ហាត់ខ្លាំងប៉ុណ្ណឹង ផល សោភ័ណ្ឌ អាចផ្តួលដៃគូអាទិត្យនេះបានទេ?
- 2015-01-30 23:15:23
- ចំនួនមតិ 0 | ចំនួនចែករំលែក 0
ហាត់ខ្លាំងប៉ុណ្ណឹង ផល សោភ័ណ្ឌ អាចផ្តួលដៃគូអាទិត្យនេះបានទេ?
ចន្លោះមិនឃើញ
អ្នកប្រដាល់កំពុងទទួលបានប្រជាប្រិយភាព ផល សោភ័ណ្ឌ កំពុងខិតខំហ្វឹកហាត់យ៉ាងខ្លាំងដើម្បីទទួលស្វាគមន៍អ្នកប្រដាល់ឆ្លងដែនថៃនៅសង្វៀនអាស៊ីអាគ្នេយ៍នាព្រឹកថ្ងៃអាទិត្យ ទី១ ខែកុម្ភៈ ឆ្នាំ២០១៥នេះ។
ផល សោភ័ណ្ឌបានប្រាប់ថា រូបគេមិនបានដឹងពីសមត្ថភាពរបស់គូប្រកួតនាថ្ងៃអាទិត្យនេះឡើយ សូម្បីស្ថិតិនៃការប្រកួតរបស់គេក៏អត់ដឹងដែរ ប៉ុន្តែនៅតែបង្កើនការហ្វឹកហាត់ខ្លាំងទេ្វដងដើម្បីត្រៀមប្រកួត។
«ខ្ញុំមានសង្ឃឹមច្រើនសម្រាប់ការប្រកួតនេះ ព្រោះខ្ញុំហ្វឹកហាត់បានដិតដល់។ ខ្ញុំអត់គិតថា ត្រូវប្រើស្នៀតមួយមួយណាផ្តួលគេទេ ឲ្យតែមានឱកាស ខ្ញុំផ្តួលហើយ មិនថាកែង កណ្តាប់ដៃ ឬជង្គង់ទេ។ ខ្ញុំហាត់ពីម៉ោង៥ដល់ម៉ោង៨ព្រឹក និងពេលរសៀលពីម៉ោង៣ដល់៥ល្ងាច»។ ផល សោភ័ណ្ឌបានប្រាប់។
កីឡាករ ផល សោភ័ណ្ឌ
អតីតកីឡាករប្រដាល់សាកលជម្រើសជាតិរូបនេះបន្ថែមថា ក្រៅពីការហ្វឹកហាត់ អាហារក៏ជាកត្តាសំខាន់សម្រាប់កីឡាករម្នាក់ៗ។ ដោយសារជីវភាពគ្រួសាររបស់គេសមរម្យ រូបគេមានមិនសូវអាហារបំប៉នសម្រាប់ការហ្វឹកហាត់។
កីឡាករដែលទើបរៀបការជាមួយភរិយាជាអាជីវករនៅផ្សារបន្ទាយស្រីបានប្រាប់ថា ៖«ឪពុកម៉ែខ្ញុំបានត្រៀមអាហារបំប៉នឲ្យខ្ញុំរាល់ថ្ងៃដូចជា សាច់គោ សាច់ជ្រូក ស៊ុប ពង់ទាកូន និងភេសជ្ជៈជាដើម។ បើហ្វឹកហាត់ខ្លាំង ហើយខ្វះអាហារូបត្ថម្ភ អាចធ្វើឲ្យយើងធ្លាក់ខ្លួនឈឺ អីចឹងត្រូវមានអាហារគ្រប់គ្រាន់»។
ចំណែកគ្រូបង្វឹកលោកតា ញ៉ូវ ម៉ាក់បានផ្តល់គំនិតថា ជំហានដំបូងក្នុងទឹកទីមួយត្រូវធ្វើតេស្តជើងក្រោម បើគេចូលវាយត្រង់ សោភ័ណ្ឌត្រូវគេចចេញ ហើយវាយបកតាមបច្ចេកទេស។ បើគេសម្រុកបុកខ្លាំង សោភ័ណ្ឌត្រូវព្យាយាមចូលអោប ហើយរុញទៅដល់ខ្សែសង្វៀនដើម្បីឲ្យអាជ្ញាកណ្តាលជួយបំបែក។
តាំងពីឆ្នាំ២០១៤រហូតដល់ពេល ផល សោភ័ណ្ឌមិនទាន់ស្គាល់ថាចាញ់ឡើយពេលប្រកួតនឹងកីឡាករបរទេស។ ប៉ុន្តែប្រកួតកន្លងមករូបគេសុទ្ធតែផ្តួលកីឡាករបរទេសឲ្យសន្លប់ទាំងអស់៕ វីដេអូ ផល សោភ័ណ្ឌ ហ្វឹកហាត់ http://youtu.be/OxsRtwAG0IE
អត្ថបទ៖ ជាន ចាន់រ៉ា