អ្នកជំនាញបង្ហាញពីគុណភាពស្មៅសិប្បនិម្មិតកីឡដ្ឋានវេស្ទើន
- 2014-12-18 22:16:42
- ចំនួនមតិ 0 | ចំនួនចែករំលែក 0
អ្នកជំនាញបង្ហាញពីគុណភាពស្មៅសិប្បនិម្មិតកីឡដ្ឋានវេស្ទើន
ចន្លោះមិនឃើញ
ក្លិបបាល់ទាត់វេស្ទើនយូនីអេហ្វស៊ីកំពុងកសាងកីឡដ្ឋានដើម្បីត្រៀមខ្លួនរៀបចំការប្រកួតលីកបាល់ទាត់កំពូលកម្ពុជារដូវកាលក្រោយដែលគ្រោងឲ្យមានការប្រកួតក្នុងដីនិងក្រៅដី (Home/Away)។
លោក ខឹម ណាដែន អ្នកទទួលបន្ទុកកសាងទីលានបាល់ទាត់វេស្ទើនមកពីក្រុមហ៊ុន Grass Deco Com បានឲ្យដឹងថា ទីលានវេស្ទើនចាប់ផ្តើមធ្វើពីថ្ងៃទី៩ ខែតុលាឆ្នាំ២០១៤ដល់ថ្ងៃទី២៥ ខែមករា ឆ្នាំ២០១៥នឹងបញ្ចប់រួចជាស្ថាពរ ហើយអាចដំណើរការប្រកួតបាន។ ការធ្វើទីលាននេះស្មៅសិប្បនិម្មិត និងជ័រនាំចូលមកពីប្រទេសចិនដែលទទួលស្គាល់ដោយសហព័ន្ធកីឡាអន្តរជាតិ FIFA ប៉ុន្តែប្រភពដើមរបស់ក្រុមហ៊ុនមកពីប្រទេសអ៊ីតាលី។
លោកបន្តឲ្យដឹងថា នៅជុំវិញទីលានមានលូបង្ហូរទឹកដែលពេលមានភ្លៀងគឺទឹកហូរបានលឿនដោយគ្មានការរំខានដល់ការប្រកួតឡើយ។ ទីលាននេះក្រាលស្មៅសិប្បនិម្មិតកម្ពស់៦០មីលីម៉ែត្រ និងចាក់ខ្សាច់ក្នុងស្មៅកម្ពស់៣០ទៅ៤០មីលីម៉ែត្រ រួចចាក់ជ័រកៅស៊ូពីលើខ្សាច់កម្ពស់១០ទៅ១៥មីលីម៉ែត្រទៀត។ ប្រសិនប្រើប្រាស់តាមបច្ចេកទេសត្រឹមត្រូវ គុណភាពរបស់វាអាចប្រើបានពី៨ទៅ១០ឆ្នាំ ហើយក្រុមហ៊ុនធានាគុណភាព និងពណ៌រយៈពេល៦ឆ្នាំ។ កីឡដ្ឋាននេះស្ថិតនៅតាមបណ្ដោយផ្លូវ ១៩៦៦ ក្នុងភូមិ ទំនប់ សង្កាត់ ភ្នំពេញថ្មី ខណ្ឌ សែនសុខ រាជធានីភ្នំពេញ៕
អត្ថបទ៖ ជាន ចាន់រ៉ា