Pacquiao វះកាត់របួសសាច់ដុំស្មាបានជោគជ័យហើយ

2015-05-07 20:02:11
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករប្រដាល់ Manny Pacquiao បានវះកាត់របួសសាច់ដុំស្មាប្រកបដោយជោគជ័យ ហើយរយៈពេលដែលត្រូវសម្រាកព្យាបាលឱ្យសះស្បើយដូចដើមវិញគឺចន្លោះពី៤ទៅ៦ខែ។ នេះបើតាមសម្ដីរបស់លោកគ្រូពេទ្យ Neal ElAttrache អ្នកវះកាត់ឱ្យ Pacman ផ្ទាល់។

លោកគ្រូពេទ្យ Neal ElAttrache បាននិយាយថា Pacquiao បានចូលបន្ទប់វះកាត់កាលពីម្សិលមិញនេះ ហើយលទ្ធផលក៏បានបង្ហាញឱ្យដឹងផងដែរថា ការវះកាត់នោះប្រកបដោយជោគជ័យ តែត្រូវឱ្យអ្នកជំងឺសម្រាកមិនឱ្យប្រើដៃខាងស្ដាំចន្លោះពី៤ទៅ៦ខែ។

ចំពោះសំនួរដែលសួររឿងកីឡាកររូបនេះអាចប្រើដៃរបស់គេដូចដើមវិញឬអត់? លោកគ្រូពេទ្យជំនាញខាងឆ្អឹងខាងលើបានឆ្លើយថា មិនមានបញ្ហានោះទេ។ រូបគេអាចចូលហ្វឹកហាត់ និងឡើងប្រកួតបានជាធម្មតា ព្រោះរបួសនេះគ្រាន់តែកៀបសាច់ដុំបន្តិចតែប៉ុណ្ណោះ។

មុនចូលវះកាត់នេះដែរ អ្នកប្រដាល់ហ្វីលីពីនខាងលើនេះបានបញ្ជាក់ថាខ្លួននឹងឡើងសង្វៀនសងសឹកជាមួយ Floyd ជាថ្មីទៀត បន្ទាប់ពីជាសះស្បើយពីរបួសស្មានេះ។ ចំណែកឯអ្នកប្រដាល់មិនដែលចាញ់អាមេរិកវិញក៏ធ្លាប់និយាយដែរហើយថានឹងបើកឱកាសឱ្យ Pacman មកសងសឹកវិញផងដែរ។

ទោះជាយ៉ាងនេះក្ដី អ្វីដែលប្រាកដគឺមិនទាន់កើតឡើងនោះទេ ពោលគឺត្រូវរង់ចាំរហូតដល់បុរសវ័យ៣៦ឆ្នាំរូបនេះជាសះស្បើយពីរបួសសិន ទើបអាចសម្រេចជាឯកច្ឆន្ទបាន៕

ចុចអាន៖Floyd ដៀមដាម Pacquiao ថាអ្នកចាញ់ចេះតែមានលេស

ប្រែសម្រួល៖ មុន្នី រម្យ ប្រភព៖ latimes