សពអ្នកចាំទីក្រុមស្វាយរៀង និងជម្រើសជាតិ សរ សុភា បូជាម៉ោង ៤ កន្លះល្ងាចនេះ
- 2014-11-24 18:04:25
- ចំនួនមតិ 0 | ចំនួនចែករំលែក 0
សពអ្នកចាំទីក្រុមស្វាយរៀង និងជម្រើសជាតិ សរ សុភា បូជាម៉ោង ៤ កន្លះល្ងាចនេះ
ចន្លោះមិនឃើញ
សពរបស់អ្នកចាំទីដៃទី១ របស់ក្រុមបាល់ទាត់ខេត្តស្វាយរៀង និងជាសមាជិកក្នុងក្រុមជម្រើសជាតិកម្ពុជា សរ សុភា ដែលទទួលមរណភាពកាលពីថ្ងៃទី ២២ វិច្ឆិកា ចុងសប្ដាហ៍កន្លងទៅនឹងបូជាប្រហែលជាម៉ោង ៤:៣០ នាទីល្ងាចថ្ងៃច័ន្ទ ទី ២៤ វិច្ឆិកា នេះនៅវត្តនាគវ័ន្ត។
សព សរ សុភា តម្កល់នៅវត្តនាគវ័ន្ត
បើតាមលោក សំ វ៉ាន់ដេត គ្រូបង្វឹកបង្គោលក្លិបខេត្តស្វាយរៀង ដែលនៅកំដរសពតាំងពីដើមមកបានឱ្យដឹងថាលោក នៅម៉ោង ៤ សពនឹងដង្ហែចេញហើយបូជា នៅក្នុងវត្តនាគវន្ត ផ្ទាល់តែម្ដង។ លោកថា គិតត្រឹមពេលនេះមានលោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា តំណាងឯកឧត្ដម សៅ សុខា ប្រធានសហព័ន្ធ រួមទាំងលោក អ៊ុក សិទ្ធិជាតិ អគ្គនាយកនៃនាយកដ្ឋានកីឡា តំណាងឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំយុវជន និងកីឡា បានទៅចូលរួមរំលែកទុក្ខដល់គ្រួសារសព។
ជាមួយគ្នានេះដែរ លោក ឡាយ សុធា អ្នកចាត់ការទូទៅក្លិបបាល់ទាត់វេស្ទើន លោក លី ហៀង អគ្គលេខាធិការក្លិបបាល់ទាត់ភ្នំពេញក្រោន និង លោក ឡាំ ទីនី អ្នកចាត់ការក្លិបបាល់ទាត់ណាហ្គាខប ក៏បានទៅចូលរួមរំលែកទុក្ខដល់ទីតម្កល់សពដែរ។
ថ្នាក់ដឹកនាំក្លិបខេត្តស្វាយរៀង មានឯកឧត្តម ឌី វិជ្ជា ប្រធានក្លិប លោក អោក សំណាង អគ្គលេខាធិការក្លិប លោក រិទ្ធ ឌីកា ប្រធានបច្ចេកទេសក្លិប សុទ្ធតែផ្ដល់បច្ច័យជាប្រាក់ដើម្បីរៀបចំពិធីបុណ្យ និង បុណ្យ ៧ ថ្ងៃខាងមុខដែលនឹងរៀបចំនៅបរិវេណវត្តដដែលនេះ ។
សរ សុភា បានទទួលមរណភាពក្រោយពេលហ្វឹកហាត់នៅ Gym ម្តុំស្ថានទូនចិនរួច ពោលគឺអំឡុងពេលសម្រួលសាច់ដុំ និង សំអាតខ្លួនដោយនាំគ្នាហែលទឹក ពេលងើបចេញពីអាង ក៏បានដួល និងតឹងទ្រូង។ តាមការសន្និដ្ឋានបឋមរបស់គ្រូពេទ្យ ការស្លាប់របស់គេដោយសារតែគាំបេះដូង ប៉ុន្ដែក្រោយមកទាំងសមត្ថកិច្ច និង គ្រូពេទ្យសិក្សាឃើញគេស្លាប់ដោយសារខ្យល់គរ។
សម្រាប់ប្រិយមិត្តអ្នកគាំទ្របាល់ទាត់ជាតិ ឬ សាច់ញាតិមិត្តភក្ដិរបស់ កីឡាករ សរ សុភា ដែលចង់ទៅជូនដំណើរចុងក្រោយរបស់សព សូមមេត្តាទៅដល់វត្តនាគវ័ន្តឱ្យទាន់ពេលវេលា៕
អត្ថបទពាក់ព័ន្ធ៖ ព័ត៌មានបន្ថែម ជុំវិញការស្លាប់អ្នកចាំទី សរ សុភា
អត្ថបទ៖ ម៉ឺន រស្មី រូបថត៖ រូបថតកីឡា