រលកកម្ដៅឆក់យកជីវិតមនុស្សជាង ៣៥០នាក់នៅឥណ្ឌា

2015-05-25 21:06:58
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សជាង ៣៥០នាក់ បានស្លាប់ជាបន្តបន្ទាប់នៅប្រទេសឥណ្ឌា ដោយសាររលកកម្ដៅដ៏ខ្លាំងរហូតដល់សីតុណ្ហភាព ៤៨អង្សា នៅតំបន់ខ្លះ។ នេះបើតាមការចុះផ្សាយលើសារព័ត៌មាន BBC កាលពីជាងមួយម៉ោងមុន។

ជនរងគ្រោះភាគច្រើនជាអ្នករស់នៅបណ្ដារដ្ឋភាគខាងត្បូងប្រទេសឥណ្ឌា ដូចជា Telangana និង Andhra Pradesh។ កាលពីថ្ងៃអាទិត្យម្សិលមិញ មនុស្សជាង ១៤០នាក់ បានស្លាប់នៅរដ្ឋទាំងពីរខាងលើ។ ទីក្រុង Allahabad នៅក្នុងរដ្ឋ Uttar Pradesh បានឡើងកម្ដៅដល់ ៤៨អង្សា ដែលជាសីតុណ្ហភាពខ្ពស់បំផុតមិនធ្លាប់មាន ខណៈរដ្ឋធានីញូដេលីឡើងកម្ដៅដល់ ៤៤អង្សា។

អាជ្ញាធរមានសមត្ថកិច្ច បានជំរុញឲ្យប្រជាជនស្នាក់នៅក្នុងលំនៅឋាន ព្រមទាំងផឹកទឹកឲ្យបានច្រើន។ ភ្នាក់ងារសារព័ត៌មានឥណ្ឌា បានបញ្ជាក់ថា កាលពីថ្ងៃសៅរ៍ រលកកម្ដៅបានឆក់យកជីវិតមនុស្សអស់ ១៨៦នាក់ ក្នុងស្រុកទាំង១០ នៃរដ្ឋ Telangana ដែលក្នុងនោះ ៥៨នាក់ស្លាប់តាំងពីថ្ងៃសៅរ៍។

នៅរដ្ឋ Andhra Pradesh អ្នកបាត់បង់ជីវិតបានកើនឡើងដល់ ១៨២នាក់ ដែលក្នុងនោះ ៨៧នាក់ស្លាប់តាំងពីថ្ងៃសៅរ៍។ ជនរងគ្រោះស្ទើរទាំងអស់ជាមនុស្សចាស់ ហើយភាគច្រើនកំពុងធ្វើការក្រោមរលកកម្ដៅ។ នាយកដ្ឋានឧតុនិយម បានបញ្ជាក់ថា ស្ថានភាពក្ដៅខ្លាំងនេះ អាចនឹងបន្តប៉ុន្មានថ្ងៃទៅមុខទៀត។

ដោយសាររលកកម្ដៅដ៏អាក្រក់នេះ រថយន្តតាក់ស៊ីដែលគ្មានម៉ាស៊ីនត្រជាក់ ត្រូវហាមឃាត់មិនឲ្យបើកតាមផ្លូវរយៈពេល ៥ម៉ោង អំឡុងថ្ងៃក្ដៅខ្លាំង។ ការហាមឃាត់នេះ កើតឡើងបន្ទាប់ពីអ្នកបើកតាក់ស៊ីពីរនាក់ស្លាប់ នៅក្រុង Kolkata រដ្ឋ West Bengal៕