ឃីម ឌីម៉ា ប្រាប់ហេតុផលពីការចាញ់ប៉ុន្មានប្រកួតចុងក្រោយ

2015-01-13 13:21:35
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរនាគខ្មៅ ឃីម ឌីម៉ា បានរៀបរាប់ហេតុផលខ្លះៗដែលបណ្ដាលឲ្យរូបគេចាញ់ការប្រកួតប៉ុន្មានលើកចុងក្រោយដែលការប្រាប់ឲ្យដឹងនេះ បន្ទាប់ពីរូបគេបានចាញ់កីឡាករថៃ Kaitongs កាលពីថ្ងៃអាទិត្យកន្លងទៅនៅសង្វៀនបាយ័ន។

និយាយពីបរាជ័យចុងក្រោយបំផុតនេះ ឃីម ឌីម៉ាបានប្រាប់ថា Kaitongs Wirachai ពិតជាកីឡាករដែលពិបាកយកឈ្នះមែន ពីព្រោះគេមានសមត្ថភាពប្រកួតខ្ពស់ និងបទពិសោធន៍ច្រើន។ ទោះជាយ៉ាងណារូបគេមិនអស់ចិត្តឡើយសម្រាប់ការបរាជ័យនេះ ដូច្នេះបើមានឱកាសរូបគេនឹងសងសឹកឲ្យទាល់តែបាន។ ឃីម ឌីម៉ា បានប្រាប់ ៖«ចាញ់ប៉ុន្មានប្រកួតចុងក្រោយនេះ មិនមែនដោយសារូបខ្ញុំចង់ឲ្យចាញ់នោះទេ តែអាចមកពីខ្ញុំហ្វឹកហាត់មិនបានល្អ។ ដឹងស្រាប់ហើយ ខ្ញុំជាប់ហ្វឹកហាត់ប៉ូលិស អីចឹងខ្ញុំអត់សូវបានហ្វឹកហាត់ដិតដល់ទេ»។

ឃីម ឌីម៉ា (ខោខ្មៅ)ប្រកួតនឹងកីឡាករម៉ាឡេស៊ី(ខោក្រហម)

ទោះបីជាយ៉ាងណា ឌីម៉ាបានបញ្ជាក់ថា រូបគេនឹងខំប្រឹងហ្វឹកហាត់ និងស្តារមុខមាត់ឡើងវិញ បន្ទាប់ពីការហ្វឹកហាត់ប៉ូលិសបញ្ចប់នៅខែ ឧសភា ឆ្នាំ២០១៥ខាងមុខ។ កាលពីឆ្នាំ២០១៤កីឡាករមកពីខេត្តបន្ទាយមានជ័យរូបនេះត្រូវបានគេរំពឹងថានឹងក្លាយជាជើងឯកក្នុងការប្រកួតដណ្តើមខ្សែក្រវាត់មួយនៅសង្វៀនស៊ីធីអិន ប៉ុន្តែបែរជាចាញ់កីឡាករស្រករក្រោយ កន ចន្ថានៅវគ្គពាក់កណ្ដាលផ្ដាច់ព្រ័ត្រដែលទីបំផុតរូបគេបានត្រឹមចំណាត់ថ្នាក់លេខ៣។ បន្ទាប់មកកីឡាកររូបនេះបានចាញ់កីឡាករមកពីប្រទេសឡាវក្នុងព្រឹត្តិការណ៍ប្រដាល់អន្តរជាតិអាស៊ានវគ្គ៣របស់សង្វៀនស៊ីធីអិនដែលបានក្លាយជាអ្នកចាញ់ម្នាក់គត់ក្នុងចំណោមកីឡាករកម្ពុជាទាំង៥រូប មុនពេលចាញ់កីឡាករថៃនៅសង្វៀនបាយ័នចុងក្រោយនេះ៕ អត្ថបទ៖ ស្រី សុវណ្ណដារ៉ា 