ជោគជតារាសីសម្រាប់អ្នកកើតឆ្នាំមមែ ក្នុងឆ្នាំថ្មីតាមក្បួនចិន

2015-02-20 15:25:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនទូទាំងប្រទេសចិនកំពុងរីករាយអបអរពិធីបុណ្យចូលឆ្នាំថ្មី ឆ្នាំមមែ ដែលជាសត្វទី៨ នៅក្នុងរាសីចក្រ (សត្វទាំង១២ តំណាងឆ្នាំនីមួយៗ)។ នៅតាមផ្ទះនានា មានការសែនព្រេន និងតុបតែងលម្អដោយក្រដាសពណ៌ក្រហម ដែលគេមានជំនឿថាអាចនាំមកនូវសំណាងល្អ និងរកស៊ីមានបានកើនទ្រព្យឆាប់ៗ។ ជាមួយគ្នានេះដែរ មនុស្សមួយចំនួនបានរកគ្រូចិនសែទាយ ដើម្បីដឹងពីជើងលេខឆ្នាំថ្មី ជោគជតារាសីតាមហុងស៊ុយ និងអ្វីដែលគួរចៀសវាង ងាយស្រួលរកវិធីទប់ស្កាត់ជាមុន។ យ៉ាងណាមិញ តាមគេហទំព័រមួយរបស់ចិន បានបង្ហាញពីជោគជតារាសីឆ្នាំថ្មី ឆ្នាំមមែ តាមក្បួនចិនសែដូចខាងក្រោម៖

បុគ្គលិកលក្ខណៈរបស់អ្នកកើតឆ្នាំមមែ (ស្ងប់ស្ងាត់ ស្លូតបូត)

អ្នកកើតឆ្នាំមមែ រមែងមានចិត្តស្លូតបូត សុភាពរាបសារ អៀនប្រៀនច្រើន មានចិត្តសណ្តោសប្រណី ចូលចិត្តរាប់អានញាតិ ព្រមទាំងមានការវិនិច្ឆ័យខ្ពស់ ប្រកបដោយក្ដីករុណា និងហេតុផល។ មនុស្សកើតឆ្នាំនេះ ភាគច្រើនមានការតស៊ូ ភាពច្នៃប្រឌិតខ្ពស់ និងមានជំនាញច្បាស់លាស់។ បើទោះបីមុខរបស់គេ មើលទៅដូចជាសុភាពមែនពិត ប៉ុន្តែគំនិតជ្រៅនិងមានការគិតជាប់ជានិច្ច។

យ៉ាងណាមិញ មនុស្សកើតឆ្នាំមមែ មានចំណុចប្លែកខុសពីគេមួយ គឺពេញចិត្តធ្វើការងារជាក្រុម តែមិនចង់ឲ្យអ្នកដទៃចាប់អារម្មណ៍លើខ្លួនទេ។ ពួកគេច្រើនរក្សាភាពស្ងៀមស្ងាត់ ជាជាងឆ្ការដៃឆ្ការជើងនៅពីមុខអ្នកដទៃ ព្រោះចង់ទុកពេលសម្រាប់គិតច្រើនជាង។ ម្យ៉ាងវិញទៀត អ្នកកើតឆ្នាំមមែ ច្រើនដៃទូលាយ ចូលចិត្តចាយលុយទិញរបស់ល្អៗប្រើប្រាស់ ប៉ុន្តែមិនវាយឫកទេ ហើយចេះដាក់ខ្លួនគោរពអ្នកដទៃ។

និស្ស័យការងារសម្រាប់អ្នកកើតឆ្នាំមមែ

ដៃគូការងារល្អបំផុតសម្រាប់ឆ្នាំមមែ គឺឆ្នាំមមី ព្រោះឆ្នាំទាំងពីរអាចនឹងសហប្រតិបត្តិការគ្នាបានល្អ ហើយអ្នកកើតក្នុងឆ្នាំទាំងពីរនេះ សុទ្ធតែមិនឈ្លក់វង្វេងជាមួយឋានៈ និងអំណាចដូចគ្នា។ ចំណែកជម្រើសការងារដែលល្អបំផុតនោះគឺ គ្រូពេទ្យជំងឺកុមារ តារាសម្ដែង គ្រូបង្រៀនកុមារ អ្នករចនាម៉ូដ អ្នកលក់ផ្កា អ្នកច្នៃម៉ូដសក់ តន្ត្រីករ អ្នកនិពន្ធ ជាងគំនូរ និងគ្រូបង្រៀនប្រវត្តិសិល្បៈ ព្រោះការងារទាំងនេះសុទ្ធតែទាមទារភាពអំណត់តស៊ូ ដែលត្រូវនឹងបុគ្គលិកលក្ខណៈស្ងប់ស្ងាត់របស់អ្នកកើតឆ្នាំមមែ។

ស្នេហា និងទំនាក់សម្រាប់អ្នកកើតឆ្នាំមមែ

ចំពោះអ្នករៀបការហើយ នឹងអាចបន្តចំណងស្នេហ៍ស្អិតល្មួតជាមួយដៃគូ ហើយជម្លោះតិចតួចដែលធ្លាប់កើតមានជាប្រចាំនាពេលកន្លងមក នឹងអាចដោះស្រាយសះជាគ្នាធម្មតាឡើងវិញ។ ចំពោះអ្នកមិនទាន់មានប្តីប្រពន្ធ ចាស់ៗកំពុងស្វែងរកដៃគូជីវិតឲ្យបណ្ដើរៗហើយ បើទោះអ្នកប្រកែកថាមិនទាន់ចង់បានក៏ពិតមែន។ យ៉ាងណាមិញ បើអ្នកមានគូស្នេហ៍ស្រាប់ហើយ គួរយកចិត្តទុកដាក់បន្តិច ចៀសវាងជម្លោះគ្រួសារដែលអាចកើតឡើងគ្រប់ពេល។

