សុគន្ធកញ្ញា ជម្រះរឿងពាក់ព័ន្ធនឹង វង្ស ដារ៉ារតនា ក្នុង The Voice Cambodia

2014-11-24 17:58:46
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ឱក សុគន្ធកញ្ញា បានជម្រះមន្ទិលកើតលើនាងក្នុងកម្មវិធី The Voice Cambodia ដែលទើបនឹងបញ្ចប់ទៅថ្មីៗ ខណៈមានការវាយតម្លៃថា នាងបានប្រើមនោសញ្ចេតនាផ្ទាល់ខ្លួនរើសយកបេក្ខជន វង្ស ដារ៉ារតនា ឲ្យឆ្លងវគ្គម្ដងហើយម្ដងទៀត ឯមហាជនយល់ថា បេក្ខជនរូបនេះសមត្ថភាពនៅមានកម្រិត។

“សុគន្ធកញ្ញា មិនដែលក្បត់ឧត្តមគិតខ្លួនឯងឡើយ ខ្ញុំមានបទពិសោធន៍ជាង១០ឆ្នាំក្នុងផ្នែកនេះ អីចឹងខ្ញុំយកបទពិសោធន៍នេះប្រើក្នុងការរើសយកនរណាម្នាក់ដែលមានសមត្ថភាពទៅវគ្គបន្ត!"។ សុគន្ធកញ្ញា និយាយម៉ាត់ៗ និងច្បាស់លាស់បញ្ជាក់ពីអ្វី ដែលនាងបានធ្វើក្នុងនាមជា Coach របស់កម្មវិធី The Voice Cambodia ។

កញ្ញា បន្តថា កម្មវិធី The Voice Cambodia គឺសង្កត់ធ្ងន់បំផុតទៅលើសំឡេង ដូច្នេះហើយសម្រាប់កញ្ញាខ្លួនឯងគឺចង់យកអ្វីដែលប្លែកមកជូនទស្សនិកជន គឺកញ្ញាចង់រកអ្នកដែលមានសំឡេងប្រភេទ Rock ឬ Pop ជាដើម។ យោងលើហេតុផលនេះ កញ្ញា បានរើសយក វង្ស ដារ៉ារតនា បន្តរហូតមកដល់វគ្គ Live Show ប៉ុន្តែថា មិនមានពាក់ព័ន្ធនឹងមនោសញ្ចេតនាស្គាល់គ្នារវាងនាង និង រតនាឡើយ។

“សម្រាប់ខ្ញុំ គឺខ្ញុំគ្រាន់តែដឹងថាគាត់ជាអ្នកចម្រៀង ដោយសារធ្លាប់ឃើញគាត់ឡើង Concert និងឡើងប៉ុស្តិ៍អីជាដើម ប៉ុន្តែខ្ញុំអត់ស្គាល់ឈ្មោះគាត់ទេ ទាល់តែគាត់មកប្រឡង តែដំបូងក៏អត់ដឹងថាគាត់ដែរ ព្រោះវគ្គដំបូងយើងបែរខ្នង អ្នកណាទៅចាំសំឡេងអ្នកណាជាអ្នកណា រហូតដល់បង្វិលកៅអី ហើយខ្ញុំសួរគាត់ ទើបដឹងថា អូហ៍គាត់ឈ្មោះ រតនា!”។ កញ្ញា ថ្លែង។

ឆ្លងផុតវគ្គ Blind Audition មកដល់វគ្គ Live Show សប្ដាហ៍ទី១-៣ វង្ស ដារ៉ារតនា នៅតែត្រូវបានរើសដោយផ្ទាល់ពី សុគន្ធកញ្ញា ឲ្យឆ្លងវគ្គម្ដងហើយម្ដងទៀត ឯការរិះគន់ដដែលនៅតែកើតមាន។ មកដល់សប្ដាហ៍ទី៤ ដារ៉ារតនា ត្រូវបានជម្រុះ ខណៈមហាជន ពិសេសអ្នកនៅលើបណ្ដាញសង្គមបានវិភាគថា សុគន្ធកញ្ញា ធ្វើដើម្បីគេចការរងសម្ពាធកាន់តែខ្លាំងបើនៅតែបន្តអូសយក ដារ៉ារតនា។

