ចូលឆ្នាំថ្មីមានគម្រោងទៅកម្សាន្តនៅទីណា?
- 2015-04-14 13:00:08
- ចំនួនមតិ 0 | ចំនួនចែករំលែក 0
ចូលឆ្នាំថ្មីមានគម្រោងទៅកម្សាន្តនៅទីណា?
ចន្លោះមិនឃើញ
ថ្ងៃ បុណ្យចូលឆ្នាំខ្មែរប្រពៃណីជាតិបានមកដល់នៅថ្ងៃនេះ ចង់ដឹងថា តើមិត្តយុវវ័យយើងមានគម្រោងទៅកម្សាន្តនៅទីណាខ្លះ?
លោកគង់ ដារ៉ាវុធបុគ្គលិកនៃវិទ្យាស្ថានព្រះកុសុមៈបានប្រាប់ឱ្យSabay ដឹងថា លោកមានគម្រោងត្រឡប់ទៅស្រុកនៅឯខេត្តកំពង់ចាម ហើយជូនអ្នកម្ដាយទៅវត្ត និងជួយការងារគាត់តាមដែលអាចធ្វើបាន ព្រោះពេល ដារ៉ាវុធ នៅភ្នំពេញគឺគ្មានអ្នកណាជួយធ្វើការងារអ្នកមានគុណទេ។ លោកដារ៉ាវុធក៏បានផ្ដាំផ្ញើដល់អ្នកដែលមករស់នៅឆ្ងាយពីឪពុក ម្ដាយទាំងអស់ថា «ពេលវេលាដែលកន្លងទៅមិនអាចត្រឡប់ក្រោយទេ! មនុស្សគ្រប់រូប រួមទាំងឪពុកម្ដាយយើងផងនឹងចាស់ទៅៗ ពីមួយថ្ងៃទៅមួយថ្ងៃ! ដូច្នេះគួរតែចំណាយពេលវេលានៅជាមួយពួកគាត់! កុំព្រោះតែរវល់ធ្វើការឬរវល់រៀនមិនបានទៅជួបគាត់ក្នុងឱកាសពិសេសបែបនេះ»។
កញ្ញា ស្រីណា ជាអ្នកចម្រៀងបុរាណបានឱ្យដឹងថា ក្នុងថ្ងៃចូលឆ្នាំកញ្ញា នឹង ធ្វើពិធីសុំខមាទោសចំពោះអ្នកម្ដាយដើម្បីលាងនូវរាល់ទង្វើនិង ពាក្យសម្ដីដែលបានប្រព្រឹត្តខុសទៅលើគាត់ និង និមន្តព្រះសង្ឃមកស្រោចទឹកជាមួយគ្រួសារ។អ្នកចម្រៀងប្រពៃណីដែល មានដើមកំណើតនៅខេត្តកំពង់ឆ្នាំងរូបនេះក៏បានផ្ញើសារដល់មិត្តយុវវ័យដទៃទៀតផងដែរថា « អ្វីដែលបងចង់ប្រាប់គឺ ធ្វើបុណ្យជាមួយឪពុកម្ដាយ ឱ្យច្រើនទាន់ខែភ្លឺ»។
ស្រដៀងគ្នានេះដែរកញ្ញា ប៉ែន ម៉ាណែតនិស្សិតឆ្នាំទី៣នៃសាកលវិទ្យាល័យភូមិន្ទភ្នំពេញ ក៏បានឱ្យដឹងថា ក្រៅពីនាំអ្នកម្ដាយទៅវត្តដើម្បីធ្វើបុណ្យឧទ្ទិសកុសលដល់ជីដូន ជីតា និងជាពិសេសជូនជីដូនជីតាដែលលោកឪពុកបានចែកឋានទៅ កញ្ញានឹងមានជាកាដូបន្តិចបន្តួចជូនចំពោះអ្នកម្ដាយផងដែរ។ ក្នុងនាមជាយុវតីខ្មែរមួយរូប និស្សិតអក្សរសាស្ត្រខ្មែររូបនេះក៏បានផ្ដាំផ្ញើថា «ក្នុងឱកាសបុណ្យចូលឆ្នាំខាងមុខនេះសូមយុវជនទាំងអស់ចំណាយពេលទៅជួបជុំលោកទាំងពីរ ទិញអំណោយជូនលោក! កត្តញ្ញូចំពោះលោក! ពុំមានក្តីស្រឡាញ់ណាស្មើក្ដីស្រឡាញ់ពុកម៉ែចំពោះកូនឡើយ»។ ងាកទៅលោកសុខ សុធារៈ និស្សិតឆ្នាំទីមួយនៃវិទ្យាស្ថានភាសាបរទេសក៏បានបន្ថែមទាក់ទងទៅនឹងការទៅជួបជុំគ្រួសារថា «យុវវ័យគួរតែជួយសម្អាតតុបតែងផ្ទះ ជួយធ្វើម្ហូបទៅវត្ត និងទៅវត្តវ៉ាជាមួយឪពុកម្ដាយ»។
ក្រៅពីការជួបជុំអ្នកមានគុណក្នុងថ្ងៃចូលឆ្នាំថ្មី យុវជនជា សុផាន់ណ្ណៈ និស្សិតអក្សរសាស្ត្រអង់គ្លេសនៃវិទ្យាស្ថានភាសាបរទេសក៏បាន បន្ថែមថា «ត្រូវជំរុញអោយអ្នកជិតខាងចូលរួមក្នុងការលេងល្បែងប្រជាប្រិយដើម្បីលើកតម្កើងវប្បធម៌ជាតិ»៕
អានអត្ថបទ៖ ជោគជតារាសីឆ្នាំទាំង១២ តាមមហាសង្រ្កាន្ត
អត្ថបទ៖គង់ ច័ន្ទវ៉ាន់ណេង