មកដឹងយុទ្ធសាស្ត្រទប់មិនឲ្យជំងឺកូវីដ១៩ផ្ទុះលើកទីពីរ របស់រោងចក្រដំឡើង iPhone
- 2020-04-09 10:20:03
- ចំនួនមតិ 0 | ចំនួនចែករំលែក 0
មកដឹងយុទ្ធសាស្ត្រទប់មិនឲ្យជំងឺកូវីដ១៩ផ្ទុះលើកទីពីរ របស់រោងចក្រដំឡើង iPhone
ចន្លោះមិនឃើញ
ប្រទេសចិនបានចាប់ផ្ដើមបើកខេត្ត/ទីក្រុងដែលបានបិទព្រោះជំងឺកូវីដ១៩ជាបណ្ដើរៗហើយ ដោយសារតែអត្រានៃការឆ្លងគឺមានកាន់តែតិចទៅៗ ហើយរោងចក្រក៏បានចាប់ផ្ដើមបើកដំណើរការឡើងវិញ និងមនុស្សចាប់ផ្ដើមវិលចូលធ្វើការផងដែរ។ យ៉ាងណាក្ដីគ្រោះថ្នាក់មិនទាន់ចប់នៅឡើយទេ ដោយអ្នកជំនាញបានព្រមានថាការផ្ទុះជាលើកទីពីរអាចនឹងកើតមានឡើង ប្រសិនគ្មានការប្រយ័ត្នប្រយែង។
ដើម្បីទប់ស្កាត់ការផ្ទុះជាលើកទីពីរ ក្រុមប្រឹក្សារដ្ឋចិន បានណែនាំឲ្យនិយោជកផ្ដល់ម៉ាសមុខដល់បុគ្គលិក និងត្រូវវាស់កម្ដៅពួកគេជាប្រចាំថ្ងៃ។ យ៉ាងណាក៏ដោយ ក្រុមហ៊ុនដូចជា Foxconn ដែលជាអ្នកដំឡើង iPhone ដ៏ធំមួយ បានអនុវត្តន៍លើសពីនេះទៅទៀត។
បុគ្គលិក Foxconn នៅរោងចក្រ Zhengzhou ត្រូវបានគេរាយការណ៍ឲ្យដឹងថា ពួកគេទទួលបានម៉ាសមុខ ហើយមានការវាស់កម្ដៅជារៀងរាល់ព្រឹក ដែលស្របតាមការតម្រូវរបស់ក្រុមប្រឹក្សារដ្ឋ។ បន្ថែមពីនេះ Foxconn ក៏ធ្វើការត្រួតពិនិត្យកម្ដៅបុគ្គលិកតាមរយៈកាមេរ៉ាវីដេអូ Infrared ផងដែរ ដើម្បីដឹងអំពីសញ្ញាដំបូងនៃជំងឺ។ មិនតែប៉ុណ្ណោះនៅពេលបាយថ្ងៃត្រង់ តុនៅកន្លែងទទួលអាហារគឺត្រូវបានបាំងដោយរបាំងកុំឲ្យមានការប៉ះពាល់រវាងបុគ្គលិកនិងបុគ្គលិក។ កៅអីអង្គុយនៅកន្លែងទទួលទានអាហារក៏មាននូវ QR Code សម្រាប់បុគ្គលិកស្កេន ដើម្បីអាចឲ្យក្រុមហ៊ុនបានដឹងថាពួកគេផ្លាស់ទីទៅកន្លែងណាខ្លះ។
បុគ្គលិកត្រូវបានគេរៀបចំជាក្រុមៗមាន ២០ នាក់ ដែលពួកគេទទួលទាន ធ្វើការ និងរស់នៅជាមួយគ្នាផងដែរ។ នៅពេលដែលពួកគេត្រឡប់មកពីធ្វើការ មកដល់កន្លែងស្នាក់នៅដែលក្រុមហ៊ុនផ្ដល់ជូន (Dorm) គឺមានទីតាំងសម្រាប់ឲ្យពួកគេទុកអាវក្រៅ និងកាតាបដើម្បីសម្លាប់មេរោគជាមុនសិន។
Foxconn បានប្រាប់ឲ្យដឹងក្នុងសេចក្ដីថ្លែងការណ៍ទៅកាន់ Washington Post ថា ខ្លួនក៏មានប្រើប្រាស់ការធ្វើតេស្តសុខភាព និងប្រើ X-Ray ដើមទ្រូងផងដែរនៅពេលដែលចាំបាច់។ គោលការណ៍ដែល Foxconn បានអនុវត្តន៍គឺជាគោលការណ៍តឹងរ៉ឹងបំផុតមួយនៅប្រទេសចិន ដោយសារក្រុមហ៊ុនត្រូវធ្វើការឲ្យទាន់ពេល iPhone ថ្មីដែលប្រកាសចេញនាចុងឆ្នាំ៕