ហេតុអ្វីភរិយាលោកអូបាម៉ា ធ្វើដំណើរទស្សនកិច្ចមកកម្ពុជា?

2015-03-04 21:27:05
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមសេចក្ដីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា កាលពីថ្ងៃទី០៣ ខែមីនាម្សិលមិញ បានបញ្ជាក់ថា លោកជំទាវទីមួយ មីស៊្ហែល អូបាម៉ា (Michelle Obama) ដែលជាភរិយារបស់ប្រធានាធិបតីសហរដ្ឋអាមេរិក បារ៉ាក់ អូប៉ាម៉ា នឹងអញ្ជើញមកបំពេញទស្សនកិច្ចវប្បធម៌ជាផ្លូវការនៅកម្ពុជា ចាប់ពីថ្ងៃទី២០ ដល់ថ្ងៃទី២២ ខែមីនា ឆ្នាំ២០១៥។ នេះគឺជាដំណើរទស្សនកិច្ចលើកដំបូងរបស់លោកជំទាវមកកាន់កម្ពុជា បន្ទាប់ពីលោក បារ៉ាក់ អូបាម៉ា ធ្លាប់មកបំពេញទស្សនកិច្ចផ្លូវការម្ដងដែរក្នុងឆ្នាំ២០១២ ដើម្បីចូលរួមកិច្ចប្រជុំកំពូលអាស៊ាន។

ហេតុអ្វីបានជា លោកជំទាវទីមួយអាមេរិក ជ្រើសរើសដំណើរទស្សនកិច្ចមកកម្ពុជា?

បើតាមការប្រកាសពីសេតវិមានប្រធានាធិបតីសហរដ្ឋអាមេរិក កាលពីថ្ងៃទី០២ ខែមីនា មួយថ្ងៃមុនការប្រកាសរបស់ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានបង្ហាញថា លោកជំទាវ មីស៊្ហែល អូបាម៉ា នឹងធ្វើដំណើរទស្សនកិច្ចមកកាន់ប្រទេសពីរគត់ក្នុងតំបន់អាស៊ី គឺប្រទេសជប៉ុន និងប្រទេសកម្ពុជា។ នៅក្នុងការបំពេញទស្សនកិច្ចរបស់លោកជំទាវ គឺនឹងមានការអមដំណើរពីប្រធានកម្មវិធីស្ម័គ្រចិត្ត Peace Corps លោកស្រី Carrie Hessler-Radele ផងដែរ។

ដំណើរទស្សនកិច្ចនេះ ផ្ដោតទៅលើការផ្សព្វផ្សាយគំនិតផ្ដួចផ្ដើមអប់រំស្ត្រីជាអន្តរជាតិថ្មីមួយដែលមានឈ្មោះថា "Let Girls Learn”។ គំនិតផ្ដួចផ្ដើមនេះ រៀបចំឡើងដោយលោកជំទាវ មីស៊្ហែល អូបាម៉ា និងប្រធានាធិបតីសហរដ្ឋអាមេរិក បារ៉ាក់ អូបាម៉ា ស្របពេលការចាប់ផ្ដើមយុទ្ធនាការផ្ដល់សិទ្ធិអំណាចដល់ស្ត្រី ដែលបានចាប់ផ្ដើមនៅជុំវិញពិភពលោក ក្រោមការជួយគាំទ្រពីស្ថាប័នអន្តរជាតិជាច្រើន។

គោលបំណងសំខាន់ នៃគំនិតផ្ដួចផ្ដើម "Let Girls Learn” គឺជួយនារីពេញវ័យនៅលើពិភពលោក ឲ្យបានចូលរៀន និងបញ្ចប់ការសិក្សា ព្រមទាំងលើកទឹកចិត្តពួកគេឲ្យមានសេចក្ដីប្រាថ្នាធំជាងមុន។ បើតាមសេតវិមាន បានបង្ហាញថា នារីពេញវ័យ ៦២លាននាក់ ស្មើនឹងពាក់កណ្ដាលនៃចំនួននារីពេញវ័យទាំងអស់នៅលើពិភពលោក មិនបានទទួលការរៀនសូត្រឡើយ ហើយភាគច្រើនកំពុងប្រឈមនឹងការបង្ខំឲ្យរៀបការទាំងវ័យក្មេង។

ចំពោះដំណើរទស្សនកិច្ចនៅកម្ពុជា លោកជំទាវទីមួយសហរដ្ឋអាមេរិកនឹងផ្ដោតគោលដៅនៅខេត្តសៀមរាប។ ក្នុងឱកាសនោះ លោកជំទាវ និងលោកស្រី Carrie Hessler-Radelet នឹងជួបជាមួយក្រុមការងារស្ម័គ្រចិត្តរបស់កម្មវិធី Peace Corps ព្រមទាំងចូលពិនិត្យមើលសាលាមួយ ដើម្បីឲ្យឃើញជាក់ស្ដែងថា តើដំណោះស្រាយរបស់សហគមន៍បានផ្លាស់ប្ដូរជីវិតស្ត្រីដូចម្ដេចខ្លះ៕

ដោយ៖ គង់ វិសាល

ប្រភព៖ thediplomat