កំណត់ត្រា ៤ យ៉ាងសំខាន់ៗ របស់កម្ពុជា នៅ Asian Games 2014

2014-10-10 16:31:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជា បានជាប់កំណត់ត្រា ៤យ៉ាង សំខាន់ៗ ក្រោយពីបានចូលរួមព្រឹត្តិការណ៍កីឡាអាស៊ី Asian Games លើកទី ១៧ ឆ្នាំ ២០១៤ រៀបចំនៅទីក្រុង Incheon ប្រទេសកូរ៉េខាងត្បូង ចប់រួចរាល់កាលពីពេលថ្មីៗ នេះ។

១) រកឃើញកីឡាការិនីម្នាក់មានសារធាតុជំនួយកម្លាំងហាមឃាត់មុនការប្រកួត៖ កីឡាការិនី យី សុផានី ផ្នែកកីឡា Soft Tennis ត្រូវបាន គណៈកម្មាធិការអូឡាំពិកអាស៊ី(OCA) បានធ្វើតេស្តទឹកនោម កាលពីថ្ងៃទី១៦ ខែកញ្ញា មុនពេលព្រឹត្តិការណ៍ Asian Games។ ជាលទ្ធផលគណៈកម្មាធិការរកឃើញថា ទឹកនោមនោះមានសារធាតុហាមឃាត់( sibutramine)។ ខាងគណៈកម្មាធិការរៀបចំការប្រកួតបានសម្រេចដកបេក្ខភាពកីឡាការិនីរូបនេះចេញ មិនឱ្យប្រកួត។

២) កីឡាហែលទឹក ២ នាក់ហែលដល់ទីមុនគេដូចគ្នា តែមិនអាចឆ្លងទៅជុំបន្ទាប់បាន៖

កីឡាករ ហែម ថុនពន្លឺ កីឡាហែលទឹកកម្ពុជា ហែលទឹកដល់ទីមុនគេក្នុង Heat 1 នៅអាងប្រកួត Munhak Park Tae-hwan Aquatics Center ទាំងវិញ្ញាសា ហែលចម្ងាយ ៥០ ម៉ែត្រសេរីបុរស (២៧.៤៦ វិនាទី) និង ហែលកង្កែបចម្ងាយ ៥០ ម៉ែត្រ (២៣.៦៧ វិនាទី) តែមិនបានជាប់ឈ្មោះឡើងទៅប្រកួតនៅជុំបន្ទាប់។

ដូចគ្នានេះដែរ កីឡាការិនី ហែមថុន វីទីនី ក៏ហែលក្នុងវិញ្ញាសាហែលសេរីចម្ងាយ ៥០ ម៉ែត្រដល់ទីមុនគេដែរដោយប្រើថេរវេលា ៣១.១៨ វិនាទី ប៉ុន្តែមិនអាចឆ្លងទៅជុំបន្ទាប់បាន។

៣) ឈ្នះមេដាយមាស ជាលើកដំបូងក្នុងប្រវត្តិសាស្ត្រ៖ កីឡាការិនី ស៊ន សៀវម៉ី គឺជាជនជាតិខ្មែរដំបូងគេដែលអាចដណ្ដើមមេដាយមាសចេញពីព្រឹត្តិការណ៍កីឡា Asian Games គិតចាប់តាំងពីចូលរួមលើកដំបូងនៅឆ្នាំ ១៩៥៤ ដល់ឆ្នាំ ២០១៤ នេះ។ សៀវម៉ី ដណ្ដើមបានមេដាយមាស លើប្រភេទកីឡា តេក្វាន់ដូ WTF វិញ្ញាសាប្រកួតទម្ងន់ក្រោយ ៧៣ គីឡូក្រាម ក្រោយយកឈ្នះកីឡាការិនី Fatemeh Rouhani របស់អ៊ីរ៉ង់ នៅវគ្គផ្ដាច់ព្រ័ត្រ ដោយលទ្ធផល ៧ ទល់ ៤។

៤) រដ្ឋមន្ត្រី និង នាយករដ្ឋមន្ត្រីរង់ចាំទទួលម្ចាស់មេដាយមាសទាំងយប់៖

ក្រោយទទួលបានដំណឹងថាកីឡាការិនី ស៊ន សៀវម៉ី ឈ្នះមេដាយមាសនៅកីឡាអាស៊ី Asian Games ឯកឧត្ដម ថោង ខុន ប្រធានគណៈកម្មាធិការជាតិអូឡាំពិកកម្ពុជា និង ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា បានទៅរង់ចាំទទួលដល់ប្រលានយន្តហោះអន្តរជាតិភ្នំពេញ តាមច្រក VIP។

ចំណែកសម្ដេចនាយករដ្ឋមន្ត្រី ហ៊ុន សែន បានរង់ចាំទទួលជួបកីឡាការិនីជយលាភី និងប្រតិភូ នៅវិមានសន្តិភាព នាវេលាម៉ោង ១១:៣០ នាទីយប់ ថ្ងៃទី ៥ តុលា ឆ្នាំ ២០១៤ និងថែមទាំងផ្ដល់ប្រាក់រង្វាន់លើកទឹកចិត្ត និង វត្ថុអនុស្សាវរីយ៍មួយចំនួន រួមទាំងបំពាក់គ្រឿងឥស្សរយយសថ្នាក់មហាសិរិវឌ្ឍន៍ថែមទៀតផង។

Asian Games បានបង្កើតឡើងអស់ចំនួន ១៧ លើកមកហើយ ចំណែកកម្ពុជា ធ្លាប់បានចូលរួមប្រកួតបានចំនួន ១១ លើកក្នុងនោះដណ្ដើមមេដាយបានចំនួន ៧ គ្រឿង ក្នុងនោះមេដាយមាស ១ ប្រាក់ ២ និង សំរឹទ្ធ ៤ គ្រឿង។ សម្រាប់ ៤ ឆ្នាំបន្ទាប់ ពោលគឺក្នុងឆ្នាំ ២០១៨ ការប្រកួតកីឡាថ្នាក់ទ្វីបនេះនឹងរៀបចំនៅប្រទេសឥណ្ឌូណេស៊ី៕

ចំពោះជីវប្រវត្តិរបស់ ស៊ន សៀវម៉ី សូមចុចទីនេះ...

អត្ថបទ៖ ម៉ឺន រស្មី