ភឹម តារាវិបុល និង បេប៊ី ចាប់ដៃគ្នាជាថ្មី!

2014-10-06 18:38:19
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ភឹម តារាវិបុល និងកញ្ញា បេប៊ី ចាប់ដៃគ្នាជាថ្មីក្នុងខ្សែភាពយន្តភាគរបស់ផលិតកម្ម Rock គឺរឿង មរតកបេះដូង។

ការចាប់ដៃជាថ្មី ខណៈដែលអ្នកទាំងពីរបានថតរួមគ្នាម្ដងរួចមកហើយក្នុងរឿង "ឱកូនសម្លាញ់" កំពុងតែថតសព្វថ្ងៃ។

កញ្ញា បេប៊ី និងលោក ភឹម តារាវិបុល តួឯកក្នុងរឿង មរតកបេះដូង

ក្នុងពិធីក្រុងពាលីរឿង មរតកបេះដូង ព្រឹកមិញតារាសម្ដែងលោក ភឹម តារាវិបុល និយាយថា៖"ខ្ញុំរីករាយមែនទែន បានសម្ដែងរួមគ្នាជាថ្មីជាមួយកញ្ញា បេប៊ី។ ខ្ញុំ និងដៃគូរបស់ខ្ញុំនឹងមិនធ្វើឱ្យទស្សនិកជនខកបំណងទេ"។

តារាសម្ដែងទើបវិលត្រឡប់ចូលសិល្បៈវិញបន្តថា លោក និងកញ្ញា បេប៊ី បានសហការ និងស្វែងយល់ចិត្តគ្នាច្រើនមកហើយ ដើម្បីធ្វើយ៉ាងណាឱ្យខ្សែភាពយន្តដែលលោកសម្ដែងរួមគ្នាជាតួឯកលើកដំបូងនេះ ទទួលបានការចាប់អារម្មណ៍ពីប្រិយមិត្ត ក៏ដូចជាមិត្តៗយុវវ័យពេលដាក់បញ្ចាំងលើកញ្ចក់ទូរទស្សន៍ CTNនាពេលខាងមុខ។

ក្រុមតារាសម្ដែងក្នុងរឿង មរតកបេះដូង

ជាមួយតំណែងតួឯកគ្រានេះ ធ្វើឱ្យអតីត Freshie ខាងលើរំពឹងខ្ពស់ថានឹងអាចស្ដារប្រជាប្រិយភាពបានឡើងវិញក្នុងចំណោមមហាជន ក្រោយខកខានការសម្ដែងអស់មួយរយៈមក។

ដោយឡែកដៃគូតួឯកស្រីរបស់ ភឹម តារាវិបុល កញ្ញា បេប៊ី ឯណោះវិញ បង្ហាញចំណាប់អារម្មណ៍ថា កញ្ញានឹងដាក់ចិត្តដាក់កាយខ្ពស់ដើម្បីឱ្យខ្សែភាពយន្តខាងលើមានភាពលេចធ្លោ។

“ខ្ញុំបាននិយាយជាមួយបង បុល ហើយថានឹងធ្វើយ៉ាងណាឱ្យការសម្ដែងស៊ីចង្វាក់គ្នាបំផុត ទោះជាលំដាប់បែបណាក៏ដោយ"។

មិនខុសពីអតីត Freshie ខាងលើទេ តារាសម្ដែងវ័យក្មេងរូបនេះ ក៏បានរំពឹងខ្ពស់ថានឹងទទួលការចាប់អារម្មណ៍ពីប្រិយមិត្តផងដែរពេលខ្សែភាពយន្ត មរតកបេះដូងដាក់បញ្ចាំងនៅ CTN។

លោក អ៊ិន សុភិន ជាអ្នកនិពន្ធខ្សែភាពយន្ត "មរតកបេះដូង" លើកឡើងថា ខ្សែភាពយន្តនេះនឹងចាប់ផ្ដើមថតនាពេលឆាប់ៗដើម្បីដាក់បញ្ចាំងឱ្យទស្សនិកជនទស្សនា។ "ចប់ក្រុងពាលីហ្នឹងយើងចេញថត ព្រោះអីខ្ញុំគិតថាខ្សែភាពយន្តល្អអាចនឹងធ្វើឱ្យទស្សនិកជនពេញចិត្ត"។

អ្នកនិពន្ធរូបនេះបន្តថា សាច់រឿងទាំងមូលនឹងធ្វើឱ្យទស្សនិកជនចាប់អារម្មណ៍ ព្រោះបានបញ្ចូលទាំងឈុតអប់រំ រួមនឹងភាពកំប្លុកកំប្លែង ស្នេហាកាច់កុងគ្នាជាច្រើន។

នេះជាលើកទីពីរហើយសម្រាប់លោក ភឹម តារាវិបុល និងកញ្ញា បេប៊ី ត្រូវចាប់ដៃគ្នាក្នុងការថតខ្សែភាពយន្តភាគឱ្យទូរទស្សន៍ CTN បន្ទាប់ពីរឿង "ឱកូនសម្លាញ់"។ សម្រាប់អតីត Freshie ភឹម តារាវិបុល លោកធ្លាប់ធ្វើឱ្យទស្សនិកជនចាប់អារម្មណ៍ខ្សែភាពយន្តភាគរឿង "អច្ឆរិយស្នេហ៍"។ ដោយឡែកតារាសម្ដែងវ័យក្មេងកញ្ញា បេប៊ី ក៏ធ្វើឱ្យទស្សនិកជនចាប់អារម្មណ៍ច្រើនដែរសម្រាប់ការថតរឿងភាគ និងរឿងដាក់បញ្ចាំងតាមរោងកុនកន្លងមក៕