ក្រុមកូនខ្មែរ-បារាំង Cascade ធ្លាក់នៅវគ្គផ្ដាច់ព្រ័ត្រ France's Got Talent

2015-01-31 18:55:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមក្បាច់គុន Cascade ដែលមានកូនខ្មែរ-បារាំង Maurice Chan និង Nop David ជាសមាជិកមិនបានទទួលជ័យជម្នះនៅវគ្គផ្ដាច់ព្រ័ត្រកម្មវិធី France's Got Talent ដែលទើបកន្លងផុតទៅប៉ុន្មានថ្ងៃមុននេះឡើយ។

តំណាងក្រុម Cascade លោក Maurice Chan បានប្រាប់ Sabay ថា ក្រុមរបស់លោកជាប់ចំណាត់ថ្នាក់លេខ ៧ ក្នុងចំណោម ១០ ក្រុមដែលឈានដល់វគ្គផ្ដាច់ព្រ័ត្រ។ ក្រុមដែលជាជយលាភីកម្មវិធី France's Got Talent 2014 គឺធ្លាក់ទៅលើក្រុមតន្ត្រី The Bagad of Vannes។

ទោះជាមិនជាប់ជាជយលាភីប្រចាំកម្មវិធីក្ដី លោកថា ក្រុមរបស់លោកមានមោទនភាពជាខ្លាំងដែលបានឈានចូលវគ្គផ្ដាច់ព្រ័ត្រ ព្រោះវាស្របតាមគោលបំណងរបស់លោកដែលចង់បង្ហាញប្រជាជនបារាំងថា ក្រុមរបស់ខ្លួនអាចបង្ហាញឈុតឆាកវាយប្រហារដូចនៅក្នុងកុនដែរ។

ក្រុម Cascade ក្នុងវគ្គផ្តាច់ព្រ័ត្រកម្មវិធី France's Got Talent

គណៈកម្មការម្នាក់ក្នុងចំណោមគណៈកម្មការទាំងបួនចាប់អារម្មណ៍នឹងសមត្ថភាពរបស់ក្រុមលោក និងបានទាក់ទងឲ្យថតកម្មវិធីទូរទស្សន៍មួយនៅអ៊ីតាលីទៀតផង។

ពេលសួរពីគម្រោងបន្ទាប់ចង់ធ្វើអ្វី Maurice Chan ឲ្យដឹងថា បច្ចុប្បន្នក្រុមរបស់លោកកំពុងបង្កើត Show ថ្មីមួយសម្រាប់ The Aquarium of Paris។ លោកក៏នឹងធ្វើ Show ផ្សេងទៀតដែលលាយបញ្ចូលគ្នានូវការសម្ដែងវិជ្ជាគុន និងឈុតឆាកកំប្លែង។ អ្វីដែលកាន់តែគួរឲ្យចាប់អារម្មណ៍ទៅទៀតនោះ គឺលោកមានគម្រោងមកកម្ពុជានៅក្នុងឆ្នាំនេះ ដើម្បីស្វែងរកដៃគូសហការផលិតភាពយន្តបែបវាយតប់បាញ់ប្រហារដែលជាជំនាញរបស់ក្រុមលោកស្រាប់។

ពាក់ព័ន្ធនឹងចម្ងល់ថា ម៉េចបានជាជ្រើសរើសកម្ពុជាមកថត ហើយរឿងដែលលោកចង់ថតនោះជាប្រភេទរឿងអ្វី បុរសអ្នកលេងក្បាច់គុនដដែលនិយាយថា ព្រោះកម្ពុជាជាប្រទេសរបស់លោក។ ហើយលោកចង់បង្ហាញពិភពលោកថា កម្ពុជាអាចផលិតកុនវាយតប់មានគុណភាពដូចប្រទេសផ្សេងៗទៀតដែរ។

Murice ថា លោកមានសាច់រឿងក្នុងដៃអស់ហើយ រង់ចាំតែដៃគូសហការប៉ុណ្ណោះ។ សម្រាប់អ្នកវិនិយោគ ឬផលិតករដែលមានចំណាប់អារម្មណ៍អាចទាក់ទងទៅកាន់លោកផ្ទាល់តាមរយៈអ៊ីមែល៖ maurice.chan@cascade-demoteam.com។

សូមទស្សនាការសម្ដែងរបស់ Cascade នៅវគ្គផ្ដាច់ព្រ័ត្រ៖