ក្រសួងវប្បធម៌ និង វិចិត្រសិល្បៈ គាំទ្រប្រលោមលោក Sabay ១០០ភាគរយ

2015-01-29 22:44:50
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីព្រឹកមិញនេះ ក្រសួងវប្បធម៌ និង វិចិត្រសិល្បៈ បានប្រគល់លិខិតគាំទ្រ និង លើកទឹកចិត្តដល់ប្រលោមលោក Sabay ដែលមានស្នាដៃរួមចំណែកក្នុងការលើកស្ទួយវិស័យអក្សរសាស្ត្រ និងអក្សរសិល្ប៍ជាតិ ជាពិសេស ការចូលរួមរបស់យុវជនក្នុងការលើកកម្ពស់សីលធម៌ គុណធម៌ ប្រពៃណី និងទំនៀមទម្លាប់ដ៏ល្អប្រពៃរបស់ជាតិ។

ឯកឧត្ដម ហាប់ ទូច អគ្គនាយកនៃអគ្គនាយកដ្ឋានបច្ចេកទេសវប្បធម៌ (រូបខាងឆ្វេង)

"ក្រសួងគាំទ្រ និងលើកទឹកចិត្តដល់ក្រុមហ៊ុន Sabay ទាំងស្រុងដែលបានផ្ដួចផ្ដើមបង្កើតកម្មវិធីប្រលោមលោកអនឡាញ ដើម្បីរួមចំណែកលើកស្ទួយអក្សរសាស្ត្រខ្មែរ និងជំរុញទម្លាប់នៃការអាន និងការសរសេររបស់យុវជនសម័យថ្មី"។ ឯកឧត្ដម ហាប់ ទូច អគ្គនាយកនៃអគ្គនាយកដ្ឋានបច្ចេកទេសវប្បធម៌ និងជាតំណាងដ៏ខ្ពង់ខ្ពស់របស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ មានប្រសាសន៍បែបនេះក្នុងឱកាសប្រគល់លិខិតគាំទ្រប្រលោមលោក Sabay។

ឯកឧត្ដមបានបន្ថែមថា Sabay កំពុងធ្វើការងារល្អទាក់ទងនឹងវប្បធម៌នៃការអាន ខណៈដែលទម្លាប់នៃការអានរបស់យុវវ័យខ្មែរនៅមានកម្រិតនៅឡើយ បើធៀបនឹងបណ្ដាប្រទេសផ្សេងៗទៀត។

ប្រលោមលោក Sabay ជាប្រលោមលោកបែបទំនើបដែលឆ្លុះបញ្ចាំងពីតថភាពនៃជីវិតរស់នៅរបស់យុវវ័យខ្មែរនាសម័យបច្ចុប្បន្ន។ អ្នកលេងអ៊ីនធឺណិតទាំងអស់អាចចូលអានរឿងប្រលោមលោក Sabay គ្រប់ប្រភេទលើគេហទំព័រ Sabay.com ដោយឥតគិតថ្លៃ។

ក្នុងរយៈពេល ២ឆ្នាំមកនេះ Sabay បានចេញផ្សាយប្រលោមលោកខ្នាតខ្លី និង ខ្នាតវែងចំនួន ៨៤រឿង ដែលមានចំនួនអ្នកអានមិនក្រោម ១ម៉ឺននាក់ឡើយក្នុងមួយរឿង៕

ចុចត្រង់នេះដើម្បីអានប្រលោមលោក Sabay គ្រប់ប្រភេទ...