ៊ុន Huawei កម្ពុជានាពេលនេះ បានជួយដល់ក្រសួងសុខាភិបាលក្នុងការភ្ជាប់ទំនាក់ទំនងជាមួយមន្ទីរពេទ្យទទួលបន្ទុកជំងឺកូវីដ១៩ នេះនៅទូទាំង ២៥ រាជធានី ខេត្ត ដែលរួមចំណែកបង្កើនប្រសិទ្ធភាពការងាររបស់ក្រសួងសុខាភិបាលឲ្យកាន់តែប្រសើរជាងមុន ជាពិសេសគឺចំណេញពេលវេលាក្នុងកិច្ចការប្រយុទ្ធប្រឆាំង និងបង្ការការរីករាលដាលនេះ ពីព្រោះថា ព័ត៌មាននឹងត្រូវបានចែករំលែក និងបែងចែកទៅគ្រប់ស្ថាប័នពាក់ព័ន្ធដោយប្រើរយៈពេលត្រឹមតែម្តងប៉ុណ្ណោះ។ ម៉្យាងវិញទៀត បណ្តាញ5G នេះបានផ្តល់នូវបទពិសោធន៍អ៊ីនធឺណិតល្បឿនលឿន និងជំនួយយ៉ាងទូលំទូលាយសម្រាប់ប្រជាជនកម្ពុជាផ្ទាល់។ ដូចនេះ តំណាងឱ្យរាជរដ្ឋាភិបាលកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រុមហ៊ុន Huawei ដែលបានរួមចំណែកជាមួយរាជរដ្ឋាភិបាលកម្ពុជាក្នុងការងារប្រយុទ្ធប្រឆាំង និងទប់ស្កាត់នឹងការរាតត្បាតនៃជំងឺនេះ។”
ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជាបានមានប្រសាសន៍ថា៖ “សហគ្រាសចិននៅកម្ពុជាបានដើរតួនាទីយ៉ាងសកម្មក្នុងការអនុវត្តសកម្មភាពបរិច្ចាគផ្សេងៗ ដើម្បីរួមចំណែកក្នុងកិច្ចប្រយុទ្ធប្រឆាំងនឹងការរាតត្បាតនៃជំងឺកូវីដ១៩ នៅកម្ពុជា។ ក្នុងនោះដែរ ក្រុមហ៊ុន Huawei ដែលជាក្រុមហ៊ុនបច្ចេកវិទ្យាព័ត៌មានវិទ្យាឈានមុខគេនៅលើពិភពលោក បានប្រើប្រាស់នូវបច្ចេកវិទ្យាទំនើបរបស់ខ្លួន ដើម្បីបង្កើនប្រសិទ្ធភាពការងាររបស់រាជរដ្ឋាភិបាលកម្ពុជាក្នុងពេលមានជំងឺរាតត្បាតនេះ ដែលជាគំរូមួយដ៏ល្អប្រសើរសម្រាប់សហគ្រាសចិនទាំងអស់។”
ក្នុងឱកាសនោះ លោក Yao Yuya អគ្គនាយកក្រុមហ៊ុន Huawei Technologies ប្រចាំកម្ពុជាបានមានប្រសាសន៍ផងដែរថា៖ “នាពេលបច្ចុប្បន្ននេះ ស្ថានភាពជំងឺរលាកសួតថ្មីកូវីដ១៩ កំពុងមានការវិវឌ្ឍន៍ឥតឈប់ឈរនៅក្នុងប្រទេសកម្ពុជា ក្នុងនាមក្រុមហ៊ុន Huawei ជាសហគ្រាសមួយដែលមានទំនួលខុសត្រូវបម្រើដល់ប្រជាពលរដ្ឋ និងបានប្រតិបត្តិការធុរកិច្ចនៅកម្ពុជាអស់រយៈពេល ២១ឆ្នាំមកនេះ យើងតែងតែប្រកាន់ខ្ជាប់នូវគោលការណ៍ “នៅកម្ពុជាដើម្បីកម្ពុជា” ។ ដោយមានការណែនាំ និងជំនួយយ៉ាងមុតមាំពីស្ថានទូតចិនប្រចាំកម្ពុជា ក្នុងនាមក្រុមហ៊ុន Huawei ជាក្រុមហ៊ុនបច្ចេកវិទ្យាព័ត៌មានវិទ្យាឈានមុខគេនៅលើពិភពលោក យើងនឹងខិតខំប្រើប្រាស់នូវវិធីសាស្ត្របច្ចេកវិទ្យាទំនើបចុងក្រោយបង្អស់របស់ខ្លួនរួមមាន៖ បច្ចេកវិទ្យា 5G បញ្ញាសិប្បនិម្មិត AI និងជាពិសេសប្រព័ន្ធសន្និសីទវីដេអូ Huawei cloud ដើម្បីគាំទ្រយ៉ាងពេញទំហឹងដល់រាជរដ្ឋាភិបាលកម្ពុជាក្នុងកិច្ចប្រយុទ្ធប្រឆាំងនេះ ពីព្រោះយើងជឿជាក់ថា បច្ចេកវិទ្យាព័ត៌មានវិទ្យា ICTបានក្លាយជាមធ្យោបាយដ៏សំខាន់ដើម្បីលើកកម្ពស់ដល់យុទ្ធសាស្ត្ររបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងទប់ស្កាត់ការរីករាលដាលនៃវីរុសនេះនៅក្នុងប្រទេសកម្ពុជា។”
សម្រាប់ព័ត៌មានបន្ថែម សូមចូលទៅកាន់ទំព័រហ្វេសប៊ុករបស់ក្រុមហ៊ុន Huawei ប្រចាំកម្ពុជា:https://www.facebook.com/HuaweiTechKH/៕