ថៃ ស៊ី វៀតណាម ១-០ បាន៣ពិន្ទុមុនគេវគ្គជម្រុះ World Cup
- 2015-05-25 21:00:01
- ចំនួនមតិ 0 | ចំនួនចែករំលែក 0
ថៃ ស៊ី វៀតណាម ១-០ បាន៣ពិន្ទុមុនគេវគ្គជម្រុះ World Cup
ចន្លោះមិនឃើញ
ក្រុមជម្រើសជាតិថៃ បានទទួល៣ពិន្ទុមុនគេក្នុងពូល F នៃវគ្គជម្រុះ FIFA World Cup 2018 តំបន់អាស៊ី ក្រោយយកឈ្នះក្រុមគូប្រជែងរួមតំបន់អាស៊ាន វៀតណាម ១-០ យ៉ាងត្រដាបត្រដួសយប់មិញនេះ។
នៅក្នុងការប្រកួតដែលធ្វើឡើងនៅកីឡដ្ឋានជាតិរបស់ថៃ Rajamangala នាទីក្រុងបាងកកនោះ មានសភាពតានតឹងយ៉ាងខ្លាំង ប៉ុន្តែមិនមានក្រុមណាអាចបំបែកពងមាន់បាននោះឡើយនៅតង់ទី១ រហូតឈានចូលដល់តង់ទី២ នាទី៨០ ទើបកីឡាករបម្រុង Anon Pokkhao រកគ្រាប់ជ័យជម្នះឲ្យក្រុមម្ចាស់ផ្ទះបានសម្រេច។ ខ្សែបម្រើក្រុម Police United រូបនេះ បានប្ដូរចូលជំនួសកីឡាករ Wichaya Sanrawat Dechmitr នៅនាទី៦៦។
នៅមុនការស៊ុតបញ្ចូលទីនោះដែរ ក្រុមវៀតណាមបានបាត់បង់សមាជិកម្នាក់ ក្រោយពីកីឡាករ Nguyen Minh Chau ត្រូវអាជ្ញាកណ្ដាលបណ្ដេញចេញ។ ខ្សែបម្រើវ័យ៣០ឆ្នាំរបស់ក្រុម Hai Phong រូបនេះ ត្រូវលោក Ben Williams អាជ្ញាកណ្ដាលម្ចាស់ពាន Referee of the Year ទ្វីបអាស៊ី ពិន័យកាតក្រហមភ្លាមៗតែម្ដង ក្រោយទទួលរងការព្រមានផ្ទាល់មាត់ម្ដងមកហើយនៅ៥នាទីមុនការផ្ដល់កាតក្រហមនោះ។
ការប្រកួតក្នុងពូល F នឹងត្រូវចាប់ផ្ដើមបន្តទៀតនៅថ្ងៃទី១១ ខែមិថុនាខាងមុខ ដោយឥណ្ឌូណេស៊ី ទៅសួរសុខទុក្ខក្រុមចិនតៃវ៉ាន់។ ក្រុមទាំង៥ក្នុងពូលនេះ រួមមានក្រុមក្នុងតំបន់អាស៊ានដល់ទៅ៣ គឺ ថៃ វៀតណាម ឥណ្ឌូណេស៊ី និងក្រុម២ទៀត គឺអ៊ីរ៉ាក់ និងចិនតៃវ៉ាន់។ ក្រុមលេខ១ក្នុងពូល និងក្រុមលេខ២ល្អបំផុតចំនួន៤ក្នុងពូលទាំង៨ (សរុប១២ក្រុម) នឹងត្រូវឡើងទៅវគ្គជម្រុះជុំចុងក្រោយ ហើយក៏មានកៅអីទៅប្រកួត AFC Asian Cup ឆ្នាំ២០១៩ផងដែរ៕
ចុចអាន៖ ក្រុមស៊ីហ្គេម ប្រកួតមិត្តភាព ២ លើក ខណៈក្រុម World Cup ប្រកួត ៣ លើកមុនជំនួបផ្លូវការមកដល់
ដោយ៖ សុវត្ថិ ប្រភព៖ afc, fifa