រំលឹក! ភាពយន្តទាំង ៣ រឿង ទាក់ទងនឹងរបបខ្មែរក្រហមរបស់ផលិតករខ្មែរ លេចធ្លោខ្លាំងលើឆាកអន្តរជាតិ

2015-01-07 18:30:20
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នជនរងគ្រោះក្នុងរបបខ្មែរក្រហម ត្រូវបានគេយកចិត្តទុកដាក់ ទាំងផ្លូវកាយ និងផ្លូវចិត្ត។ ជាមួយគ្នានោះមានភាពយន្ត ដែលឆ្លុះបញ្ចាំងពីប្រវត្តិសាស្ត្រជូរចត់ខាងលើបានផលិតឡើងជាស្នាដៃផលិតករខ្មែរ។ ប៉ុន្តែ គេកត់សម្គាល់ឃើញថា មានស្នាដៃរបស់ផលិតករខ្មែរចំនួន ៣ រឿង ប៉ុណ្ណោះ ដែលលេចធ្លោលើឆាកអន្តរជាតិ និង បានទទួលការកោតសរសើរពីបណ្ដាប្រទេសជាច្រើន ហើយទទួលពានរង្វាន់ផ្សេងៗទៀតផង ចំពោះសមិទ្ធផលភាពយន្តប្រកបដោយភាពច្នៃប្រឌិតទាំងនោះ។

១. រឿង ឃ្លាតទៅសែនឆ្ងាយ ៖ ផលិតឡើងដើម្បីឧទ្ទិសដល់ជនរងគ្រោះទាំងអស់ ដែលបាត់បង់ជីវិត បាត់បង់ឪពុកម្ដាយ បងប្អូន ជីដូនជីតា និងញាតិសន្តាននៅក្នុងរបបកម្ពុជាប្រជាធិបតេយ្យ។ នៅក្នុងខ្សែភាពយន្តនេះ លោកឆាយ បូរ៉ា អ្នកដឹកនាំរឿង បានរៀបរាប់ពីប្រវត្តិពិតរបស់ស្ត្រីជាម្ដាយម្នាក់ ដែលបានឆ្លងកាត់ការលំបាក ការព្រាត់ប្រាស ការតស៊ូ រហូតដល់ការរស់រានមានជីវិតជាថ្មីចេញពីរបបខ្មែរក្រហម។

ខ្សែភាពយន្តថ្មីនេះ ត្រូវបានគេចាត់ទុកថា ជាខ្សែភាពយន្ត ដែលមានមនោសញ្ចេតនាស៊ីជម្រៅ។ ដើមឆ្នាំ ២០១៤ មានរោងភាពយន្តធំពីរនៅសហរដ្ឋអាមេរិក និង សាកលវិទ្យាល័យចំនួន ៥ បានយកទៅចាក់បញ្ចាំងឲ្យទស្សនិកជន និង និស្សិតជាច្រើននៃសាលារបស់ពូកគេបានទស្សនា ជាការស្វែងយល់បន្ថែមទៀតពីរបបនេះ។ ក្រៅពីចាក់បញ្ចាំងក្នុងស្រុករកលុយជួយកុមារកំព្រាហើយនោះ លោក ឆាយ បូរ៉ា ត្រូវបានភាគីប្រទេសជាច្រើននៅអាស៊ី អញ្ជើញឲ្យនាំភាពយន្តនេះ ទៅចាក់បញ្ចាំងក្នុងប្រទេសទាំងនោះផងដែរ។

