ក្រុមស៊ីហ្គេម ប្រកួតមិត្តភាព ២ លើក ខណៈក្រុម World Cup ប្រកួត ៣ លើកមុនជំនួបផ្លូវការមកដល់
- 2015-05-25 18:21:41
- ចំនួនមតិ 0 | ចំនួនចែករំលែក 0
ក្រុមស៊ីហ្គេម ប្រកួតមិត្តភាព ២ លើក ខណៈក្រុម World Cup ប្រកួត ៣ លើកមុនជំនួបផ្លូវការមកដល់
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជា ២ ក្រុមផ្សេងគ្នា គឺ ក្រុមត្រៀមជម្រើស FIFA World Cup និង ក្រុមយុវជនក្រោមអាយុ២៣ឆ្នាំ (U-23) ត្រូវប្រកួតមិត្តភាពខ្លះៗ ២ ទៅ ៣ ប្រកួតទាំងក្នុងស្រុក និង ក្រៅស្រុក មុនប្រកួតផ្លូវការមកដល់។ នេះបើតាមការឱ្យដឹងរបស់លោក ឆាំង ពិសិដ្ឋ អ្នកចាត់ការទូទៅក្រុម U-23 កម្ពុជា។
ក្រុមជម្រើសជាតិកម្ពុជា
សម្រាប់ក្រុមត្រៀមជម្រុះ FIFA World Cup របស់កម្ពុជា ត្រូវប្រកួតមិត្តភាពជាមួយក្រុម African Selection Team (កីឡាករទ្វីបអាហ្វ្រិកដែលប្រកបអាជីពនៅកម្ពុជា) នៅថ្ងៃទី ២៨ ខែ ឧសភា ឆ្នាំ ២០១៥ នៅពហុកីឡដ្ឋានជាតិ វេលាម៉ោង ៦:៣០ នាទី ។ នៅថ្ងៃទី ២ ខែ មិថុនា ក្រុមដែលដឹកនាំដោយគ្រូបង្វឹកជនជាតិជប៉ុន Ohara Kazunori នេះនឹងត្រូវប្រកួតមិត្តភាពអន្តរជាតិជាមួយក្រុមជម្រើសជាតិឡាវ លើវាលស្មៅពហុកីឡដ្ឋានជាតិ វេលាម៉ោង ៦:៣០ នាទីល្ងាចផងដែរ។ ប្រកួតមិត្តភាពអន្តរជាតិចុងក្រោយធ្វើដំណើរទៅប្រទេសថៃ ប៉ះក្រុមជម្រើសជាតិមីយ៉ាន់ម៉ា នៅថ្ងៃទី៥ ខែមិថុនា ឆ្នាំ ២០១៥។
ចំពោះក្រុមស៊ីហ្គេមវិញ ត្រូវប្រកួតមិត្តភាពជាមួយក្រុមណាហ្គាវើល នៅវេលាម៉ោង ៦ ល្ងាចថ្ងៃទី ២៦ ស្អែកនេះនៅពហុកីឡដ្ឋានជាតិ ហើយត្រូវបន្តប៉ះក្រុម Japan Selection Team នៅម៉ោង ៦ ល្ងាចថ្ងៃ ទី ២៩ ខែ ឧសភា មុនចេញដំណើរទៅប្រកួតផ្លូវការនៅប្រទេសសិង្ហបុរី។
ក្រុម U-23 កម្ពុជាត្រៀមស៊ីហ្គេម
ប្រភពបន្ថែមថាសម្រាប់ព័ត៌មានដែលលេចឮថាក្រុមកម្ពុជា ទាំង២ នេះត្រូវប្រកួតមិត្តភាពអន្តរជាតិជាមួយក្រុមជម្រើសជាតិនេប៉ាល់ មិនមាននោះទេ ដោយសារភាគីខាងនេប៉ាល់ រៀបចំខ្លួនមិនទាន់។
ងាកទៅមើលប្រកួតផ្លូវការវិញ ក្រុមជម្រើសជាតិកម្ពុជា ត្រូវបើកទ្វាពហុកីឡដ្ឋានជាតិ ទទួលភ្ញៀវក្រុមសិង្ហបុរី ក្នុងការប្រកួតបើកឆាកជម្រុះពានរង្វាន់ 2018 FIFA World Cup Russia ក្នុងពូល E នៅថ្ងៃទី ១១ ខែ មិថុនា និងបន្តធ្វើជាម្ចាស់ផ្ទះ ទទួលក្រុមអាហ្វហ្គានីស្ថាន នៅថ្ងៃ ១៦ ខែ មិថុនា ឆ្នាំ ២០១៥។ ចំណែកក្រុម U-23 វិញត្រូវប្រកួតជម្រុះក្នុងពូល A ដោយជួបក្រុម ហ្វីលីពីន នៅថ្ងៃទី ៣ មិថុនា ហើយជួបឥណ្ឌូណេស៊ី នៅថ្ងៃទី ៦ ខែ មិថុនា បន្តជួបម្ចាស់ផ្ទះសិង្ហបុរី នៅថ្ងៃទី ៨ ខែ មិថុនា និងប្រកួតបិទពូលជាមួយមីយ៉ាន់ម៉ា នៅថ្ងៃទី ១០ ខែ មិថុនា ឆ្នាំ ២០១៥៕
អត្ថបទ៖ ម៉ឺន រស្មី