បុរីនៅភ្នំពេញច្រើនស្អេកស្កះ ដឹងមានប៉ុន្មានអត់?
- 2015-01-14 14:00:50
- ចំនួនមតិ 0 | ចំនួនចែករំលែក 0
បុរីនៅភ្នំពេញច្រើនស្អេកស្កះ ដឹងមានប៉ុន្មានអត់?
ចន្លោះមិនឃើញ
ឯកឧត្ដម ប៉ា សុជាតិវង្ស អភិបាលរាជធានីភ្នំពេញបានឲ្យដឹងថា ក្នុងរាជធានីភ្នំពេញ បច្ចុប្បន្នមានបូរីទាំងអស់ ៧៤ កំពុងតែដំណើរការដោយនៅក្នុងនោះ គ្រាន់តែ ខណ្ឌ សែន សុខមានជាង ២០ បុរី ។
ថ្លែងក្នុងពិធីសម្ពោធបើកការដ្ឋានក្រុមហ៊ុនអ័រគីដេវិឡា ដែលមានទីតាំងស្ថិតតាមបណ្ដោយផ្លូវ ២០០៤ ក្នុងសង្កាត់ទឹកថ្លា ខណ្ឌសែនសុខ កាលពីថ្ងៃអាទិត្យកន្លងទៅ ឯកឧត្ដម ប៉ា សុជាតិវង្ស បានឲ្យដឹងទៀតថា រាជធានីភ្នំពេញមានផ្ទៃដីទាំងអស់សរុប ៦៧៨ គីឡូម៉ែត្រការ៉េ ក្នុងនោះមាន ១២ ខណ្ឌ ចែកជា ៩៦ សង្កាត់ និង មានភូមិ ៩០៩ និង ប្រជាជនប្រមាណជាង ២ លាននាក់។
តាមការវាយតម្លៃពីក្រុមអចលនទ្រព្យមួយចំនួនបុរី ប្រភេទផ្ទះ ល្វែងត្រូវបានដាក់លក់ចាប់ពីជាង២ម៉ឺនដុល្លារ រហូតជាង ១០ ម៉ឺនដុល្លារ ចំពោះផ្ទះវិឡា មានតម្លៃចាប់ពី ជាង ១០ ម៉ឺនដុល្លារ រហូតជាង ៦០ ម៉ឺនដុល្លារ អាស្រ័យទៅលើទីតាំងនៃបុរីនីមួយៗ ។
ឯកឧត្ដម ប៉ា សុជាតិវង្ស អភិបាលរាជធានីភ្នំពេញ បានលើកឡើងថា អ្នកដែលមានបំណងទិញផ្ទះនៅតាមបុរីទាំងអស់ត្រូវសម្រេចឲ្យបានច្បាស់មុនសម្រេចចិត្តទិញ ព្រោះបច្ចុប្បន្នមានបុរីមួយចំនួន មិនទាន់មានច្បាប់អនុញ្ញាតត្រឹមត្រូវឡើយ។
ឯកឧត្ដម បានបង្ហាញថា ដើម្បីទិញផ្ទះឲ្យមានសុវត្ថិភាពទាំងផ្លូវច្បាប់ ម្ចាស់ផ្ទះទាំងអស់ត្រូវ ពិនិត្យលើប្លង់គោល និង ច្បាប់អនុញ្ញាតពីក្រសួងស្ថាប័នពាក់ព័ន្ធជាពិសេស ។ គុណភាពសំណង់ ប្រព័ន្ធលូ បរិស្ថាន និង សេវាសាធារណៈរដ្ឋ និង ឯកជនជាដើម ជាចំណុចសំខាន់ផងដែរ។
ឯកឧត្ដម លើកឡើងថា កន្លងមកមានបុរីមួយចំនួនធ្វើឡើងដើម្បីតែប្រាក់ចំណេញតែប៉ុណ្ណោះ ក្រោយពីលក់ដាច់អស់រត់ចោលអ្នកទិញ ពេលផ្ទះ ឬ ប្រព័ន្ធលូ មានបញ្ហាមិនបានដោះស្រាយជូនម្ចាស់ផ្ទះឡើយ ដូចនេះ អ្នកដែលមានប្រាក់ទិញផ្ទះទាំងអស់ត្រូវតែដឹងពីចំណុចដែលបានលើកឡើងនេះ៕
អត្ថបទ៖ ខុស សីហា