ហេតុផល៥យ៉ាងធ្វើឱ្យ Gareth Bale ជួបការលំបាកនៅ Real Madrid

2015-03-31 13:26:55
ចំនួនមតិ 0 | ចំនួនចែករំលែក 0

ចន្លោះមិនឃើញ

Gareth Bale គឺជាកីឡាករដែលក្រុម Real Madrid ទិញមកក្នុងតម្លៃខ្លួនថ្ងៃជាងគេនៅឆ្នាំ២០១៣។ ក្នុងមួយរដូវកាលដំបូង គេសង្កេតឃើញថាអតីតកីឡាករ Spurs រូបនេះហាក់ដូចជាសប្បាយចិត្ត និងមានទម្រង់លេងគាប់ប្រសើរខ្លាំងណាស់ដោយអាចជួយក្រុមយក្សនៅអេស្ប៉ាញមួយនេះលើកពានបានច្រើនផងដែរ។ យ៉ាងណាមិញ ចាប់តាំងពីបើករដូវកាលថ្មីនេះមក ខ្សែបម្រើស្លាបជម្រើសជាតិវែលរូបនេះដូចជាមានសម្ពាធខ្លាំងណាស់ ទាំងនៅក្នុងក្រុមក៏ដូចជាពីអ្នកគាំទ្រ ពោលគឺមិនពេញចិត្តនឹងរូបគេទាល់តែសោះ។

ចុះមានកត្តាអ្វីខ្លះដែលធ្វើឱ្យកីឡាករវ័យ២៥ឆ្នាំរូបនេះជួបការលំបាកយ៉ាងនេះនៅ Real Madrid ? គេហទំព័រ sportskeeda បានលើកយកហេតុផល៥យ៉ាងដើម្បីពន្យល់ដល់មិត្តអ្នកអានឱ្យបានដឹងទាំងអស់គ្នា៖

១. ធ្លាក់ទម្រង់លេងខ្លាំងពេក

Bale ចាប់តាំងពីបើករដូវកាលថ្មីនេះមក ហាក់ដូចជាធ្លាក់ទម្រង់លេងខ្លាំងមែនទែន។ ដូចកាលប្រកួតជាមួយក្រុម Barcelona អីចឹង រូបគេបានប៉ះបាល់តែ១៤ដងគត់នៅតង់ទី២ ដែលធ្វើឱ្យមានការរិះគន់យ៉ាងចាស់ដៃតែម្ដង។ មួយវិញទៀត ការខកខានរកគ្រាប់បាល់ក៏ជាចំណុចមួយដែលធ្វើឱ្យគេជួបការលំបាកនេះផងដែរ ព្រោះក្នុងនាមជាខ្សែបម្រើប្រយុទ្ធម្នាក់បើមិនអាចរកគ្រាប់បាល់បានទេ វាជារឿងយ៉ាប់ហើយ។

២. អ្នកគាំទ្រ Real Madrid រករឿងខ្លាំងពេក

បន្ទាប់ពីរឿងធ្លាក់ទម្រង់លេង គឺចូលដល់វគ្គអ្នកគាំទ្រម្ដង។ ប៉ុន្មានប្រកួតចុងក្រោយ ទោះជា Bale ប្រឹងប្រែងយ៉ាងណា ក៏នៅតែត្រូវបានកាសែតក៏ដូចជាអ្នកគាំទ្រមួយចំនួនរករឿងគេរហូតដែរ។ តួយ៉ាងដូចកាលពីដើមឆ្នាំ២០១៥ គ្រាន់តែរូបគេមិនបានបោះបាល់ឱ្យ Ronaldo ស៊ុតនោះ មានអ្នកគាំទ្រមួយចំនួននាំគ្នាបោះឆ្នោតចង់លក់រូបគេចេញទៅហើយ។ ថ្មីៗនេះទៀតសោត បន្ទាប់ពីចាញ់ក្រុម Barcelona នោះ ក៏មានអ្នកគាំទ្រ៣នាក់ចាំស្ទាក់ផ្លូវវាយឡានរបស់គេដែរ។ នេះសបញ្ជាក់ឱ្យឃើញថា អ្នកគាំទ្រនៅអេស្ប៉ាញគឺជាកត្តាមួយធំសម្រាប់ Bale មែន។