ប៉ុន្តែសាមីខ្លួន បានបដិសេធ "ខ្ញុំអត់ដែលមានសម្ពាធអីទេ ជាទូទៅខ្ញុំអត់ដែលមានសម្ពាធទេ ខ្ញុំដឹងថាមនុស្សយើងបើអត់ធ្វើបានអត់ខុស តែបើធ្វើគឺមិនអាចផ្គាប់ចិត្តបានទាំងអស់ទេ ហើយខ្ញុំក៏ដឹងថា ទស្សនិកជនប្រាកដជាមានមតិខុសគ្នា អីចឹងបើពួកគាត់ពេញចិត្តអ្នកណា គាត់បោះឆ្នោតឲ្យអ្នកនោះ អីចឹងរតនាក៏ដូចគ្នា បើគាត់មិនធ្លាក់សប្ដាហ៍នោះ សប្ដាហ៍ក្រោយៗក៏គាត់នៅតែធ្លាក់ដែរ ព្រោះគាត់អត់ជាប់ Vote ទេ!"។

កញ្ញា បន្តពន្យល់ថា ដារ៉ារតនា នៅសប្ដាហ៍ទី៣នោះ មានសមត្ថភាពលើសតែបន្តិចប៉ុណ្ណោះទៅនឹងបេក្ខជនម្នាក់ទៀតដែលធ្លាក់ ដូច្នេះមកដល់សប្ដាហ៍ក្រោយ គាត់បានប្រឈមនឹងបេក្ខជនដែលឈ្នះ Vote ពីមហាជនពីសប្ដាហ៍មុន។ កញ្ញា សង្កត់ធ្ងន់ថា នាងមិនមានសិទ្ធិរក្សាទុកអ្នកណាទាំងអស់ តាមតែនាងចូលចិត្តទេ ប៉ុន្តែគ្រាន់តែអាចរក្សាទុកអ្នកដែលមានសមត្ថភាពស្របតាមការកំណត់របស់កម្មវិធីប៉ុណ្ណោះ។ "ខ្ញុំសង្ឃឹមថា ត្រឹមប៉ុណ្ណឹងទាំងអស់គ្នា នឹងលែងមានមន្ទិលទៀត"។

ពាក់ព័ន្ធនឹងការសម្រេចនានារបស់ Coach ទាំង៤ លោក អ៊ិន ទីតូ អ្នករៀបចំកម្មវិធី ធ្លាប់បានប្រាប់ Sabay ថាលោកគាំទ្រការសម្រេចចិត្តរបស់ពួកគេ ហើយលោកក៏ដឹងថា ការរិះគន់ជារឿងចៀសមិនរួច ព្រោះតែបេក្ខជន មានអ្នកចូលចិត្ត និងមិនចូលចិត្តរៀងខ្លួន។

បើទោះមានការរិះគន់ខ្លះ ប៉ុន្តែប្រការគួរកត់សម្គាល់មួយ ប្រមុខរាជរដ្ឋាភិបាលកម្ពុជា សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏ធ្លាប់បានលើកសរសើរពីកម្មវិធី The Voice និង Coach ទាំងបួនថា មានសមត្ថភាពមិនធម្មតាដែរ៕

ផ្សេងៗទៀតពីឱក សុគន្ធកញ្ញា មាននៅទីនេះ…!!!

អត្ថបទផ្សេងៗស្ដីពីសកម្មភាពតារាជាតិ សូមចុចទីនេះ…!!!

អត្ថបទផ្សេងៗជុំវិញតារាជាតិ មាននៅទីនេះ…!!!

អត្ថបទ៖ ទារិកា