ប្រណាំងកង់ និង រត់ប្រណាំងរៀបចំជាប់ៗគ្នានៅសៀមរាប ដើមខែក្រោយ

2014-11-28 13:00:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍កីឡា ២ ប្រភេទមានប្រណាំងកង់ និង រត់ប្រណាំងពាក់កណ្ដាលម៉ារ៉ាតុន គ្រោងនឹងរៀបចំប្រកួតនៅលើទឹកដីនៃខេត្តសៀមរាបអង្គរ នាដើមខែ ធ្នូ ចុងឆ្នាំ ២០១៤ នេះ ទាំងក្នុងគោលបំណងមនុស្សធម៌ និង ទាក់ទាញភ្ញៀវទេសចរណ៍។

ទិដ្ឋភាពរត់ពាក់កណ្ដាលម៉ារ៉ាតុន នាពេលកន្លងមក

សម្រាប់ការប្រណាំងកង់ វិញនេះជាលើកទី៩ ហើយដែលបង្កើតឡើងនៅទីនោះដោយចាប់ផ្ដើមឡើងនៅថ្ងៃទី ៦ ខែ ធ្នូ ក្នុងបរិវេណជុំវិញប្រាសាទអង្គរវត្ត ក្នុងគោលដៅ រកថវិកាជួយដល់កុមារ ក្រីក្រក្នុងប្រទេសកម្ពុជានិងស្រ្តីមានវិបត្តិ។ ចំណែកវិញ្ញាសាដាក់ឱ្យប្រកួតមាន ៣ គឺប្រណាំងចម្ងាយ១០០គីឡូម៉ែត្រ (កង់គួក), ប្រណាំងចម្ងាយ១៧គីឡូម៉ែត្រ និង ចម្ងាយ ៣០គីឡូម៉ែត្រសម្រាប់កង់ប្រភេទដៃត្រង់។

ក្រោយកម្មវិធីប្រណាំងកង់មួយថ្ងៃពោលនៅថ្ងៃទី ៧ វិច្ឆិកា ឆ្នាំ ២០១៤ កម្មវិធីរត់ប្រណាំង ពាក់កណ្ដាលម៉ារ៉ាតុង អន្ដរជាតិអង្គរ លើកទី១៩ ចាប់ផ្ដើមម្ដង។ ចំណែកវិញ្ញាសាប្រកួតមានរត់ចម្ងាយ ៣ គីឡូម៉ែត្រ, ១០ គីឡូម៉ែត្រ និង ២១ គីឡូម៉ែត្រ។

ឯកឧត្តម ថោង ខុន ប្រធានគណៈកម្មាធិការជាតិអូឡាំពិកកម្ពុជាធ្លាប់លើកឡើងថា ការរត់ប្រណាំងនេះគឺជាព្រឹត្តិការណ៍កីឡាបែបទេសចរណ៍មួយដែលទាក់ទាញភ្ញៀវទេសចរណ៍ខ្លាំង ស្របពេលកម្ពុជាធ្លាប់បង្កើតការប្រកួតកីឡាមួយនេះបាន ១៨ លើកមកហើយ។

កាលពីឆ្នាំ២០១៣ អ្នកចូលរួមរត់ក្នុងព្រឹត្តិការណ៍នេះមានចំនួនជាង៦០០០នាក់ដែលក្នុងនោះកីឡាករ-កីឡាការិនីបរទេសចំនួនជាង៣៧០០នាក់ដែលមកពី៥២ប្រទេស។ ចំណែកនៅឆ្នាំនេះគណៈកម្មាធិការរៀបចំការប្រកួតព្យាករណ៍ថាទំនងជានឹងមានអ្នកចូលរួមច្រើនជាងលើកមុន៕

អត្ថបទ៖ ម៉ឺន រស្មី