មិត្តភ័ក្ដិ ហៅការតាម Facebook គិតម៉េចដែរ?

2014-12-15 18:00:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែរវល់ខ្លាំងពេក រកពេលទំនេរ ដកឃ្លាសឹងមិនបាន ពេលខ្លះមិត្តភ័ក្ដិមួយចំនួន សម្រេចចិត្តហៅការមិត្តភ័ក្ដិ តាមរយៈការហៅទូរសព្ទ ខ្លះទៀតផ្ញើធៀបការតាមអ្នកស្គាល់តៗគ្នាមកឲ្យ។ បើមិត្តភ័ក្ដិស្និទ្ធស្នាលជាមួយគ្នា ប្រហែលជាគេមិនប្រកាន់អីទេ ចុះបើប៉ះចំអ្នកដែលមិនសូវស្គាល់គ្នាស្និទ្ធវិញ តើគួរសម្រេចចិត្ត ហៅការតាម facebook ដែរអត់?

បើជាប្រិយមិត្តវិញ យល់យ៉ាងម៉េចដែរ? ចុះយុវវ័យខាងក្រោម លើកឡើងយ៉ាងណាខ្លះ ជុំវិញបញ្ហានេះ?

រូបតំណាង

"ខ្ញុំក៏ធ្លាប់ត្រូវបានមិត្តភ័ក្ដិហៅការតាម Facebook ដែរ តែខ្ញុំមិនគិតថា វាជាការមើលងាយនោះទេ ព្រោះដោយសារតែគាត់រវល់ខ្លាំងពេក ធ្វើម៉េចបើអញ្ចឹងទៅហើយ"។ នេះជាការបញ្ជាក់ឲ្យដឹងពីយុវជន ឌី សុធា អាយុ ២៥ ឆ្នាំ ជានិស្សិតជំនាញធនាគារ និង ហិរញ្ញវត្ថុ នៃវិទ្យាស្ថានព្រះកុសុមៈ។ និស្សិតដដែលរូបនេះបានបន្ថែមទៀតថា "បើសិនជាគេជាមិត្តភ័ក្តិស្និទ្ធស្នាល ខ្ញុំមិនប្រកាន់ទេ ទោះបីជាហៅផ្ទាល់ ឬមិនផ្ទាល់ក៏ដោយចុះ សំខាន់ឲ្យតែបានប្រាប់ឲ្យដឹងមុន"។ កាលពីមុន ពេលដែលម្ចាស់ដើមការរវល់ ឬនៅឆ្ងាយពីគ្នាគេនិយមហៅតាមទូរសព្ទ ហើយនិយាយសុំទោសគេ ដែលមិនបានអញ្ជើញទៅហៅផ្ទាល់ តែដល់ឥលូវដោយសារតែបច្ចេកវិទ្យាជឿនលឿន មនុស្សទាក់ទងគ្នា កាន់តែងាយស្រួលជាងមុន ទើបគេឃើញមានឥរិយាបថថ្មីមួយទៀត ទាក់ទង នឹងការហៅភ្ញៀវចូលរួមពិធីរៀបការ តាមរយៈ facebook វិញ។ យុវជន មាស ចាន់សេង អាយុ ២៤ ឆ្នាំ និស្សិតទើបបញ្ចប់ឆ្នាំទី ៤ នៃសាកលវិទ្យាល័យភូមិន្ទភ្នំពេញ បានប្រាប់ឲ្យដឹងផងដែរថា៖ " មានមិត្តភ័ក្ដិខ្ញុំខ្លះ ថតរូបសំបុត្រការផ្ញើតាម Facebook ហើយឲ្យទៅយកដល់ផ្ទះទៀត តែខ្ញុំមិនដែលចង្អៀតចង្អល់អីរឿងអញ្ចឹងៗទេ សុទ្ធតែមិត្តភ័ក្ដិស្គាល់គ្នាស្និទ្ធហ្នឹង"។ ចំពោះកញ្ញា ចាន់ កន្ធិកា និស្សិតឆ្នាំទី៤ នៃសាកលវិទ្យាល័យបញ្ញាសាស្ត្រកម្ពុជាបាននិយាយប្រាប់ថា៖ "ខ្ញុំមិនចូលចិត្តទាល់តែសោះ ចំពោះការធ្វើបែបនេះ ទោះជាយ៉ាងណាក៏ដោយ បើសិនជារវល់មិនបានហៅផ្ទាល់ គួរតែផ្ញើសំបុត្រការតាមមិត្តភ័ក្ដិ ឬប្រាប់តាមទូរសព្ទក៏បានដែរ។ តែអ្នកខ្លះលេងផ្លូវកាត់ពេក ដូចជាមិនសូវសមទេ ធ្វើបែបនេះ"។ យល់ឃើញស្រដៀងគ្នានេះដែរ កញ្ញា ចរិយា អាយុ ២១ ឆ្នាំ ជាជាងអ៊ុតសក់នៅម្តុំផ្សារទូលទំពូង បានលើកឡើងថា៖ "ការរៀបការមិនមែនជាការលេងសើចទេ មួយជាតិការម្ដងផង មិនគួរធ្វើឲ្យគេអន់ចិត្តដោយសារតែរឿងហៅការបែបហ្នឹងទេ"។ "បើសិនជាខ្ញុំវិញ ទោះបីជាស្គាល់គ្នាស្និទ្ធស្នាលយ៉ាងណាក៏ដោយ តែខ្ញុំមិនធ្វើបែបនេះដាច់ខាត កម្មវិធីរៀបការទាំងមូល ធ្វើបែបនេះដូចជាការមើលស្រាលគេពេក គួរតែបង្ហាញការគោរពដល់ភ្ញៀវដែលមកចូលរួមទើបល្អ ព្រោះយើងមិនអាចដឹងចិត្តគេមុន ថាគេពេញចិត្ត ឬមិនពេញចិត្ត ពេលដែលយើងធ្វើបែបនេះទេ"។ ចរិយា បន្ថែមដូច្នេះ៕ ចុះប្រិយមិត្តវិញ យល់ឃើញយ៉ាងណាដែរ លើការលើកឡើងខាងលើនេះ?

អត្ថបទ៖ យិន សំបូរ