The Murderer ឱកាសទៅប្រកួតនៅប្រទេសចិនកាន់តែកៀក
- 2014-11-27 23:00:57
- ចំនួនមតិ 0 | ចំនួនចែករំលែក 0
The Murderer ឱកាសទៅប្រកួតនៅប្រទេសចិនកាន់តែកៀក
ចន្លោះមិនឃើញ
ឱកាសទៅប្រកួតបង្ហាញសមត្ថភាពនៅលើឆាកប្រកួត E-Sports អន្តរជាតិរបស់ Clan The Murderer កាន់តែមានច្រើនទៅៗហើយ ដោយ The Murderer កំពុងឈរនៅលើកំពូលតារាងប្រចាំសប្ដាហ៍នេះជាមួយនឹងពិន្ទុ ៤២.០៥៦ នៅក្នុងដៃ តាមពីក្រោយដោយ Clan CriminalX ដែលមានពិន្ទុ ២០.៩៧៦ និងលេខ ៣ Clan The_PremieR មាន ១៣.៦៩៤ នេះបើគិតត្រឹមថ្ងៃទី ២៧ នាវេលាម៉ោង ៣ រសៀល។
ទោះបីជាទទួលបានពិន្ទុនាំមុខ CriminalX រហូតដល់ទៅពាក់កណ្ដាល តែ YaOun អ្នកបង្កើត Clan The Murderer នៅតែមិនបង្អង់ដៃក្នុងការសម្រុកកុង Clan បន្ថែមពិន្ទុ League ក្នុងសប្ដាហ៍នេះឡើយ ព្រោះខ្លាច Clan CriminalX និង Clan ដទៃទៀតតាមទាន់ពិន្ទុ ដោយបានណែនាំ និងប្រាប់សមាជិកគ្រប់រូបនៅក្នុង Clan ព្យាយាមបន្តកុង Clan តាមសមត្ថភាពដែលអាចធ្វើបាន ហើយរូបគេផ្ទាល់ រួមទាំងសមាជិក NeverCare ដែលទទួលបានកៅអីទៅប្រកួតនៅចិនរួចទៅហើយ ក៏នៅតែព្យាយាមកុង Clan ដែរ។
YaOun អ្នកបង្កើត Clan The Murderer និយាយថា៖ "នៅតែបន្តកុងចឹងបង ព្រោះមិនអាចប្រហែសបានទេ! ក្នុងរយៈពេល ៣ ថ្ងៃយើងអាចរកបានពិន្ទុប៉ុណ្ណឹង Clan គេក៏អាចរកបានដូចគ្នា ដូច្នេះដើម្បីជាសុវត្ថិភាពក្នុងការលើកស្ទួយ Clan The Murderer ឲ្យមានមុខប្រកួតលើឆាកប្រកួតអន្តរជាតិច្រើន មានតែប្រឹងទាំងអស់គ្នា"។
YaOun ក៏មិនភ្លេចអរគុណដល់សមាជិក Clan គ្រប់រូបដែលបានខំប្រឹងប្រែងចូលរួមកុង Clan សន្សំពិន្ទុ League តាំងពីដើមមកដែរ ជាពិសេសគឺសប្ដាហ៍នេះតែម្ដង ដោយបាននិយាយថា៖ "ហើយក៏សូមអរគុណដល់សមាជិកទាំងអស់ដែលជាចំណែកក្នុងការសន្សំពិន្ទុ League ឲ្យបានខ្ពស់បែបនេះ គ្មានអ្នកទាំងអស់គ្នា The Murderer ក៏មិនអាចមានថ្ងៃនេះដែរ"!
អាន៖ ឱកាសមាសចូលរួមប្រកួត MATIC 2015 នៅប្រទេសចិនពីការកុង Clan
ចំណែករឿងជ្រើសរើសសមាជិកទៅប្រកួតនៅចិនវិញ Yaoun មិនទាន់បានគិតគូទេ ព្រោះ Yaoun នៅមានចិត្តបារម្ភរឿងពិន្ទុកុង Clan នៅឡើយ ខ្លាចតែមាន Clan ណាមួយតាមទាន់ ហើយវ៉ាដាច់នៅប៉ុន្មានថ្ងៃខាងមុខនេះ។ "មិនទាន់បានគិតទេបង រឿងជ្រើសរើសសមាជិកទៅប្រកួតនៅចិននោះ អ្វីៗគឺត្រូវចាំលទ្ធផលនៃពិន្ទុកុង Clan សប្ដាហ៍នេះចេញសិន ចាំគិតតទៀត"។
តើមាន Clan ណាអាចតាមទាន់ពិន្ទុ The Murderer បានទេនៅចុងសប្ដាហ៍នេះ?
បញ្ជាក់ផងដែរ Clan ដែលទទួលបានពិន្ទុ League ក្នុងសប្ដាហ៍នេះច្រើនជាងគេ សមាជិក ៥ រូបនៃ Clan នោះនឹងជាប់ជាជើងខ្លាំងតំណាងប្រទេសកម្ពុជាក្នុងការចូលរួមប្រកួត MATIC អន្តរជាតិនៅឯប្រទេសចិន។ សម្រាប់លិខិតឆ្លងដែន (Passport) ត្រូវមានដោយខ្លួនឯង ក្រុមការងារ CCC មិនទទួលខុសត្រូវរឿងលិខិតឆ្លងដែនរបស់អ្នកប្រកួតឡើយ៕
អត្ថបទ៖ ភីឆាយ