ជំនួយការបើកយន្តហោះអាល្លឺម៉ង់ សមបើកយន្តហោះទម្លាក់ខ្លួនមុនជួបគ្រោះថ្នាក់
- 2015-05-07 21:17:15
- ចំនួនមតិ 0 | ចំនួនចែករំលែក 0
ជំនួយការបើកយន្តហោះអាល្លឺម៉ង់ សមបើកយន្តហោះទម្លាក់ខ្លួនមុនជួបគ្រោះថ្នាក់
ចន្លោះមិនឃើញ
កាលពីចុងខែមិនាកន្លងទៅ គ្រោះថ្នាក់លើជើងហោះហើរ 4U 9525 របស់ក្រុមហ៊ុនអាកាសចរណ៍អាល្លឺម៉ង់ Germanwings បានធ្វើឲ្យកក្រើកពេញពិភពលោក ដោយសារគ្រោះថ្នាក់នោះបណ្ដាលមកពីការធ្វើអត្តឃាតរបស់ជំនួយការអាកាសយានិក។ ពេលនេះ របាយការណ៍ថ្មីបានលាតត្រដាងថា ជំនួយការអាកាសយានិកដែលធ្វើឲ្យអ្នកដំណើរជាងមួយរយនាក់បាត់បង់ជីវិត លួចហាត់សមបើកយន្តហោះទម្លាក់ខ្លួនមុនជួបគ្រោះថ្នាក់។
ជំនួយការអាកាសយនិកដែលធ្វើអត្តឃាត
ជំនួយការអាកាសយានិករបស់ក្រុមហ៊ុន Germanwings លោក Andreas Lubitz បានហាត់សមបើកយន្តហោះឲ្យជួបគ្រោះថ្នាក់ ដោយដាក់ការបញ្ជាយន្តហោះទម្លាក់ខ្លួន។ បើតាមរបាយការណ៍ផ្លូវការដែលចុះផ្សាយកាលពីថ្ងៃពុធម្សិលមិញ ការិយាល័យគ្រប់គ្រងគ្រោះមហន្តរាយផ្លូវអាកាស (BEA) បានបញ្ជាក់ថា លោក Lubitz បញ្ជាយន្តហោះឲ្យដាំក្បាលចុះទៅក្រោមជាច្រើនលើក បន្ទាប់មកទើបបញ្ជាឲ្យហោះឡើងវិញ។
សកម្មភាពហាត់សមនេះ បានធ្វើឡើងទៅលើយន្តហោះប្រភេទ A320 ដូចគ្នាជាមួយយន្តហោះដែលជួបគ្រោះថ្នាក់។ របាយការណ៍ខាងលើក៏បានបញ្ជាក់ផងដែរថា អាកាសយានិកបានចាកចេញពីបន្ទប់បញ្ជាការហោះហើរ ទុកឲ្យជំនួយការនៅម្នាក់ឯងដូចគ្នា។
ការិយាល័យ BEA បានអះអាងថា ប្រអប់ខ្មៅបង្ហាញពីជំនួយការអាកាសយានិក Lubitz បញ្ជាយន្តហោះផ្សេងទៀតមុនជួបគ្រោះថ្នាក់ឲ្យទម្លាក់ក្បាលចុះក្រោម ៥ដង ក្នុងអំឡុងពេល ៤នាទីកន្លះ ដោយផ្លាស់ប្ដូរពីការបញ្ជាស្វ័យប្រវត្តិ ទៅកម្ពស់អប្បបរមា ១០០ហ្វីត(ជាង ៣០ម៉ែត្រ) វិញ។
រូបភាពដែលគេសន្និដ្ឋានហេតុការណ៍មុនជួបគ្រោះថ្នាក់
លោក Remi Jouty ដែលជាប្រធានភ្នាក់ងារស៊ើបអង្កេតគ្រោះមហន្តរាយផ្លូវអាកាសបារាំង បាននិយាយថា "ខ្ញុំមិនអាចបញ្ជាក់បានទេ មានអ្វីកើតឡើងនៅក្នុងខួរក្បាលរបស់គាត់ពេលនោះ... អ្វីដែលខ្ញុំអាចនិយាយបាន គឺគេបានបញ្ជាប៊ូតុងទៅកម្ពស់អប្បបរមា ១០០ហ្វីត ហើយធ្វើបែបនេះជាច្រើនដង"។
រំលឹកឡើងវិញ ជើងហោះហើរ 4U 9525 របស់ក្រុមហ៊ុនអាកាសចរណ៍អាល្លឺម៉ង់ Germanwings បានជួបគ្រោះថ្នាក់ កាលពីល្ងាចថ្ងៃទី២៤ ខែមីនា បណ្ដាលឲ្យបាត់បង់ជីវិតមនុស្សទាំងអស់ ១៥០នាក់ (អ្នកដំណើរ១៤៤នាក់ បុគ្គលិក៦នាក់)។ បន្ទាប់ពីការស្រាវជ្រាវលើហេតុការណ៍ជាក់ស្ដែង និងទាញទិន្នន័យពីប្រអប់ខ្មៅ គេបានដាក់ការសង្ស័យថាជំនួយការអាកាសយានិកជាអ្នកនៅពីក្រោយគ្រោះថ្នាក់ដ៏រន្ធត់នេះ៕
ចុចអាន៖ ខ្សែអាត់សំឡេងបង្ហាញថាគ្រោះថ្នាក់ 4U9525 កើតឡើងដោយការធ្វើអត្តឃាត
ចុចអាន៖ ប្រអប់ខ្មៅ 4U 9525 បង្ហាញថាភីឡុតជាប់ក្រៅបន្ទប់ព្យាយាមបុកទម្លាយទ្វារ
ប្រែសម្រួល៖ គង់ វិសាល ប្រភព៖ dailymail