អ្វីដែលនាំសំណាងល្អសម្រាប់អ្នកកើតឆ្នាំមមែ

បើតាមហោរាសាស្ត្រចិន សត្វតំណាងឆ្នាំនីមួយៗសុទ្ធតែមានលេខសំណាង ថ្ងៃសំណាង ពណ៌សំណាង និងទិសសំណាង ដែលឆ្នាំមមែមានដូចខាងក្រោមៈ

-លេខសំណាងៈ លេខ២ ឬលេខ៧ និងចំនួនដែលមានលេខ២ និងលេខ៧ (ដូចជាលេខ២៧ និងលេខ៧២ ជាដើម)

-ថ្ងៃសំណាងៈ ថ្ងៃទី០៧ និងថ្ងៃទី៣០ គ្រប់ខែ ដោយយកទៅតាមប្រតិទិនរបស់ប្រទេសចិន

-ពណ៌សំណាងៈ ពណ៌ត្នោត ពណ៌ក្រហម និងពណ៌ស្វាយ

-ទិសសំណាងៈ ទិសខាងជើង

អ្វីដែលនាំសំណាងអាក្រក់ និងគួរចៀសវាងសម្រាប់អ្នកកើតឆ្នាំមមែ

ទន្ទឹមនឹងការបង្ហាញអ្វីដែលនាំសំណាងល្អ ក្បូនចិនដដែលនេះ ក៏បានបង្ហាញពីអ្វីដែលគួរចៀសវាងផងដែរសម្រាប់អ្នកកើតឆ្នាំមមែ ដែលមានដូចខាងក្រោមៈ

-ពណ៌នាំសំណាងអាក្រក់ៈ បៃតង ខៀវ និងខ្មៅ (មនុស្សកើតឆ្នាំមមែ គួរចៀសវាងការស្លៀកសំលៀកបំបាក់ដែលមានពណ៌ទាំងបីនេះ)

-លេខនាំសំណាងអាក្រក់ៈ លេខ៦ និងលេខ៨ (មនុស្សកើតឆ្នាំមមែ គួរចៀសវាងប្រើលេខទូរសព្ទដែលមានលេខទាំងពីរនេះច្រើន ចំណែកស្លាកលេខយានយន្តក៏មិនគួររំលងដូចគ្នា)

-ទិសនាំសំណាងអាក្រក់ៈ ទិសនិរតី (បើអាចចៀសបាន គួរកុំធ្វើដំណើរ ឬធ្វើអ្វីដែលទាក់ទងនឹងទិសនិរតី ព្រោះអាចបរាជ័យ និងនាំសំណាងអាក្រក់)

-ខែអាក្រក់បំផុតក្នុងប្រតិទិនចិនសម្រាប់អ្នកកើតឆ្នាំមមែៈ ខែ៣ ខែ៦ និងខែ១០ (ប្រសិនបើមានគម្រោងជំនួញសំខាន់ ឬរៀបចំពិធីអ្វីមួយ គួរចៀសវាងខែទាំងបីនេះ)

អ្នកកើតឆ្នាំមមែ យកកូនឆ្នាំនេះល្អ ឬអត់?

មានភាសាចិនមួយឃ្លា ដែលគេច្រើននិយាយថា (十羊九不全) "អ្នកកើតឆ្នាំមមែ មានតែម្នាក់ប៉ុណ្ណោះ ក្នុងចំណោម១០នាក់ ដែលអាចមានសុភមង្គល" មានន័យថា ក្មេងភាគច្រើនដែលកើតក្នុងឆ្នាំមមែ ច្រើនតែអាពាហ៍ពិពាហ៍បរាជ័យ គ្រួសារគ្មានក្ដីរីករាយ និងមានសំណាងអាក្រក់។ ម្យ៉ាងវិញទៀត ជនជាតិចិនភាគច្រើនជឿជាក់ថា ក្មេងកើតនៅក្នុងឆ្នាំមមែ ច្រើនធំឡើងឲ្យគេដឹកនាំ ជាជាងធ្វើអ្នកដឹកនាំគេ។ ហេតុដូច្នេះហើយ ទើបប្រជាជនចិន មិនសូវយកកូនក្នុងឆ្នាំមមែទេ ហើយពួកគេប្រាថ្នាចង់បានចំឆ្នាំមមី ដែលជាឆ្នាំចាស់វិញ ព្រោះមានសំណាងខ្លាំងជាងឆ្នាំមមែឆ្ងាយ។

អ្វីដែលបានរៀបរាប់មកខាងលើនេះ គ្រាន់តែជាការទស្សន៍ទាយជោគជតារាសីតាមក្បួនចិន ហើយសុទ្ធតែដកស្រង់ចេញពីគេហទំព័រហោរាសាស្ត្រចិនទាំងអស់។ ដូចនេះ ជឿឬមិនជឿគឺស្ថិតនៅការពិចារណារបស់ប្រិយមិត្ត៕