ស៊ន សៀវម៉ី ចូលជួបអគ្គរដ្ឋទូតកូរ៉េប្រចាំនៅកម្ពុជា
- 2014-10-08 19:07:00
- ចំនួនមតិ 0 | ចំនួនចែករំលែក 0
ស៊ន សៀវម៉ី ចូលជួបអគ្គរដ្ឋទូតកូរ៉េប្រចាំនៅកម្ពុជា
ចន្លោះមិនឃើញ
ម្ចាស់មេដាយមាស ស៊ន សៀវម៉ី បានចូលជួបសម្តែងការគួរសមលោក គីម ហាន់ស៊ូ ឯកអគ្គរដ្ឋទូតកូរ៉េខាងត្បូងប្រចាំនៅកម្ពុជាកាលពីថ្ងៃទី៦ ខែតុលា ឆ្នាំ២០១៤ បន្ទាប់ពីវិលត្រឡប់មកដល់កម្ពុជាកាលពីថ្ងៃទី៥ ខែតុលាដោយនាំជ័យជម្នះជួនជាតិយ៉ាងត្រចះត្រចង់។
វីរនារីកម្ពុជា ស៊ន សៀវម៉ី និងលោកគ្រូបង្វឹក ឆយ យ៉ុងសុក បានថ្លែងអំណរគុណយ៉ាងជ្រាលជ្រៅចំពោះប្រជាជនកូរ៉េដែលបានចូលរួម លើកទឹកចិត្ត និងជួយគាំទ្រយ៉ាងខ្លាំងបែបនេះ។ បន្ថែមលើនេះសាមីខ្លួន នឹងបន្តខិតខំបន្ថែមទៀតសម្រាប់កិត្តិយសប្រទេសជាតិទាំងមូល និងជាការតបស្នងចំពោះការជួយឧបត្ថម្ភគាំទ្រនានា។
ឯកអគ្គរដ្ឋទូតបានលើកឡើងថា មេដាយមាសនេះមិនមែនជារបស់សាមីខ្លួនម្នាក់ប៉ុណ្ណោះទេ ប៉ុន្តែជារបស់ប្រជាជនកម្ពុជាទាំងមូល ហើយលោកសូមចូលរួមអបអរចំពោះលទ្ធផលដ៏ត្រចះត្រចង់របស់កញ្ញា។ លោកបានបន្តថា ប្រជាជនកូរ៉េទាំងនៅកូរ៉េ និងនៅកម្ពុជាសុទ្ធតែបានចូលរួមអបអរសាទរនឹងជ័យជម្នះនេះដែលហាក់ដូចជាការប្រកួតរបស់កូរ៉េដែរ។
លោកអគ្គរដ្ឋទូតបានសង្កត់ធ្ងន់ថា នេះជាលទ្ធផលដ៏អស្ចារ្យមួយ ប៉ុន្តែសៀវម៉ីត្រូវខំប្រឹងបន្ថែមទៀតដើម្បីទទួលបានលទ្ធផលដ៏ត្រចះត្រចង់ថែមទៀតនៅ 2016 Rio Olympic Game នាពេលខាងមុខ។ លោកបានថ្លែងដូចនេះក្នុងឱកាសដែលលោកបានអនុញ្ញាតឲ្យកញ្ញា ស៊ន សៀវម៉ី និងលោកគ្រូបង្វឹក ឆយ យ៉ុងសុក បានចូលជួបសម្ដែងការគួរសមកាលពីថ្ងៃទី០៦ ខែតុលា ឆ្នាំ២០១៤នៅទីស្នាក់ការទូតកូរ៉េប្រចាំនៅកម្ពុជា។
ស៊ន សៀវម៉ី និងលោកគ្រូ ឆយ យ៉ុងសុក ជួបសម្ដែងការគួរសមជាមួយឯកអគ្គរដ្ឋទូតកូរ៉េខាងត្បូង គីម ហាន់ស៊ូ
កាន់តែពិសេសជាងនេះទៅទៀត លោកអគ្គរដ្ឋទូតនឹងរៀបចំការប្រកួតតេក្វាន់ដូសម្រាប់ពានរង្វាន់ឯកអគ្គរដ្ឋទូត (Ambassador's Cup Taekwando) នៅថ្ងៃទី ២៩‑៣០ ខែតុលា ខាងមុខនេះ៕
អត្ថបទ៖ អៀង សូទ្រី