៣. តម្លៃខ្លួន

តម្លៃខ្លួននេះគឺពិតជាធ្វើឱ្យ Gareth Bale មានបញ្ហាស្មុគស្មាញមែន ពោលគឺរូបគេជាកីឡាករដែលមានតម្លៃខ្លួនខ្ពស់ជាងគេនៅ Real Madrid ដូច្នេះត្រូវតែធ្វើយ៉ាងណាឱ្យសក្ដិសមទៅនឹងឈ្មោះនេះ។ Bale ត្រូវជាប់ជម្រើសដំបូងនៅជួរមុខជាមួយ Benzema និង Ronaldo រហូត ព្រោះរូបគេជាកីឡាករទិញមកថ្លៃ។ ប្រសិនបើរូបគេជាកីឡាករដែលទិញមកត្រឹម២០លានអឺរ៉ូអីនោះ ប្រហែលជាមិនអាចជាប់១១នាក់ដំបូងរបស់លោក Carlo Ancelotti ឡើយ ហើយក៏ប្រហែលជាអាចមានទម្រង់លេងល្អជាងនេះដែរ ព្រោះមិនមានសម្ពាធខ្លាំងពីគ្រូបង្វឹក។

៤. Cristiano Ronaldo

រឿងមួយទៀតដែលធ្វើឱ្យ Bale ពិបាកនៅ Real Madrid នោះអាចជា Cristiano Ronaldo។ មានមតិជាច្រើនបាននិយាយពីរឿងរបស់កីឡាករទាំងពីរនេះថា ពួកគេមានសមត្ថភាពប្រហាក់ប្រហែលគ្នាប៉ុន្តែគ្រាន់តែថា Ronaldo ជាតួឯក ឯ Bale ជាតួរងតែប៉ុណ្ណោះ។ រឿងនេះជាមូលហេតុធំមួយដែលអាចធ្វើឱ្យកីឡាករកម្ពស់១,៨៣ម៉ែត្ររូបនេះមានការពិបាកសម្រេចចិត្តពេលអូសបាល់ស៊ុតម្ដងៗ ព្រោះថាបើអាចស៊ុតចូលគឺល្អហើយ តែបើមិនចូលវិញប្រាកដជាមានកំហុសហើយ។

៥. ការរំខានផ្លូវចិត្ត

ជាក់ស្ដែង Bale ពិតជាមានបញ្ហាត្រង់នេះមែន ព្រោះថារាល់ថ្ងៃនេះរូបគេត្រូវបានសារព័ត៌មានអេស្ប៉ាញចុះផ្សាយមិនឈប់ទេ។ រឿងដែលគេចុះផ្សាយច្រើនជាងគេនោះគឺការផ្លាស់ចេញពី Real Madrid តែម្ដង បើទោះបីជារូបលោកបានចេញមកបញ្ជាក់ជាច្រើនដងថាមិនចេញពីអេស្ប៉ាញនេះក៏ដោយ។ មួយវិញទៀត គឺរឿងមិត្តរួមក្រុមដែលតែងតែលេងសើចជាមួយរូបគេច្រើនក៏ជាបញ្ហាដែលធ្វើឱ្យអតីតយុវជនរបស់ Southampton រូបនេះគិតច្រើនផងដែរ ពោលគឺរូបគេធ្លាប់បាននិយាយថា មិនចូលចិត្តឱ្យអ្នកណាចំអន់គេច្រើននោះទេ។

ហេតុផល៥យ៉ាងខាងលើនេះ គឺគ្រាន់តែជាគំនិតរបស់ sportskeeda តែប៉ុណ្ណោះ។ ចុះបើតាមយោបល់មិត្តអ្នកអានវិញ តើគិតថាសក្ដិសម និងយល់ស្របដែរឬទេ?

ប្រែសម្រួល៖ មុន្នី រម្យ ប្រភព៖ sportskeeda