វត្តមាន ចេន សាយចៃ ធ្វើឱ្យ Town រំពឹងលក់អាល់ប៊ុមចូលឆ្នាំបំបែកកំណត់ត្រាជាថ្មី

2015-03-04 17:20:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម Town បានរំពឹងខ្ពស់ថានឹងអាចលក់អាល់ប៊ុមទាំង CD និងVCD ចូលឆ្នាំប្រពៃណីជាតិ២០១៥ ក្នុងបរិមាណមួយដ៏ខ្ពស់ ហើយឈានដល់ការបំបែកកំណត់ត្រាជាថ្មី ក្រោយវត្តមានតារាចម្រៀងល្បីឈ្មោះខ្មែរសុរិន្ទ ចេន សាយចៃ ចូលមកដល់។

ការរំពឹងដូច្នេះបន្ទាប់ពីផលិតកម្ម Town ធ្វើធ្លាប់លក់ CD បំបែកកំណត់ត្រាម្ដងហើយកាលពីឆ្នាំមុន ដោយលក់បាន CD ជាង ១០ម៉ឺនបន្ទះ ពេលមានវត្តមានតារាកំប្លែងល្បីឈ្មោះរបស់ CTN នាយ ពាក់មី និងនាយ គ្រឿន។

ឆ្លើយតបទៅការព្យាករណ៍ទទួលកំណត់ត្រាថ្មីអ្នកចាត់ការទូទៅផលិតកម្ម Town មាស សុខរតនៈ និយាយថា "អារឿងរំពឹង យើងរំពឹងហើយអូន បើអត់រំពឹងយើងអញ្ជើញគាត់មកធ្វើអ្វី។ ក៏ប៉ុន្តែសន្ទុះទីផ្សារកម្រិតណាយើងមិនទាន់ហ៊ាននិយាយទេ អាស្រ័យលើការគាំទ្រពីទស្សនិកជនពេលចេញលក់លើទីផ្សារ"។

បទចម្រៀងចូលឆ្នាំប្រពៃណីជាតិរបស់ ចេន សាយចៃ ត្រៀមចេញលក់ក្នុងផលិតកម្ម Town

បងប្រុសបង្កើតរបស់តារាចម្រៀងល្បីឈ្មោះ មាស សុខសោភា បន្តថា តារាចម្រៀងខ្មែរសុរិន្ទខាងលើមានបទចម្រៀងចូលឆ្នាំប្រពៃណីជាតិក្នុងផលិតកម្ម Town បួនទៅប្រាំបទ ត្រៀមនឹងចេញលក់លើទីផ្សារក្នុងពេលឆាប់ៗខាងមុខ។

ចេន សាយចៃ ជាតារាចម្រៀងខ្មែរសុរិន្ទល្បីឈ្មោះម្នាក់ក្នុងចំណោមតារាចម្រៀងខ្មែរសុរិន្ទល្បីឈ្មោះនានាដូចជា ខុងឃុយ ជាដើម។ អ្នកចម្រៀងរូបនេះបានបោះជំហានមកកាន់ផលិតកម្មខាងលើកាលពីពេលថ្មីៗ ក៏ប៉ុន្តែការក្លាយជាតារាចម្រៀងពេញសិទ្ធិ ឬកុងត្រាយ៉ាងណានោះមិនត្រូវបានអ្នកចាត់ការទូទៅផលិតកម្ម Townបង្ហើបឱ្យដឹងនៅឡើយទេ។

ក្រៅតែពីវត្តមាន ចេន សាយចៃ អ្នកនិពន្ធ និងជាអ្នកចាត់ការទូទៅ មាស សុខរតនៈ អះអាងថានៅមានតារាចម្រៀងជាច្រើនទៀតអាចធ្វើឱ្យអាល់ប៊ុមចូលឆ្នាំប្រពៃណីជាតិរបស់ផលិតកម្មខ្លួនទទួលការចាប់អារម្មណ៍ពីទស្សនិកជន ដូចជា រ៉ូលីន BIG នាយ ពាក់មី នាយ គ្រឿន ជាដើម។

អ្នកចាត់ការទូទៅរូបនេះបន្ថែមទៀតថា ថ្នាក់ដឹកនាំផលិតកម្មទាំងអស់តែងតែខិតខំស្វែងរកភាពថ្មី និងប្លែកដើម្បីទាក់ទាញការចាប់អារម្មណ៍ពីទស្សនិកជន ក្នុងនោះលោកក៏ស្នើឱ្យទស្សនិកជនជួយគាំទ្រស្នាដៃផលិតកម្ម Town ក៏ដូចជាផលិតកម្មដទៃទៀតដើម្បីលើកកម្ពស់វិស័យចម្រៀងខ្មែរ។

ក្នុងឆ្នាំ២០១៥នេះផលិតកម្ម Town បានផលិតចម្រៀងចូលឆ្នាំប្រពៃណីជាតិជាង ៧០បទ ស្មើនឹង ៧អាល់ប៊ុម ក្នុងនោះតារាចម្រៀង ចេន សាយចៃ មានបួនទៅប្រាំបទ ដូចជាបទ "បាត់ខោខ្លី" បទ "នឹកស្រុកខ្មែរ" បទ "ខ្ជិលនឹងយកប្ដី" និងបទចម្រៀងមួយចំនួនទៀត៕