២. រឿង“កង្វះរូបភាព” (ជាភាសាបារាំង Image manquante, ភាសាអង់គ្លេស The Missing Picture) ៖ គឺជាចំណងជើងភាពយន្ត ដែលជាស្នាដៃរបស់សមិទ្ធិករខ្មែរ លោក រិទ្ធី ប៉ាន់។ ជាភាពយន្តឯកសារថ្មី ក្នុងទម្រង់ថ្មី ដែលមានការច្នៃប្រឌិតខ្ពស់ ដោយយកដីឥដ្ឋដុំប៉ិនមេដៃច្នៃធ្វើជារូបរាងតួសម្ដែង។ លោកហាក់ដក់អារម្មណ៍ជាប់នឹងប្រធានបទដដែល គឺទាក់ទងនឹងប្រវត្តិរឿងអតីតក្នុងសម័យខ្មែរក្រហមក្នុងរវាងឆ្នាំ ១៩៧៥-១៩៧៩ ធ្វើឲ្យប្រជាជនខ្មែររាប់លាននាក់បាត់បង់ជីវិត។ ក្នុងនោះក៏មានឪពុកម្ដាយបងប្អូនបង្កើតរបស់លោក រិទ្ធី ប៉ាន ផងដែរ។

កង្វះរូបភាព របស់កម្ពុជាមានកិត្តិយស មានឈ្មោះក្នុងពិភពភាពយន្តអន្តរជាតិ ព្រោះអាចចាត់ទុកថា ជាលើកទី១ ដែលបានចូលរួមប្រកួតប្រជែងក្នុងមហោស្រពភាពយន្តក្រុងកាន និង ដណ្ដើមពានរង្វាន់ “Un certain Regard” ដែលជារង្វាន់លំដាប់ទីពីរ បន្ទាប់ពី តាលបត្រមាស (Palme d’Or) ក្នុងក្របខ័ណ្ឌមហោស្រពអន្តរជាតិលើកទី ៦៦ ឆ្នាំ២០១៣។

ភាពយន្តពោរពេញដោយការច្នៃប្រឌិតនេះ ក៏មានគ្រប់លក្ខខណ្ឌឡើងដល់វគ្គផ្ដាច់ព្រ័ត្រក្នុងចំណោមភាពយន្ត៥ចំណងជើងចុងក្រោយ នៃការដណ្ដើមពានរង្វាន់ Oscar។ ក្រៅពីនេះលោក រិទ្ធី ប៉ាន ក៏បាននាំយកភាពយន្តនេះទៅកាន់ប្រទេសផ្សេងទៀតជាច្រើន និង បានទៅធ្វើបទបង្ហាញក្នុងកម្មវិធីទាក់ទងនឹងភាពយន្ត។

៣. រឿង "ដុំហ្វ៊ីលចុងក្រោយ" ឬ "The Last Reel” ៖ របស់អ្នកស្រី សុទ្ធោ គុល្លិការ ខ្សែភាពយន្តមួយដែលបានបាត់បង់ លិចកប់ក្នុងវាលពិឃាដ បង្ហាញពីការបកស្រាយផ្សេងៗគ្នានៃការពិត។ "ដុំហ្វ៊ីលចុងក្រោយ" មានគោលបំណងដោះស្រាយវិបត្តិ និង លុបលាងនូវស្នាមរបួសចាស់ ដែលសេសសល់ពីអតីតកាល អាចនិយាយបានថា ជាការផ្សះផ្សាផ្លូវចិត្ត។

នេះជាខ្សែភាពយន្តខ្មែរដែលទើបទទួលបានពានរង្វាន់ "ដួងព្រលឹងអាស៊ី" នៅទីក្រុងតូក្យូប្រទេសជប៉ុន និង បានយកមកចាក់បញ្ចាំងជាលើកដំបូងនៅកម្ពុជាក្នុងមហោស្រពភាពយន្តអន្តរជាតិកម្ពុជាលើកទី៥ថ្មីៗនេះ។ បើតាមអ្នករៀបចំកម្មវិធីបាននិយាយថា "ដុំហ្វ៊ីលចុងក្រោយ" ទទួលបានការគាំទ្រយ៉ាងខ្លាំង ពីសំណាក់អ្នកទស្សនាផ្ទាល់នៅក្នុងមហោស្រពភាពយន្តភាពយន្តនេះ បើប្រៀបធៀបជាមួយខ្សែភាពយន្តជាច្រើនទៀត៕