ហេតុផលដែលជំរុញឲ្យពេទ្យធ្មេញ Master Care ឧបត្ថម្ភដល់វីរនារី ស៊ន សៀវម៉ី

2014-10-09 18:31:27
ចំនួនមតិ 0 | ចំនួនចែករំលែក 0

ចន្លោះមិនឃើញ

វាជារឿងដ៏គួរឲ្យចាប់អារម្មណ៍មួយដែលមន្ទីរពេទ្យធ្មេញ Master Care ប្រកាសឧត្ថម្ភទឹកប្រាក់ចំនួន៥ពាន់ដុល្លារអាមេរិកដល់ម្ចាស់មេដាយមាសកីឡាអាស៊ី Asian Games 2014 ស៊ន សៀវម៉ី កាលពីដើមសប្តាហ៍កន្លងទៅនេះ។ តើមានហេុផលអ្វីបានជាពេទ្យធ្មេញមួយនេះជួយឧត្ថម្ភដល់វីរនារីកម្ពុជា?

លោកស្រីបានពន្យល់ថា ហេតុផលទីមួយដែលអ្នកស្រីជួយឧបត្ថម្ភដល់ សៀវម៉ី ពីព្រោះកីឡាករ កីឡាការិនីនៅទន់ខ្សោយច្រើន ហើយភាគច្រើនអ្នកដែលទៅធ្វើជាកីឡាករគឺមានជីវភាពក្រីក្រ រំពឹងតែប្រាក់ខែរដ្ឋ។ អ្នកស្រីថា ៖ «វាត្រូវការ...និយាយឲ្យចំវាត្រូវការជីវភាពគ្រាន់បន្តិចទើបអាចទៅប្រកួតឈ្នះគេ»។

លោកស្រីទន្តបណ្ឌិត អេង លីគង់ ផ្តល់បទសម្ភាសន៍

លោកស្រីទន្តបណ្ឌិតបានប្រាប់ពីហេតុផលទី២ថា ៖ «ទី២ដែលខ្ញុំជួយឧបត្ថម្ភ សៀវម៉ី ហ្នឹងដោយសារ នាងជាកីឡាករស្រីហើយក្មេងទៀត»។ ទន្តបណ្ឌិតខាងលើបន្ថែមថា សង្គមកម្ពុជាបច្ចុប្បន្នមិនទាន់បានឲ្យតម្លៃដល់ស្ត្រីខ្លាំងឲ្យដូចបុរសនោះទេ ដូច្នេះការជួយឧបត្ថម្ភនេះនឹងជួយរួមចំណែកក្នុងការជំរុញទឹកចិត្តដល់ក្មេងស្រីដទៃទៀតឲ្យខិតខំប្រឹងប្រែង តស៊ូដោយខ្លួនឯង ដើម្បីធ្វើឲ្យសម្រេចនូវគោលបំណងរបស់ខ្លួន។

ផ្សេងពីនេះ ម្ចាស់គ្លីនិកខាងលើក៏នៅតែបន្តជួយឧបត្ថម្ភដល់ក្រុមកីឡាករ‑កីឡាការិនីជាបន្តបន្ទាប់ទៀតរាល់ពេលដែលអ្នកទាំងនោះអាចនាំយកមេដាយមកជូនជាតិមាតុភូមិ ហើយបច្ចុប្បន្នអ្នកស្រីបានរៀបចំកញ្ចប់ថវិកាដើម្បីទុកជួយឧបត្ថម្ភដល់វិស័យកីឡាផងដែរ។

គ្លីនិកធ្មេញមួយនេះបានឧបត្ថម្ភទឹកប្រាក់ចំនួន៥ពាន់ដុល្លារអាមេរិកដល់ ស៊ន សៀវម៉ី កាលពីថ្ងៃចន្ទ ទី៦ ខែតុលាកន្លងទៅនៅទីស្តីការគណៈកម្មាធិការជាតិអូឡាំពិកកម្ពុជា ក្នុងសន្និសីទសារព័ត៌មានស្តីពីលទ្ធផលនៃការចូលរួមប្រកួតរបស់ក្រុមកីឡាកម្ពុជាក្នុងព្រឹត្តិការណ៍កីឡាអាស៊ីនៅប្រទេសកូរ៉េខាងត្បូងឆ្នាំ២០១៤។

គ្លីនិកធ្មេញ Master Care Dental Clinic បានកកើតឡើងដំបូងនៅក្នុងឆ្នាំ១៩៩៣ក្រោមឈ្មោះថាបន្ទប់ព្យាបាលធ្មេញ អេង លីគង់ ដោយមានតែអ្នកស្រី អេង លីគង់ ធ្វើការតែម្នាក់ឯងគត់។ រហូតមកដល់ឆ្នាំ២០០៣ទើបបានប្ដូរឈ្មោះមកជា Master Care Dental Clinic ដោយមានទន្តបណ្ឌិតបីរូប ហើយបច្ចុប្បន្នមានទន្តបណ្ឌិតប្រាំរូបរួមគ្នាបម្រើការងារតាមឯកទេស។

ម្ចាស់គ្លីនិករូបនេះធ្លាប់បានឆ្លងកាត់ការសិក្សាជាច្រើនរួមមានការសិក្សាផ្នែកទន្តបណ្ឌិត និងអនុបណ្ឌិតផ្នែករាក់ស៊ីធ្មេញនៅកម្ពុជា សិក្សាផ្នែកដាំបង្គោលធ្មេញក្នុងឆ្អឹងនៅប្រទេសអាល្លឺម៉ង់ តាម Online ផ្នែកពត់ធ្មេញពីអាមេរិក និងបានសិក្សាវគ្គខ្លីៗច្រើនទៀតទាក់ទងនឹងផ្នែកធ្មេញ និងជំនាញផ្សេងៗ។

គ្លីនិក Master Care Dental Clinic ស្ថិតនៅផ្ទះលេខ៦៩១ មហាវិថី ព្រះមុនីវង្ស សង្កាត់បឹងកេងកង៣ ខណ្ឌចំការមន រាជធានីភ្នំពេញ។ ទូរសព្ទ៖ ០២៣ ៩៩៣ ៩៣៦ ឬ ០១៦ ៨២០ ០៨១៕

អត្ថបទ៖ អៀង សូទ្រី