ធនធានគ្រូបង្វឹកបាល់ទាត់កម្រិត C បិទបញ្ចប់ព្រឹកមិញ
- 2014-11-24 23:34:51
- ចំនួនមតិ 0 | ចំនួនចែករំលែក 0
ធនធានគ្រូបង្វឹកបាល់ទាត់កម្រិត C បិទបញ្ចប់ព្រឹកមិញ
ចន្លោះមិនឃើញ
ធនធានគ្រូបង្វឹកកីឡាបាល់ទាត់កម្រិត C ជាង២០រូប បានបញ្ចប់វគ្គសិក្សារបស់ខ្លួនដោយជោគជ័យកាលពីព្រឹកមិញ ក្រោមអធិបតីភាព លោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា នៅទឹកដីក្រុមភ្នំពេញក្រោន។
វគ្គសិក្សាគ្រូបង្វឹកកម្រិត C ដែលរៀបចំដោយក្លិបភ្នំពេញក្រោន រួមនឹងអង្គការ Salt ធ្វើការសហការជាមួយសហព័ន្ធកីឡាបាល់ទាត់កម្ពុជា (FFC) និងសហព័ន្ធកីឡាបាល់ទាត់ទ្វីបអាស៊ី (AFC) ដែលមានសិក្ខាកាមជាកីឡាករ និងជាគ្រូបង្វឹកនៅក្លិបភ្នំពេញក្រោន និងសមាជិកមកពីអង្គការ Salt ដែលជាអង្គការផ្ដោតចិត្តទុកដាក់លើការអភិវឌ្ឍកីឡាបាល់ទាត់ បានបញ្ចប់ទៅដោយជោគជ័យកាលពីព្រឹកមិញនេះ។
លោក Shiyas Mohamed គ្រូបង្គោលមកពី AFC បានធ្វើការកោតសរសើរដល់ការខិតខំសិក្ខារៀនសូត្ររបស់សិក្ខាគ្រប់រូប នឹងសូមឲ្យសិក្ខាកាមទាំងអស់ប្រើប្រាស់នូវចំណេះដឹងដែលខ្លួនទទួលបានពីវគ្គបណ្ដុះបណ្ដាលនេះ ដើម្បីជួយអភិវឌ្ឍន៍វិស័យកីឡាបាល់ទាត់ជាតិ។ ពិសេសនោះលោកក៏សូមកោតសរសើរ និងលើកទឹកចិត្តដល់លោក ឫទ្ធី សំណាង ប្រធានក្លិបភ្នំពេញក្រោន ដែលបានខិតខំយ៉ាងខ្លាំងក្នុងការជួយអភិវឌ្ឍន៍កីឡាបាល់ទាត់ទាំងក្នុងប្រទេស និងក្នុងតំបន់។
ស្រដៀងគ្នានេះដែរ លោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជាបានគូសបញ្ជាក់ពីកិច្ចខិតខំប្រឹងប្រែងរបស់ក្លិបភ្នំពេញក្រោន ដែលមានយុវជនថ្នាលជាច្រើន និងគ្រប់ប្រភេទអាយុ។ លោកក៏បានកោតសរសើរពីសមិទ្ធផលដែលក្លិបទទួលបានដូចជាជើងឯកលីកកំពូល និងជើងឯកលីកយុវជន ទាំង U15 និងU17 នៅឆ្នាំនេះជាដើម។ អគ្គលេខាធិការខាងលើបានលើកទឹកចិត្តឲ្យថ្នាក់ដឹកនាំក្លិបទាំងអស់ អ្នកគាំទ្រ និងស្រឡាញ់វិស័យកីឡាជាតិ និងប្រព័ន្ធផ្សព្វផ្សាយ រួមគ្នាជួយអភិវឌ្ឍន៍វិស័យកីឡាជាតិ ពិសេសកីឡាបាល់ទាត់ ឲ្យបានរីកចម្រើនដូចបណ្ដាប្រទេសនានាលើសកលលោក៕
អត្ថបទ៖ អៀង សូទ្រី
រូបថត៖ ទូរស័ព្ទដៃ