ខៀវ កាញារីទ្ធ៖ អ្នកប្រើ Facebook កាន់តែយល់ដឹង ឯអ្នកប្រើមិនត្រឹមត្រូវកំពុងបាត់បង់ប្រជាប្រិយភាព

2015-03-04 21:40:56
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រីក្រសួងព័ត៌មាន ឯកឧត្ដម ខៀវ កាញារីទ្ធ បានប្រាប់គេហទំព័រ Sabay នៅព្រឹកនេះថា អំឡុងរយៈពេល ២-៣ ឆ្នាំចុងក្រោយនេះ អ្នកប្រើប្រាស់បណ្ដាញសង្គម Facebook កាន់តែយល់ដឹង ដូច្នេះហើយ បណ្ដាញទំនាក់ទំនងប្រើប្រាស់ក្នុងន័យ បោកប្រាស់មួយចំនួនកំពុងបាត់បង់ប្រជាប្រិយភាពរបស់ខ្លួន។ ទន្ទឹមគ្នានេះ រដ្ឋមន្ត្រីក៏បានបញ្ជាក់ថា ក្រសួងគ្មានផែនការណាមួយបិទ Facebook នោះដែរ។

http://youtu.be/QxCAwiEVMKg

ឯកឧត្ដម ខៀវ កាញារីទ្ធ លើកឡើងដូច្នេះ បន្ទាប់ពីអ្នកប្រើប្រាស់បណ្ដាញសង្គម Facebook មួយចំនួនបានយកបណ្ដាញមួយនេះ មកជេរប្រមាថ មួលបង្កាច់ បំភ្លៃ បំផ្លើស ញុះញង់ អុជអាល ប្រើពាក្យអសុរោះ ប្រើរូបភាពកាត់ត ដែលធ្វើឲ្យច្របូកច្របល់ និង ធ្វើឲ្យស្រអាប់ដល់តម្លៃនៃសីលធម៌សង្គម។

ថ្វីត្បិតតែ សកម្មភាពខាងលើនេះ នៅតែបន្ដកើតមាននៅលើបណ្ដាញសង្គម facebook ក្ដី ប៉ុន្ដែ ភាពចេះដឹងរបស់អ្នកប្រើប្រាស់ Facebook កាន់តែកើនឡើង ម៉្លោះហើយពួកគេមិនចុចមើលដូចមុន ឬ ចុចបិទចោលគណនី Facebook ដែលប្រើប្រាស់មិនសមនឹងតម្លៃសីលធម៌ខ្មែរ។ ឯកឧត្តម ខៀវ កាញារីទ្ធ មានប្រសាសន៍។

យ៉ាងណាមិញ ឯកឧត្ដម ខៀវ កាញារីទ្ធ បានបញ្ជាក់ទៀតថា បើទោះបីជាអ្នកប្រើប្រាស់បណ្ដាញសង្គម Facebook ដែលផ្ដល់ព័ត៌មានមិនពិត ឬ ប្រើប្រាស់រូបភាពអាសអាភាសក៏ដោយ ក៏ក្រសួងមិនមានផែនការបិទបណ្ដាញទំនាក់ទំនងមួយនេះទេ ប៉ុន្ដែថា ប្រសិនបើអ្នកប្រើប្រាស់មិនត្រឹមត្រូវ ដោយទៅជេរប្រមាថអ្នកដទៃ នឹងប្រឈមមុខច្បាប់ ដោយបុគ្គលរងគ្រោះអាចដាក់ពាក្យប្ដឹងបាន។

រដ្ឋមន្ត្រីក្រសួងព័ត៌មានបានចាត់ទុកបណ្ដាញទំនាក់ទំនងសង្គម Facebook គ្រាន់តែជាមធ្យោបាយបញ្ជូនព័ត៌មាន តែមិនមែនជាព័ត៌មានផ្លូវការនោះទេ។ "ខ្ញុំចាត់ទុក Facebook គ្រាន់តែជាប្រភពពាក់កណ្ដាលផ្លូវការ ឯគេហទំព័រ ទើបជាផលិតផលសម្រេច"។

ទាក់ទិនទៅនឹងបណ្ដាញសង្គម Facebook នេះ ឯកឧត្តមខៀវ កាញារីទ្ធ និយាយថា ក្រសួងព័ត៌មានវាយតម្លៃថា បណ្ដាញទំនាក់ទំនងសង្គម នៅតែមានសារៈសំខាន់ ប្រសិនបើអ្នកប្រើប្រាស់បានត្រឹមត្រូវ ហើយក្រសួងមិនមានបំណងបិទបណ្ដាញទំនាក់ទំនងសង្គមមួយនេះទេ៕